Job 15

₂“¡W'et ämtes t'at!

¡W'et alhen ahantsaja!

M'ak tälhiyet'a ämtes,

tet iwoye leyalh.

₃W'et yämhilhit'a elh tä ahantsaj.

Yämhiyet'a m'ak tä lajit lahaya.

₄Mat am n'älej tä lelehtej wichi tä ihumin Dios,

häpkhilek nemhit iwoye lhämtes

wet äp niwoya t'alhyaja.

₅Tsi ates ihi, häp tä tamenej

tä lewoye ämtes tä afweynhayaj.

₆Olhamhit'a tä oayen tesa,

ämtes t'at tä hin'älit tä ates ihi.

₇“¿Hä lechunp'antehlä Adán tä lhewche,

wok lechunp'antehlä tachenhas?

₈¿Hä leläte p'ante m'ak tä Dios nin'älita?

¿Hä ats'ilak t'at tä lehanej m'ayhay?

₉¿Atsi m'ak tä lehanej

tä olhamel n'am hanej?

¿Atsi m'ak tä lehanej tä newa n'oyejen?

₁₀Olhamel ohäpe iyhäj tä thänhäy,

ohanyhayajay wuj tä tefwaype ajcha lehanyhayaj.

₁₁¿Hä nayahit'a Dios lep'altsenyaj tä i'amej,

lhäy'e olhämtes tä akäschehen

tä olhämel oyämej ame?

₁₂¿Chipte tä lewahin amej aka'tshayaj

wet letihiche atelhoy afwitseyaj?

₁₃¿Chipte tä letawäkwäye Dios

wet lewoyeje ämtes tä ni'isachehen?

₁₄Ihichet'a hin'ok laj lakokhayaja

wet äp laj letesa.

₁₅Tej tä ángeles,

tha Dios t'ekhahiyet'a,

wet pule lajit le'isyajahi tä tatache.

₁₆Wet hin'o häp tä nem koyhyaj tä ni'isa,

tsi matche tä w'et m'ak t'at,

iwoye lech'isukyaj mälhyej tä iyäyej inät.

_17-18“Ch'ahu n'oye wet owohla siläta,

ofwenla amho m'ak tä ahantses ichufwen n'oyej.

Lhamel ifwelpej m'ak tä letetsel iti lhamej

wet tek iskat tä ihanejen.

₁₉Tajlhamat lhamel tä õhw'enho p'ante honhat,

niwoyat elh che w'enha lhamej che ihi.

₂₀Hin'o tä ni'isa tä ilhaklithen iyhäj,

äytajichela leteläythayaj

nilhokej ifwalas tä kamaj iläyhi.

₂₁Iläte m'ak pakas tä istun,

wet tä fwetaj letamsek ihi,

etantses isakanej t'at.

₂₂Lham tefwayhiyejt'ala honataj,

iniwhi tä n'ofwajnhatlak ilänla.

₂₃Tsetwos tufwila t'at lep'itsek,

lham ihanej t'at tä nichäthihola honataj.

₂₄Wuj lenowayhyaj wet matche tä lelhakli ihi,

tet iwoye hin'o tä letayhfwa inuye.

₂₅Tsi häp tä takwey itayhte Dios,

wet äp lakachuhanyaj itiyej

lham tä laj letumfwaya.

₂₆Lep'ot ihihlä Dios tä ikachuye,

wet häp tä tatay'atlä.

₂₇Häpe hin'o tä lhäy'e lhip tä yätaj.

₂₈Mat hupuy tä yen w'eta

õ'womla t'at pajla'tha wasiche,

ts'ilakhilat lemhoy.

₂₉Pitajit'ala tä hiw'en m'ak,

nofwila lakäywet, nemla t'aytshi.

₃₀Tefwayhiyejt'ala honataj,

wet tehlat iwoye hal'ä tä letälhes y'ohen,

wet äp Dios leyalhlak itäyhat.

₃₁Isit'ak t'ekha lhame,

tsi ikanla lhamej wet m'ak tälhiyet'ala.

₃₂Tehlat iwoye hal'ä tä lhachal tasuype

tä kamaj nitaja lewhäy,

äp yachajihot'alak w'atshan.

₃₃Tehlat iwoye uvas lhay tä kamaj n'oyahen,

wet tehlat olivo lhawo tä nat.

₃₄Wichi tä ni'isahen lajla lelesa,

wet y'ohihomchela lewukwey

tä ikalheji t'akanyajay tä iwoye.

₃₅Hich'otshanejen m'ak tä ni'isachehen

wet takapuhtshanejen lewit'äyhyaj,

wet leles tä iwoye häpe t'at lakafweynhayajay.”