Job 14

₁“Hin'o tä nech'e iche tälho atsinha,

ifwalas nitäkwiyejt'a wet wujpe lelhaklis.

₂Tet iwoye inawo tä lhaich'enphä

wet äp tasuy t'at,

tefwaytshipej tet iwoye hupel.

₃¿Chipte tä letetshann'o

wet leti n'oyej akalelhthayaj?

₄¿Atsi tä isyen m'ak tä laj le'isyaja?

Ihichet'a.

₅Am tä let'ithat ifwalas tä hin'o ihonhatena,

wet lewo lakapesa, tefwayhit'a'pe.

₆Leyej tä letetshan, wo letamseka,

tehlat iwoye chumaj tä nofw laka ifwala.

₇“Häp hal'ä tä õyisetlä lepese äp w'atshanhila,

wet yachajiholak iwo letälhesa.

₈Tej che lefwettsil hich'uthi honhat,

wet letes pajla'tha honhat mok t'at,

₉mat che ikatej inät, w'atshanhila,

wet pajla'tha wujche tä lhaichiyhelit.

₁₀Mat hin'o y'il t'at tsi lajit lachaya.

Tatäy t'at, ¿wet chi tiyäji?

₁₁Tet iwoye lewomek tä laj inätahi,

wet tewok t'aylhahchä pajtha y'im t'at,

₁₂wet häp tä tetso,

tä kamaj pule iche

hin'o tek nephä tä ihi n'ot'olis,

äp nin'omhiya t'at.

₁₃“Is t'at che leweskatshayen n'oho

honhat tä n'op'itseyhay lew'et,

pajla'tha tajyäme awäk

wet äp nech'e letichunhiyeja n'ohlä.

₁₄Che y'il hin'o, yachajihot'alak iläyhi.

Oteläythiyejn'e nilhokej ifwalas

pajin'e'tha leti n'oyej hach'otyaj

wet lefwayhat n'oyej olhaklis.

₁₅Che let'änhin'e n'oye, wet onchulhin'e t'at,

wet a'akäjilhin'e n'oyej tä enekn'o.

₁₆Letetshanhin'e ochumyajay,

häpkhin'ek katetshanhiyan'e och'isukyaj.

₁₇Letihiyejn'e kanhi okeyis,

wet äp lelejin'e t'at och'isukyaj.

₁₈“Tha tachenhas waschehchä,

wet tuntey yikchech'oye lew'etes,

₁₉wet inät ihämit tuntey,

wet pelhayis ichäjchetshi honhat.

Wet häp tä tetso

tä am lesoyej hin'o leniwhayaj.

₂₀Tä letumlä hin'o wet y'il,

lewo elha tate'pe tsi ileyej honhat.

₂₁Che leles nichätho lewujyajay, lham ch'amajej,

wok õy'ayhatchehchä, nhanayej t'at.

₂₂Tajlhame t'at tä iläte t'isan tä äytaj,

wet ifwitajejlhi leteläythayaj.”