Job yen tesayej Dios tä nitasina hin'ol tä iwoye m'ak tä ni'isachehen
1“¿Chipte tä Dios tä laj tumfwaya
nin'älita lewhäy tä itiyej lakalelhthayaj
wichi tä iwoye m'ak tä ni'isachehen?
Häp tä lham laka wichi
w'et iniwhi t'at ifwalastso.
2Wichi tä ni'isahen isoyej honhat tä lewuk iyhäj,
wet t'etanehen iyhäj leläy.
3Isoyej leläy asnolis häp chipenhas,
wet lhayen lewuka tesalis leläy w'asetas
tä kamaj lhamel nitiskana'pe letes.
4Ilehatche len'äyij p'elitses,
wet iyhäj tä w'et m'ayhay weskatlä lhamel.
5Häp p'elitses tet iwoye
asnolis tä ilunche ts'anis
tä t'ukwe lhäk wet leles lhäk.
6Ihoye iyhäj käsw'etes
tä t'ukwe m'ak che isej,
wet tachumahen wichi tä ni'isahen laka uvas.
7Honajchepej lajit lew'uya tä imä,
lajit lep'otahlä fwiy'et.
8Pelhay ilän tä iche tachenhas,
tatsufwelejwethä tuntey
tä fwetaj ilethane.
9“Wichi tä ni'isahen isoyej tesalis
leles tä nech'efwas,
wet yen kwenkaya n'atfwas
tä lhokwey tä p'elitses nitiskana'pe letes.
10P'elitses ts'ilakchehen tä ilunhen,
wet talhunej n'okäs lhay,
mat nichuyuhen t'at pajtha y'inhen.
11Ilunkathiche tuntey
tä itälhtho aceite.
T'äsi uvas tä iwo t'ila,
mat ichimhen t'at pajtha y'inhen.
12Lhamel tä ayte y'inhihen
tä ihi hupuy t'änwethä.
T'änch'oye Dios lech'otyaj,
mat tach'ahuhiyet'a.
Wichi tä honatsi lheley lakeyis
13“Iche iyhäj tä y'ulhan isi,
wet häp tä lhamel ilechehen n'äyij tä ihutunpe.
14Häp anikoy yäp'elhtshi
tä t'uhläk ilän p'elitsaj,
wet tä honatsi lhayen etantsaja.
15Elh tä kain'oye iniwhihläk ichalajchä,
wet yik tä iskatho iyhäj tate'pe,
häpkhilek õknitäfwelayej.
16Etantsaj y'uychechufwi hupuy tä honatsi,
n'änhit'a tä ifwala tsi n'äyiho isi.
17Yen laka honatsiya tä ifwalayej,
wet tä ichalajchä iwoye t'at lakeyis.
Dios itihiyeja lewit'äyhyaj häp wichi tä ni'isahen
18“Inät tä iläfwelche ichäj hin'o tä ni'isa.
Dios takäpfwayeje lewit'äyhyaj häp laka honhat,
wet lakäsw'et nemlat wo täjche tachuma.
19Nahayhos ilän inät lhäy'e fwiy'et,
tetso n'ot'ilek tä ilän n'och'isukyajwo.
20Lako hip'ethetlä wet iwos tufwila.
Tehlat iwoye hal'ä,
hiy'esla elh tä ni'isa.
21Tsi häp tä ilhaklitwethä
atsinhay tä laj lelesa,
wet nip'altsena tesalis.
22Mat Dios lakhajyhayaj ihämit lakhajyhayaj.
Che tetso, ihichet'a elh che iläy.
23Dios tach'anlhaye ayej,
mat itetshanpej m'ak tä iwoye.
24Elh tä ni'isa fwetaj ineyhatphä len'ohyaj,
mat tä paj tatäyhla t'at,
tet iwoye hal'ä w'atshan tä lhay tasuyhen.
25Che niteyatso,
¿atsihilak lhaifwon n'ohlä
wet hin'älit che owetahi olhämet?”
