Sofar yäme tä wichi tä ni'isahen lewit'äyhyaj ihi
1Sofar nichulho Job tä yok:
2“Matche tä oyen tichunhayaja ämtes tä lewoyena,
wet häp tä iwohiyet'ak n'am chulh amho.
3Aläkwyhanyaj leti n'oyej,
äp oyachajila ahilä olhämet.
4Lehanej tä tälhe täjp'ante nech'e õyenlhi hin'o,
5wichi tä ni'isahen
yik t'at lakäjyaj, pitajit'a.
6Tej che atojphä lewujyaj
wet lhetek tijejlhi pules thayej,
7letäyhyaj tehlat iwoye y'amuk,
wet wichi tä nitäfwelej yohlak,
¿Atsin'aj m'ak tä iyej?
8Tefwayhitshila tehlat iwoye n'ofwilhek,
tehlat iwoye n'ow'enek tä honatsiyej,
wet nemhit õ'hanej ihiche.
9Lew'et lheley lhäy'e wichi iyhäj
nemla yachajo tä hiw'en.
10Leles inachajiyela p'elitses
häp laka m'ayhayn'aj t'etanehen.
11Tsi wichi tä ni'isahen,
tä kamaj nithänhäya wet takhajayhen,
yäpnhihola honhat mok.
12“M'ak tä ni'isa tet iwoye
n'olhäk tä hak'onek
tä ihi hin'o tä ni'isa lak'aj,
itichufwi lak'ajlhich'utes.
13Tä yenet che is, ilehiyejt'a,
wet ifweyhthi t'at lak'ajch'o.
14Mat che paj tehlat iwoye
amlhäj lhach'il tä ihi lenipilh.
15Tach'uyejphä m'ayhay tä wuj tä iskon lhamej,
Dios t'at tä itonphä.
16Hits'uhi amlhäj lhach'il tä n'ot'ilek,
wet n'ot'ilektso ilänla.
17Hiw'enhit'ala m'ak tä naya
tä häpe pinu lhäy'e t'os tä iläfwelchehen.
18Nilhokej m'akn'aj ikalhi yachajilahlä,
tha niwohiyat kotsayej.
19Tsi häp tä ilhaklithen p'elitses,
tek hip'altsenhen lhamel,
lhayen lewuka hupuy tä kalhamak yenchelhi.
20Matche tä ayhthatsaj,
wuj tä ikänch'oye m'ak.
21Isoyej iyhäj nilhokej m'ak tä hiw'en,
niwohiyat m'ak che imälhetchä.
Mat t'unhit'ala lakäjyaj.
22Che lhäy'ehila lhip m'ak tä hiw'en,
wet lhäy'et lhip lelhaklis che iyej
wet lewit'äyhyajay tä w'enhahiche nichätlatpe.
23Häpet che naya m'ayhay tä iskon lhamej,
wet Dios ichätyenla'pe lewäk,
tehlat iwoye itäj tä y'uho.
24Che n'otkwey lhele tä chinaj yämet,
che õ'häne lutsej häpkhilek õ'sakanej.
25Lotek tiyäjihola t'isan
wet lepes tiyäjihola letänek
wet tefwayphä lhip elhe.
Wet wujla lenowayhyaj,
26honataj hip'ohla'pe,
wet itäj tä niwatahläk õyafwutlhi
ihämthila häp lham lhäy'e lew'et.
27Pule hin'älthila lech'isukyaj
wet honhat neyhiphäla che itiyej letes.
28Dios lewäk hip'ohla'pe,
tehlat iwoye tewok tä tsaji,
wet itäyhthila m'ak tä wuj tä iyej.
29Häp m'ak tä Dios itshupyene p'ante,
häp täjtso lakapes tä iwaklhatlä.”
