Jos 19

₁Häp honhat tä õtajej Simeón kawichi ilech'oye honhat tä lewuk Judá kawichi. ₂Wet hupuy tä ihi lheyis Beerseba, Seba, Molada, ₃M'awow'et, Bala, N'otkhajay, ₄Eltolad, Betul, N'otäyhyaj, ₅Siklag, Kaletasw'et, Yel'atajw'et, ₆T'owalhasw'et, lhäy'e Saruhén. Nilhokej hupuyna iche trece, tek õ'thatlä wichi lew'etes tä tott'ahomche.

₇Wet hupuy iyhäj tä äp õtajej lhamel häpehen tähesna: En-rimón, Eter lhäy'e Tutsey, lhäy'e wichi lew'etes tä tott'ahomche, ₈lhäy'e iyhäj pajtha nichäte N'opek Wuk Tsinha tä häpe hupuy tä Ramat tä ihi ts'anis tä Négueb. Häp tähestso honhates tä õhw'enho Simeón kawichi. ₉Ilech'oye honhat tä lewuk Judá kawichi. Tsi Judá kawichi wuj honhat tä õtajej lhamel, wet häp tä tamenej tä õhw'enho lhip häp Simeón kawichi.

₁₀Häp honhat tä õtajej Zabulón kawichi häp täja: Línea tä tumej tapinhiye nichäte hupuy tä Sarid, ₁₁tälhe täja tiyäjche tä kaphä pajtha nichäte Marala. Tälhe täja tataye Dabeset, lhäy'e äp tewok lhäsaj tä tumejlä Jokneam wet lepes. ₁₂Wet líneatso tälhe Sarid wet tiyäjche tä hichä pajtha nichäte Kislot-tabor. Tälhe täja wet inukwe tä Daberat wet ihoye Talepleyhi. ₁₃Tälhe täja wet tiyäjche tä hichä wet tiyäje Gat-hefer. Wet inukwe tä Ita-kasín, wet nichäte Rimón wet hits'ulhakej Nea. ₁₄Wet línea tä tumej tafwojhiye tiyäje Hanatón, wet lepes häpe lakawayhi tä lhey Jefté-el. ₁₅Wet iche doce hupuy lhayis tä ihi honhattso lhäy'e lew'etesas tä tott'ahomche. Wet iyhäj lheyis Kalat, Nahalal, Simrón, Idala lhäy'e Belén.

₁₆Häp täjtso häp honhat tä õtajej Zabulón kawichi, hupuy lhäy'e wichi lew'etesas tä tott'ahomche.

₁₇Häp honhat tä õtajej Isacar kawichi, ₁₈iche hupuy tä lheyis Jezreel, Kesulot, Sunem, ₁₉Chowhay, Sihón, Anaharat, ₂₀Rabit, Äytaj, Ebes, ₂₁Remet, Inät Lafwey, Inät Wäk, lhäy'e Hup Chofwaj. ₂₂Wet línea nichäte chenaj tä lhey Tabor, lhäy'e hupuy tä Sahasima lhäy'e Fwala Wukwe, wet lepes tewok Jordán. Nilhokej hupuyna iche dieciséis, tek õ'thatlä wichi lew'etes tä tott'ahomche.

₂₃Häp täjtso häp honhat tä õtajej Isacar kawichi, hupuy lhäy'e wichi lew'etes tä tott'ahomche.

₂₄Häp honhat tä õtajej Aser kawichi, ₂₅iche hupuy tä lheyis Yachuyajw'et, Halí, Betén, Aksaf, ₂₆Niyat Kahl'ä, Amad lhäy'e T'alhyaj. Wet lhip tä tumej kaphä nichäte chenaj tä lhey Carmelo lhäy'e hupuy tä Tewok Pelaj. ₂₇Wet línea tä tumej hichä tiyäjche tä tafwojhiye pajtha nichäte Dagónw'et. Taj t'at honhat tä lewuk Zabulón kawichi, wet inukwe lakawayhi tä lhey Jefté-el, lhäy'e Bet-emek, lhäy'e Neyel. Tälhe täja tiyäj w'echehi hupuy tä lhey Ts'ani. ₂₈Tä mälhyejtso, honhates tä ilech'oye häpe Abdón, Alhotaj, Ts'ifwik Chayohi, lhäy'e Kaná, wet lepes hupuy tä wuj tä lhey Sidón. ₂₉Wet línea tälhe täja wet yäple Ramá pajtha nichäte hupuy tä lhey Tiro, häp hupuy tä lhäy'e lhip tä takhajay. Wet tiyäje Hosa yäk nichäte lewomekitaj Mediterráneo. Wet hupuy tä hap'akej häpe Mahaleb, Akzib, ₃₀Uma, N'olafwek, Alhotaj, lhäy'e iyhäj hupuy. Nilhokej hupuyna iche veintidós, tek õ'thatlä wichi lew'etes tä tott'ahomche.

₃₁Häp täjtso häp honhat tä õtajej Aser kawichi.

₃₂Häp honhat tä õtajej Neftalí kawichi ₃₃tälhe hupuy tä Helef lhäy'e hal'ätaj tä ihi Saananim. Wet inukwe Honhat Toy lhäy'e Jabneel pajtha nichäte Lakum, wet lepes tewok Jordán. ₃₄Wet línea tä tumej kaphä tiyäjche hupuy tä Aznot-tabor, tälhe täja tiyäje lhip tä lhey Hukok. Wet línea tä lepes Neftalí kahonhat nekche honhat tä Aser tumej kaphä wet Zabulón tumej tapinhiye, wet tewok Jordán tumej hichä. ₃₅Wet hupuy tä wuj tä takhajayhen tä õtajej lhamel häpe tähesna: Sidim, Zer, Ts'ifwik Chayohi, Rakat, Kineret, ₃₆Honhatil, Ramá, Hasor, ₃₇Kadés, Edrey, Inät Wukwey, ₃₈Irón, Migdal-el, Horem, Bet-anat, lhäy'e Fwala Wukwe. Nilhokej hupuyna iche diecinueve, tek õ'thatlä wichi lew'etes tä tott'ahomche.

₃₉Häp täjtso häp honhat tä õtajej Neftalí kawichi.

₄₀Häp honhat tä õtajej Dan kawichi, ₄₁iche hupuy tä lheyis Sora, Estaol, Fwalaw'etes, ₄₂M'awow'et, Ajalón, Jetla, ₄₃Elón, Timnat, Ekrón, ₄₄Elteke, Gibetón, Ba'alat, ₄₅Jehúd, Lep, Gat-rimón, ₄₆Mejarkón, Rakón, lhäy'e honhat tä tatayhlä Jope.

₄₇Matkat tä paj tä nem laka honhat ihi, häp tä lhamel yikhen tä inuye hupuy tä lhey Lesem. Wet ilänhen wichi tä ihi, wet lhayen lewuhuya häp hupuytso wet yen lew'eta. Wet nech'e lhamel yen lheya Dan, tsi yen tichunhayaja häp letes p'ante lhey Dan.

₄₈Häp täjtso häp honhat tä õtajej Dan kawichi, hupuy lhäy'e wichi lew'etesas tä tott'ahomche.

₄₉Tä nojphä wichi tä wusche'pe tä õhw'enhomche honhates yämthilek lhayen lewuhuya, nech'e õhw'enho Josué häp honhat tä lewuk tä ihi t'at Israel lhayis kahonhates. ₅₀Mälhyej tä Lhawuk ne'tek lhamel iwoye, wet häp tä hiw'enho Josué häp hupuy tä lham pajche t'alhe, tä häpe t'at Timnat-sera tä ihi chenhas tä ihi honhat tä lewuk Efraín kawichi. Wet lham inech'aynhi hupuy tä ihi wet yen lew'eta.

₅₁Eh, wet häp p'ante tähestso honhates tä sacerdote Eleazar, lhäy'e Josué, lhäy'e Israel lhayis kaniyatey, hiw'enhatejen häp wichi tä wusche'pe tä ihi tä Lhawuk tatache tä ihi lepe carpa tä Dios lew'et tä lhamel ihi Silo. Wet tajlhame.