Israel lhayis ikalhi hupuy tä tumej Canaán lhip tä tafwojhiye
1Tä Jabín, niyat tä ihi Hasor, ihanch'oye nilhokej m'ak tä Israel lhayis iwoye, lham ichene laka silätwos häp Jobab, niyat tä ihi Madón, lhäy'e niyat tä ihi Simrón, lhäy'e elh tä ihi Aksaf, 2lhäy'e niyatey tä iche chenhas tä tumej tafwojhiye, lhäy'e tä ihi honhat tä ifwache tewok Jordán, häp honhat tä tumej Kineret lhip tä tumej tapinhiye, lhäy'e tä ihi honhates tä w'awulhchä, lhäy'e iyhäj tä tott'aye hupuy tä Dor tä tumej kaphä. 3Häte ichene lhämet häp Canaán lhayis tä tumej kaphä lhäy'e tä tumej hichä, lhäy'e Amorreo lhayis, Het lhayis, Ferez lhayis, Jebús lhayis tä iche chenhas, lhäy'e Hiv lhayis tä iwhäye chenaj tä Hermón tä ihi honhat tä lhey Mispa.
4Wet tä nilhokej niyateyna iläte Jabín lhämet, lhamel yikhen, lhäy'e laka nifwotas tä lhäy'e lhip tä wujpey, hätet iwoye holo tä iwhäye tewok. Wet wujpey kaletas tä n'oka'tshayajchal tä ichäj, lhäy'e yel'atas. 5Nilhokej lhamel lhaip'ajtitwek wet iwo lew'etawhäye inät tä ihi Merom, yämthilek inuye Israel lhayis.
6Mat Lhawuk ifwenho Josué wet yok:
–Yej nowaye lhamel. Tsi chik fwala, chik fwala ihi tä ihitsi, nilhokej lhamel lep'itseyhayla t'at tä ihi tä amel letatache. Chik mälhyejtso, näk'äsena yel'atas takäläy wet wunhomchela kaletas.
7Wet Josué lhäy'e nilhokej laka nifwotaj lhamel iselkat tä inuye letayhfwas tä iwhäye inät tä ihi Merom, 8wet Lhawuk tach'ote Israel lhayis yämthilek ikalhi lhamel. Israel lhayis inuye wet takähännhej yäk nichäte hupuy tä wuj tä lhey Sidón, lhäy'e Misrefot-maim. Häte yäk nichäte honhat tä w'awulhchä tä lhey Mispa tä tumej hichä. Wet nilhokej y'inhen, niwohit elh chik imälhehi. 9Wet Josué iwoye m'ak tä Lhawuk ne'tek iwoye, inäksen yel'atas takäläy wet iwunhomche kaletas.
10-11Wet nech'e tapilejpe häp hupuy tä lhey Hasor tä laka niyat t'äne nilhokej iyhäj niyatey yämthilek lhaip'ajtej häp lham. Wet Israel lhayis ilän niyattso tä ihi lhäy'e wichi. Itäyhthen nilhokej wet iwunho hupuy. 12Wet häp wichi tä lhamel lhaip'ajtej, Israel lhayis iwasthiche laka hupuy wet iwunhomche, wet ilänhen niyatey tä ihiche, mälhyej tä Lhawuk lakawo Moisés ne'tep'antek lhamel iwoyeje. 13Mat niwohit elh hupuy tä i'pe chenhas chik Israel lhayis iwunho, ts'ilak Hasor. 14Wet ilänhen nilhokej wichi tä ihiche hupuytso, niwohit elh chik imälhehi. Wet Israel lhayis tachuma nilhokej m'ak tä ihi, lhäy'e itshätäy.
Josué iwoye m'ak tä Moisés ne'tep'antek iwoye
15Lhawuk pajche ifwenho Moisés m'ak tä is chik iwoye, wet Moisés yachaje Josué. Wet lham Josué iwoye nilhokej, niwohit elh chik imälhetchäk niwoyaye. 16Josué ikalhi mälhewek häp honhattso: häp lhip tä chenhas, lhäy'e mälhewek ts'anis tä Négueb, lhäy'e nilhok honhat tä Gosén, wet häp honhat tä ifwache tewok Jordán, lhäy'e nilhok chenhas, lhäy'e honhates tä w'awulhchä. 17Josué ikalhi nilhokej niyatey tä ihiche honhatestso, tälhe chenaj tä lhey Halak tä tataye Seír, yäk nichäte Ba'algad, häp honhat tä ihi Líbano tä iwhäye chenaj tä Hermón. 18Pitaj lewhäy tä iwo ka'tshayajayej lhamel, pajtha ilänhen. 19Tajlhama wichi tä Hiv lhayis tä lew'et Gabaón tä lhaip'ajtej Israel lhayis. Mat nilhokej wichi iyhäj Israel lhayis ilänhen. 20Tsi Lhawuk hit'unthen lehusey wet häp tä fwetaj tatayhlä häp Israel lhayis, yämthilek Israel lhayis itäyhat nilhokej wet itihiyejt'a lep'altsenyaj, mälhyej tä pajche Lhawuk ifwenho p'ante Moisés.
21Häte Josué iwasthiche wichi tä lhey Anak lhayis lew'etes tä häpe Hebrón, Debir lhäy'e Anab, lhäy'e iyhäj lhamel lew'etes tä ihiche chenhas tä ihi Judá lhäy'e Israel. 22Häp wichitso häpehen gigante tä lhey p'ante Anak tä leles. Mat Israel lhayis ihämtej wet niwohit elh chik imälhehi. Tajlhama iyhäj tä ihi hupuy tä Gaza lhäy'e Gat lhäy'e Asdod, häp tä imälhehi.
23Tä mälhyejtso, Josué ikalhi mälhewek honhat, mälhyej tä Lhawuk ifwenho p'ante Moisés. Wet nech'e hiw'enhatejen Israel lhayis häp honhates yämthilek lhayen lewuhuya. Tä tajyäme täjtso, letamsek ihi t'at wichi.
