Job 37

₁“Che ow'en pelhay,

wet ot'otle tan'ajphä

tet tefwayhihiphä ot'okwe.

₂Ch'ahuyaye Dios lepak

tä häpe pelhay t'ajnhayaj.

₃Hich'enpe lep häp pule

wet ifwithen honhat pesey.

₄Wet tä kamaj leleplehyaj ihi,

nech'e äp pitsaje lepak

tä häpe pelhay t'ajnhayaj.

₅Dios ipitsente t'ajnhayaj chos tä äytaji,

wet äp yenwethä m'ayhay

tä n'aiselkathen tä kay'atäfwelayej.

₆Ichätyen honhate fwiy'et,

wet äp yäm äytaji pelhay

tä nichätpejpe honhat.

₇Ilehtej ayej wichi lechumet,

häpkhilek lhamel ihanej

tä lham t'at tä pelhay Lewuk.

₈Itshätäy y'uchehen lewhay,

wet häpkhilek nemhit n'älwethä ayej.

₉Tälh tapinhiye pelhay tä yafwuteji,

tälh tafwojyhiye leyalh tä techäji.

₁₀Dios leyalh tä yäm t'un fwiy'et,

wet inät tä tseschephä techäjiche.

₁₁Dios ipumyenhi pules,

wet äp itälhtho pelhay t'ajnhayaj.

₁₂Lep ilunchufwi pule,

iwoye tä Dios ne'tek w'awulhpe honhat.

₁₃Häp tä tetso tä Dios ichene pelhay honhat,

häpkhilek itasin wichi wok hip'altsene.

₁₄“Job, lhek ch'ahuye täja,

tetshan m'ayhay tä Dios yenlhipej

tä iselkatejen wichi.

₁₅¿Hä lehanej m'ak tä Dios iwoyneje

tä iwaklhat tähestso,

lhäy'e tä hin'älit lep lhayis

tä ihipej pule?

₁₆¿Hä lehanej tä pules tä ifwuhen tä ikaphä,

täjtso hin'älit lham lehanyhayaj tä lhamya?

₁₇Am let'ohipej haw'uyis

tä nempej leyalh yafwutpe honhat.

₁₈¿Hä letach'ote Dios tä hich'enpetso pule,

wet lhäm t'un, letech'aynej chinaj?

₁₉Tä olhamel tet iwoyek oihi honatsi,

¿atsi olhämet che owoyeje Dios?

Lhek chufwen n'oyejen täjtso.

₂₀Olham tek oyämhihoplhila.

Che oyämhoplhi, tet häp che

owat'atläk itäyhatn'o.

₂₁“N'änhiyet'a ifwala tä pules hip'o'pe.

Che yafwuthi, wet nech'e n'äley tsi ischä.

₂₂Tälh tafwojyhiye Dios leleplehyaj,

wet leniyatyaj matche tä naya.

₂₃N'aw'awulhihit'a Dios tä laj tumfwaya,

tsi matche tä lakhajyhayaj ihi

wet äp is alhoho, hach'atkantsajit'a.

₂₄Häp tä tamenej tä wichi nowaye,

wet lham itihit'a lhamhi elh

tä fwetaj häpe ahantsaj.”