Job 23

₂“Äp yachajo otichunhayaj tä äytajche

tä otech'etejlhi Dios takwey tä in'o'pe.

₃Is t'at che ohanej chi tä iche Dios,

pajin'e'tha ohoye lakalelhthayajw'et.

₄Ofwenhihon'e m'ak tä in'oyej,

tsi lhiphiyet'a m'ak tä oyäme.

₅Ohanhiyejn'e m'ak tä nichulhej n'oho

lhäy'e m'ak tä yämej n'oye.

_6-7Lham tachumhiyet'an'e lakhajyhayaj tä nichulh n'oho,

tach'ahuhin'e n'oye wet imatthichen'e t'at,

ikalelhthin'e tä ois alhoho wet lajit otesa,

wet otfwayhiyejn'e lakalelhthayaj.

₈“N'am lhoke Dios che iye tä ifwala tälhche,

tä ifwala y'uy äp nehiyahi t'at.

₉Ottay tafwojyhiye wet äp n'am w'enhi t'at.

Otilhake tapinhiye, äp n'am lhokhiye t'at.

₁₀Mat lham nitäfwelej lhip tä oihi,

wet yelhat n'oye häpkhilek kalelhäj che ois,

otehlat iwoye oro tä ts'ilak.

₁₁Pajihit'ak oleche len'äyij

tä ipäyente n'okwe.

₁₂Owoyepej m'ak tä isukun n'oyej,

owohiyet'a m'ak tä olham tä ohuminche.

₁₃“Che Dios tä itshupyene m'ak at che yenlhi,

ilehthichet'a m'ak tä häpe.

₁₄M'ak tä wak'alh tä iwoyej n'oye,

häp tä iwohiyela wet y'isiyeja iyhäj m'ayhay.

₁₅Häp tä onowaye,

che ontichunche wet otchettiyejche onowayhyaj.

₁₆Dios häpe Elh tä laj tumfwaya

wet otsawkane.

₁₇Is t'at che honatsi hip'o n'o'pe

wet honataj itäyhatn'o.