Jos 2

₁Tä Israel lhayis ihi p'ante Sitim, Josué iweskatshayentshi täkwfwas hin'ol tä ichen, wet tahuyej tä yok:

–Mähen, tetshan honhat, lhäy'e hupuy tä Jericó.

Lhamel yikhen, tä nichäte Jericó wet tiyäjo. Wet nichäte atsinha tä kain'oyaj länek tä lhey Rahab lew'et, wet iyej t'at honatsitso. ₂Matkat iche elh tä iwo silätaye häp Jericó laka niyat wet yok:

–Athana näm kana iyhäj Israel lhayis tä itetshan häp honhat, wet iyej atsinha tä lhey Rahab lew'et.

₃Tä mälhyejtso, niyat iwo chenekaye Rahab wet yok:

–Tonphä hin'ol tä õyäme tä ihi haw'et, tsi lhamel nämhen häp tä iyahinlhi honhat.

₄Mat atsinha pajche iskat Josué kachenhay. Wet nichulho niyat kahin'ol wet yok:

–Matche, ichenaj hin'ol tä näme ow'et. Mat ohanhiyejt'a lhip tä tälhe. ₅Wet tä ifwala y'uy tä kamaj õknip'oyahi hupuy lepe, lhamel yikhen, mat ohanhiyejt'a lhip tä ihoye. Mat chik amel lekelch'oye tä let'uyaykwe, lefwitla lhamel.

₆Matkat atsinhatso pajche tahuyej Josué kachenhay wet yok:

–W'ulhpe hup lhip tä tumphä.

Wet iche wuj häp m'ak tä lhey lino tä õ'nayhthomche tä i'pe tä õhch'en yämthilek tamchäy. Wet häp tä lhamel y'uyho.

₇Wet niyat kasip'äl yikhen tä fwetaj t'ukwe, wet tä yikch'oye hupuy õhp'ohi lepe. Wet lhamel inukwe len'äyij yäk nichäte Jordán lhip tä n'olhijtshanw'et.

₈Tä kamaj nimäyahen häp Josué kachenhaytso, Rahab ihoye lhamel wet tahuyej tä yok:

₉–Ohanej tä Awuk Dios hiw'en amhohen honhatna, tsi olhamel wuj tä onoway amehen. Nilhokej wichi tä ihi honhat y'ilejen lenowayhyaj. ₁₀Olhamel ohanej, tä amel lhekaych'oye p'ante Egipto, Awuk Dios y'imhat Lewomekchät, wet tamchäy t'at tä lenuyaykwe. Häte olhamel ohanej tä amel letäyhat häp Amorreo lhayis kaniyatey tä lheyis Sehón lhäy'e Og tä tumej Jordán lhip elh. ₁₁Tä olhamel ohanej tähestso, lhäy'e lhip tä onowayhen, wet newache wichi tä lakhajyhayaj ihi yämthilek tatay ahilä. Tsi Awuk Dios häpe t'at Dios tä pule lhäy'e honhat Lewuk. ₁₂Wet häp tä tamenej tä ot'alh amehen athana chik let'unhatche n'oyej ämet, häp tä isej Awuk Dios, wet lep'altsenhihena opuhfwas mälhyej tä olham oahip'altsenhen amel. W'en n'oho atetnek häpkhilek ohanej tä matche t'at ämet chik lewohiyeja n'oye, ₁₃wet tek lelänhihena ojcha lhäy'e oko, lhäy'e opuhfwas tä hin'ol lhäy'e tä atsinhay, lhäy'e nilhokej leles. ¡Fwayhat n'ohen!

₁₄Hin'ol nichulho atsinha wet yok:

–Chik kafwelaho elh chik häpe m'ak tä olhamel owoyena, ofwayhthila nilhokej amel. Mat chik n'am mathiche, is chik olhamel Owuk Dios ilän n'ohen. Chik lham hiw'enla n'ohohen häp honhatna, olhamel ot'amajila amejen, wet owohiyeja amehen m'ak tä is alhoho.

₁₅Tä lhamel ileyej tä iwoyetso, wet Rahab t'ukwe niyäkw yämthilek itälhetche laka ventana wet iti honhate lhamel. Tsi lewukwe i'pe n'olafwek tä ilunej hupuy. ₁₆Wet ifwenho lhamel tä yok:

–Mähen, hoye chenhas, häpkhilek akniw'ena sip'älis tä t'u amchehen. Eyayhila yäk tres ifwalas, w'awulhiyejak tapilche alhoho lhamel. Wet nech'e lhekhihena chik lhäpilche han'äyij.

₁₇Wet Josué kachenhay nichulho atsinha wet yok:

–Olhamel oyämla matche olhämet tä ot'unhatche amej. ₁₈Mat chik olhamel otiyäjo honhatna, is chik lefwuhthilhi aka ventana tä letälhetche olhamel häp niyäkw tä ichät. Wet is chik ajcha lhäy'e ako, lhäy'e apuhfwas, lhäy'e nilhokej ajcha lepuhfwas, lhäy'e ako lepuhfwas, ihi t'at häp awukwena. ₁₉Mat häp elh chik yikhilach'oye, lhamlak tamen lhamej chik õ'län, häpkhit'ala olhamel chik otmenej. Mat chik iche elh olhamel chik iwit'äyen elh chik häpe tä ihi haw'etna, olhamenlak owit'äyhyaj in'oyejen. ₂₀Wet chik am lefwenho elh chik häpe m'ak tä owoyena, olhamel nemla oyäm matche olhämet tä ot'unhatche amej, mälhhiyejat chik kamatache.

₂₁Wet atsinha nichulho lhamel wet yok:

–Is t'at.

Wet nech'e tachuma niyäkw wet itsokyenej weihalha wet itälhetche laka ventana wet iti honhate. Wet äp iwoyneje elh, wet lhamel yikhen. Wet nech'e atsinha yäytej ventana häp niyäkw tä ichät.

₂₂Wet hin'oltso yikhen tä ihoye chenhas, wet ihi tä lhaiskathen yäk tres ifwalas. Wet sip'älis ilunpehen honhat tä fwetaj t'ukwe, mat hiw'enhit'a. Tä lepese lhamel yäple Jericó. ₂₃Wet nech'e hin'ol inukwehchä tä tälhpe chenhas, wet yistho tewok Jordán wet yäple Josué. Wet ifwenho nilhokej m'ayhay ₂₄wet yok:

–Matche tä Lhawuk itihi t'at lhakweyey nilhokej häp honhattso. Wichi tä ihi y'ilejen lenowayhyaj tä noway n'amehen.