Jos 1

₁Tä ileyej p'ante honhat Lhawuk lakawo Moisés, Lhawuk tahuyej Nun lhäs Josué tä häpe Moisés lech'otfwa, wet yok:

₂–Tä okawo Moisés ileyej honhat, athana akhajyen wet istho tewok tä Jordán, lhäy'e nilhokej wichi tä Israel leles, wet hoye honhat tä ow'en amhohen. ₃Mälhyej tä pajche ofwenho Moisés tä oyok, “Nilhokej honhat chik amel let'äspe ow'enla amhohen, ₄tälhe ts'anis tä tumej tapinhiye yäk chenhas tä Líbano tä tumej tafwojhiye, wet tälhe tewokitaj tä lhey Éufrates tä tumej tä ifwala tälhche, yäk nichäte lewomekitaj tä tumej tä ifwala y'uy. Häte ow'enla amhohen Het lhayis laka honhat tä imälhewek. Nilhokej honhatestso alewuhuyla.”

₅“Wet nehit katsik ikalhla amhi nilhokej ifwalas tä kamaj leläy. Wet olham oihla amej mälhyej tä oiyejte Moisés. Olehit'ala amej wet tek oaiwomla. ₆Akhajyen wet otle t'unhat. Amlak lew'enhomche honhat häp wichina, tsi häpe t'at m'ak tä lewuk lhamel tä ofwenho p'ante letetsel. ₇Mat oyachajo tä oyok, Akhajyen wet wuj tä otle t'unhat. Äm kalelhäj tä lewoye nilhokej olhämtes tä okawo Moisés hiw'en amho, tälhe elh tä ichun yäk nichäte elh tä lepese, häpkhilek ispej alhoho han'äyij. ₈Yej leyej tä lhenpej ämeta m'ak tä yäme. Wet en atichunhayaja tä ifwala lhäy'e tä honatsi, häpkhilek lewoye t'at m'ak tä ne'tek õ'woye, wet häpkhilek matche tä ais alhoho.

₉“Olham tä one'tek alekhajyen wet otle t'unhat. Yej noway wet yej t'ayhatchä akhajyhayaj, tsi olham ohäpe Awuk Dios. Lhip chik lenukwe oihla amej.”

₁₀Wet Josué nech'e ifwenhomche häp hin'ol tä iyhäj kaniyatey wet yok:

₁₁–Hoye nilhokej wichi wet oyaykwe, “Waklhatay amel äk. Tsi chik tres ifwalas nilhokej n'amel y'isthihola tewok tä Jordán, yämthilek y'atiyäjo honhat tä Lhawuk Dios hiw'enla n'amhohen wet y'en lhaw'eta.”

₁₂Häte Josué tahuyej Rubén laka wichi lhäy'e Gad laka wichi, lhäy'e lechowej Manasés laka wichi, wet yok:

₁₃–Tichunache m'ak tä Lhawuk lakawo Moisés ne'tek lewoyaye, tä ifwelte amhohen tä Lhawuk Dios hiw'enla amhohen häp honhatna tä tumej Jordán lhipna, yämthilek lhehi t'at wet atamsekis ihi. ₁₄Tä mälhyejtso, n'äy kana nilhokej amel aka'tsinhay, lhäy'e ales, lhäy'e aläy, tä ihi honhatna tä Moisés pajche hiw'en amhohen. Mat nilhokej hin'ol tä takhajayhen yämthilek iwo ka'tshayaja, is chik tachuma laka'tshayajchal wet ichunch'oye häp lepuhfwas wet tach'ote, ₁₅yäk nichäte ifwala tä lhamel lhayen lewuhuya honhat tä Lhawuk Dios hiw'enho lhamel, wet ihi t'at wet letamsekis ihi, mälhyej iwoye amel. Wet nech'e amel letapinhiyela aka honhates tä tumej tewok lhip elhna, tä kalelhäj tä alewuhuy t'at, häp honhat tä Lhawuk lakawo Moisés pajche hiw'en amhohen.

₁₆Lhamel nichulho Josué wet yok:

–Olhamel owohiyela nilhokej m'ak chik lene'tek owoye, wet lhip chik lene'tek olhamel ohoye, ohohiyela. ₁₇Olhamel olehiyejt'a tä owohiyepeja ämet, mälhyej tä olhamel owoyepmhaji Moisés lhämet. Wet is chik Lhawuk Dios i'amej, mälhyej tä iyej mhaji Moisés. ₁₈Elh chik niwoyaye m'ak at chik häpe chik lene'tek õ'woye, is chik õ'län. Wet am, ¡akhajyen wet otle t'unhat!