Job 36

₂“Ch'et lha ayhiya, teläytej ayej,

kamaj owoye olhämtes tä oyämejlhi'pe Dios.

₃Ochumyenlhi ohanyhayaj tä wuj tä in'oyej,

opäynhila ame tä Elh tä lhenekn'o

ispej alhoho m'ak tä iwoye.

₄Matche t'at m'ak tä oyäme,

w'et oyämhilhit'a,

tsi ohäpe elh tä wak'alh lehanyhayaj tä iyej.

₅“Dios khajnaj wet naya lehanyhayaj,

wet y'ulhanhit'a elh che häpe.

₆Tek n'äyejo lewit'äyhyaj häp awit'äyhtsaj,

wet hi'isyen alhoho elh tä p'elitsaj.

₇T'uyehen iyhäj tä ische alhoho,

tek yikhatch'oye iyhäj tä ihi leniyatyaj.

₈Mat che õ'nayhtejchehen t'akay tä chinhas

wet wuj tä lhailäthen,

₉häp tä Dios ipäyne

m'ak tä ni'isa tä iwoye,

wet äp ipäyne tä lhaichäjwethä.

₁₀Tahuyejen tsi itetshan,

ne'tek lhamel ileyej

m'ak tä ni'isa tä iwoye.

₁₁Che lhamel tach'ahuye wet iwoye,

nilhokhiyeja ifwalas tä letamsekis ihi.

₁₂Che nitch'ahuyaye, y'inhihena,

nofwiyela n'ot'olis tä nitäfwelayej.

₁₃“Akachuhantses matche tä lefwitseyaj ihi.

Tej tä Dios hip'ohiche,

tha t'alhiyet'a lech'otyaj.

₁₄Y'inhen tä kamaj nithänhäya,

len'äfwlhi ihämtej lhamel.

₁₅Mat Dios itiyej leteläythayaj hin'o,

häpkhilek ileyej m'ak tä ni'isa tä iwoye.

Dios iwo lelhakliya hin'o,

häpkhilek ileyej lakachuhanyaj.

₁₆“Dios yäm p'ante is alhoho han'äyij,

wet hiw'en p'ante amho m'ak tä naya,

häpkhilek atamsek ihi.

₁₇Mat athana aisej alhoho awit'äyhtsaj lewit'äyhyaj,

wet lehanhiyejt'a lewoyneje che alhämet.

₁₈Äm ahin'ohlä n'otkanyaj

tä õ'wo chalalhi amej,

tsi chejiphälat õ'aikalheji chinaj t'äj.

₁₉Tej che let'änlhi tä afwitajayaj ihi,

tha niwohit m'ak che aisej.

Tej che alekhajyen,

tha m'ak lekalhihit'a.

₂₀Yej teläjlä honatsi

tä wichi nofwiyeja.

₂₁Uhlä, yej lhäplej m'ak tä ni'isa,

tsi pajche õyelhtej ame ateläythayaj.

₂₂“Tetshan tä wuj Dios lakhajyhayaj,

wet äp ihichet'a elh n'ochufwenyajwo che w'awulhi.

₂₃Niwohiyat täjche ifwenho m'ak tä yenlhi,

wet ihichet'a elh che iwo letesa.

₂₄Tä nilhokej wichi yen käjyaja lechumyaj,

am tichunlä che lhen akäjyaja lechumyaj.

₂₅Nilhokej hin'ol tä hiw'ene lechumyaj,

tej che atosehen at thayej,

hiw'enehen t'at.

₂₆Dios lewujyaj kay'atäfwelayej,

äp kay'ahanayej chitefwas nekchämis tä ihi.

₂₇“Dios itonphä inät tä tälhpetso,

wet ihän kaphä tä yen pelhaya.

₂₈Pelhay tä tälh kaphä

nitsäyhchä'pe wichi.

_29-31Häp tä tetso tä Dios ichunnhen

wet yäm naya lhäk tä hiw'enhomchepej.

¿Atsi tä ihanej pules tä nephä

lhäy'e pelhay tä t'ajanlhi?

Dios hich'enpe lep häp pule,

wet ichätyen lech'oye inät tä pitoj.

₃₂Itsoklhi pelhay t'ajnhayaj,

itshupyene lhip che häpe tä itajyenej.

₃₃Pelhay t'ajnhayaj itoyne Dios,

pelhay tä yafwuteji hin'älit Dios lewäk.