Dios tahuyej Job
1Lhawuk nech'e tahuyej Job tä ihi pelhay tä yafwuteji, wet yok:
2“¿Atsi tä ahäpe
tä letatayejlä ochumtes
häp ämtes tä laj lehanyhayaja?
3Awaklhat, akhajyen,
wet chulh n'oho tä oty'ätshan ameje m'ak.
Dios itichunyenche Job tä lham t'at tä yenlhi p'ante honhat lhäy'e awalak
4“¿Chi p'ante lhehi tä nech'e oyenlhi honhat?
¡Fwel n'oho che matche tä lehanej!
5¿Atsi tä hiw'awlhatej lakaw'awlhanhat,
wet atsi tä lhayen lhetekayej tähestso?
¿Hä lehanej?
6¿Atsi m'ak tä iti'pe,
wet äp atsi tä iti'pe tunte tä hit'unteji?
7Täjte owoynejetso,
wet kates lhokwetas ichoywethä
wet okawos tä pule lheley
t'änwethä tä lakäjyaj ihi.
8“Täjte awalak tälho honhat lechowej,
¿atsi tä itihi lepel häpkhilek itsokpej?
9Olham tä okäfwelejlhi pules,
wet onayhtejpe honataj
tä wuj tä tach'opwayhen.
10Owo lepeseya awalak lhayis,
wet otihi lepel lechal tä hit'unthiche.
11Otahuyej tä yok,
Akapes t'at tä lhehi, yej tefwaype.
Wet okasthaynhen inät lelhuy tä wustas.
Dios yen lhämeta ifwala tä nech'e n'älpe honhat, lhäy'e honatsi, lhäy'e n'op'itseyhay lew'et
12“¿Hä am tä lene'tek n'älhajpetso
wet lene'tek inuphä ifwala,
13häpkhilek ihutunpe honhat
wet wichi tä ni'isahen lhaiskatwethä?
14Wet nech'e n'äl m'ak tä tumejlä,
tet iwoye m'ak tä n'opakek.
15Wichi tä ni'isahen nemhit honatsi hip'o'pe lakeyis,
wet takweyey nemhit takhajayhen.
16“¿Hä lehoye n'aji awalakch'oye
wet letetshan lhipey tä inät tälho?
17¿Hä lew'en n'aji lepel
tä n'ot'ilek tä tanhoch'ay
lhäy'e honataj tä ichalaj?
18¿Hä lehanej t'at tä tsajphä honhat?
¡Che matche tä lehanej nilhokej tähestso,
wet fwel n'oho!
19“¿Hä lehanej chi tälhe
isi lhäy'e honatsi,
wet len'äyij tä tataye lew'etes?
20¿Hä lehanej tä lechätyene lhamel
lhip tä tiyäjchepej
wet äp tapilepej lhip tä yen w'eta?
21¡Lehanej t'at tsi lefwetaj wuj aka ifwalas,
letälhettsiy tä lhewche!
Dios häpe pule Lewuk
22“¿Hä lehoye n'aji lhip tä oyen w'eta
fwiy'et lhäy'e kalatu
23tä otsäype wichi tä iwo laka'tshayaja?
24¿Atsi len'äyij tä inukwe isi,
wet leyalh lhayis tä lhaiwelnhatpe honhat?
25¿Atsi tä ifwoyenlä inät
häpkhilek nitsäyhchä,
wet ipäyenche len'äyij
26häpkhilek iwomhihchä ts'anis
lhäy'e lhipey tä wichi newahi,
27häpkhilek nitsäype honhat tä niw'atshana
wet nech'e tälh hon'al?
28¿Atsi tä häpe pelhay lajcha?
¿Atsi tä häpe iyas lajcha?
29¿Atsi tä tälho fwiy'et tä t'un?
30Inät lhaitech'aynej tunte tä t'un,
wet yäm techäj nilhok awalak tä tsajphä.
31“¿Hä am tä lehutwek katetsel tä ichehen
wet lew'enhat iyhäj tä lhaknhutawek?
32¿Hä am tä lewo lewhäya
kates lhokwetaj tä inuphä,
lhäy'e katetsel tä tumej tafwojyhiye?
33¿Hä letäfwelej pule lheley lechumyaj?
¿Hä letech'aynej honhat lechumyaj?
34“¿Hä lekalhi tä lesukun pules
häpkhilek yäm wuj inät tä itsäy atape?
35¿Hä lekalhi tä lechen lep lhayis
wet äp iwoye m'ak tä lene'tek iwoye?
36¿Atsi tä hiw'enho lehanyhayaj kalapp'i,
wet hiw'enho lehanyhayaj ho'o?
37¿Atsi tä ihanej chitefwas pules tä iche,
wet itsäyhchä inät tä tälho,
38häpkhilek honhat lhayen iyhäta
wet satejen itshatas?
Dios yen lhämeta itshätäy lhäy'e afwenchey
39“¿Hä ahäpe elh tä tachowalhanlhi
häpkhilek lechunhen t'owalhaj lhäy'e leles,
40tä ihi lhip tä weskatho
tä iniwhihlä lelänek?
41¿Atsi tä hiw'enho lhäk tsetwos
tä leles y'iphen tä nichuyuhen
wet t'alhej n'oye m'ak che isej?
