Hin'o mamse tä lhey Elihú iwo lhämeta
1Tä Job lakalay'is hiw'en tä lhayen isa, lhamel ileyej tä yämhoplhi. 2Wet iche hin'o tä ihi lhiptso tä lhey Elihú, häpe Baraquel lhäs, wet laka wichi lhey Buz lhayis, wet tälhe letes p'ante lhey Ram. Wet Elihú tawäkwäye Job, tsi Job iwo letesa Dios wet yäm lhame tä laj letesa. 3Wet äpte Elihú nichuwetehen Job kalay'is tä lhamel nhanayej che nichulho, wet häp tä lhamel itech'aynej Dios tä ni'isa m'ak tä iwoye. 4Tä Elihú häpe elh tä nech'e tä thaläkw, tataye t'at che iyhäj tä thänhäy ileyej tä yämhoplhi Job. 5Wet tä Elihú hiw'en tä lhamel nhanayej che nichulho, wet matche tä lewäk ihi, 6wet nech'e iwo lhämeta wet yok:
“Tä athänhäy, onowaye mathi
che ofwel amhomche otichunhayaj,
tsi ohäpe elh tä mamse.
7Oyomatkwe, Hin'ol tä thänhäy
häp tä is che iwo lhämeta.
Wichi tä lew'oley ipelas,
häp tä is che ichufwenej m'ak tä ihanej.
8Mat nech'e äp otichunhayaj yok,
Nilhokej hin'ol tä lehusey ihi,
tsi Dios tä laj tumfwaya
yafwtejo lehanyhayajay tä iyej.
9Ts'ilakhit'a thänhäy tä lehusey ihi.
Ts'ilakhit'a wichi tä lew'oley ipelas
tä ihanej m'ak tä is alhoho.
10Häp tä tamenej tä oyok,
Ch'ahuyay n'oye,
ofwel amhohen m'ak tä ohanej ihi.
Elihú iwohiyet'ak nämalhi
11“Otch'ahu amehen tä lhämwethä,
ottay at amehen tä let'uyaykwe
ämtes tä isen tä lefwenho Job.
12Wet äp ow'en tä ihichet'a elh amel
che ihanej iwoyneje tä nichulho Job.
13Amel tek lelhokaye n'ohanyhayaj,
wet tä kahanayej lewoyneje che lechulho Job,
Diosla t'at che nichulho.
14Tä ka'olhama tä yämlhi n'oho Job,
mat onchulhihola tä nitehiyat iwoye tä amel lechulho.
15“Job, akalay'is inukwetshi,
nemhit ihanej m'ak che nichulhej amho,
nofwen t'at lhämtes.
16Yej lhenayek och'ethiyeja tähestso
tsi häp tä lhamel nichulha amho.
17Ofwenla amho otichunhayaj,
tsi olham iche t'at m'ak che onchulhej amho.
18Wujla'pey olhämtes, on'äyhiyejt'a.
19Tatäy lhimphaj che okw'esche,
otet iwoye hat'eshi tä tsänt'äj
tä ayta hikw'esiche.
20Otahuyhila, tehlat iwoyek opäjphä,
kalelhäj t'at olhämtes
tä onchulhiyeja ahilä.
21Tek okäntejlhi olhämtes elh che häpe,
ow'awlhatlahchä.
22Okeyhit'a che ofwayhetpe
elh at che häpe iyhäj,
tsi che tetso, Owuk itäyhthilan'o.
