Jos 18

₁Nilhokej Israel lhayis lhaihuthiwek hupuy tä lhey Silo yämthilek itshänchä carpa tä Dios lew'et. Wet honhat pajche lhamel ikalhi t'at, ₂mat kamaj iche wichi tä tälhehen siete letetsel tä kamaj imälhehi tä õkniw'enaho honhates tä lewuk lhamel.

₃Tä mälhyejtso, Josué tahuyej Israel lhayis wet yok:

–¿Atsi m'ak tä lenihich'oye amel tä katachumaye honhates tä Lhawuk, amel atetsel laka Dios, yachaj amehen? ₄Tä mälhyejtso, nilhokej amel iyhäjpej tä laka niyat w'enha lhamej, is chik itshupyene trespej hin'ol tä iyej lhamel wet is chik ihän n'oye. Olham ochenhiyela nilhokpe honhat yämthilek lhamel itetshan wet ifwel n'oho, häpkhilek ohanej m'ak tä iche wet ow'en amhomche. ₅Hin'olna is chik itihi siete lhipey honhat tä hich'esajen. Mat yej tiyäjo Judá kahonhat tä tumej tapinhiye, lhäy'e honhat tä tumej tafwojhiye tä lewuk José leles. ₆Wet chik wak'alh tä lhamel hich'esajen honhat siete lhipey, is chik ihän n'oye lelesaynek yämthilek owo sorteaya tä ihi tä Lhawuk Dios tatache, häpkhilek kalelhäj wichipej chik õtajej honhat lhip tä lewuk. ₇Mat ihichet'a honhat lhip chik õhw'enho häp Leví lhayis. Tsi m'ak tä õtajej lhamel häpe t'at tä häpehen Lhawuk laka sacerdotes. Wet häp Gad kawichi, lhäy'e Rubén kawichi, lhäy'e lechowej Manasés kawichi, lhamel pajche ikatej honhat tä tumej Jordán lhip tä hichä, tä Lhawuk lakawo Moisés hiw'enhohte lhamel.

₈Tä mälhyejtso, yikhen hin'ol tä hich'esajen honhat. Wet Josué ifwenho lhamel wet yok:

–Mäyay nukwe honhat, wet w'awlhatej t'at wichi tä lech'esajen honhat. Wet chik wak'alh, häna n'oye yämthilek olham owohla sorteaya kana Silo tä ihi tä Lhawuk tatache.

₉Wet hin'oltso yikhen wet ilunche imälhewek honhat. Wet tä iche wichi tä tälhehen siete letetsel, lhamel hiw'awlhatej t'at hupuy tä hiw'enhatejen, wet ilesayen lheyis hupuy tä yachajepej iyhäj tä w'enha lhamej. Tä wak'alh, lhamel yäple Josué tä ihi Silo. ₁₀Wet Josué iwo sorteaya häp honhat lhipey tä ihi tä Lhawuk tatache, häpkhilek kalelhäj wichipej chik õtajej honhat lhip tä lewuk.

₁₁Häp honhat tä õtajej Benjamín laka wichi, Judá laka honhat tumej lhip elh wet José laka honhat tumej lhip elh. Tä mälhyejtso, ihi lechowej. ₁₂Wet häp lhip tä tumej tafwojhiye, línea tälhe tewok Jordán wet tiyäjche Jericó lhip tä tumej tafwojhiye. Tälhe täja ifwache chenhas wet tiyäjche tä kaphä, yäk nichäte honhat tä ts'anis tä tott'aye hupuy tä lhey N'omukwehyajw'et. ₁₃Tälhe täja tiyäjche hupuy tä lhey Luz (wok oyok, Betel) lhip tä tumej tapinhiye. Wet inuhihchä Atarot-adar tä ihi chenaj tä tumej Bet-horón lhip tä tumchä tä tumej tapinhiye. ₁₄Wet líneatso tälhe chenajtso lhip tä tumej kaphä, wet inukwe lhip tä tumej tapinhiye yäk nichäte hupuy tä Kiriat-ba'al, tä äp lhey elh Kiriat-jearim, tä lewuk Judá kawichi. Häp täjtso häp línea tä tumej kaphä.

₁₅Wet häp línea tä tumej tapinhiye tälho t'at Kiriat-jearim lhip tä lepes pajtha nichäte inät tä ihi Neftoa. ₁₆Wet líneatso tälhe täja, ifwache chenaj tä tatayhlä honhat lhip tä lhey Ben-hinom tä ihi lakawayhi tä lhey Refaím lhip tä tumej tafwojhiye. Tälhe täja inukwe Hinom laka honhat, wet inukwe chenaj tä lhey Jebús pajtha nichäte inät tä ihi En-rogel. ₁₇Tälhe täja líneatso yäpilche tä tafwojhiye, wet inukwe Fwala Kahits'ifwik yäk nichäte Gelilot tä tatayhlä chenaj lhip tä tumejlä Honhatchät. Tälhe täja tiyäje Bohán Kachenaj. Bohán häpe Rubén lhäs p'ante. ₁₈Wet línea ifwache lhip tä tumej tafwojhiye, häp honhat tä tumejlä tewok Jordán. Wet nichäte tewoktso ₁₉wet tiyäjche tä Bet-hogla lhip tä tumej tafwojhiye. Tälhe täja nichäte Lewomekitaj Nosoy lhip tä tumej tafwojhiye, häp lhip tä tewok Jordán tajo, wet lepes línea. Häp täjtso línea tä tumej tapinhiye.

₂₀Wet tewoktso häpe t'at tä lepes häp línea tä tumej hichä.

Häp tähestso lepesey häp honhates tä õhw'enhomche Benjamín laka wichi.

₂₁Wet hupuy tä äp õtajej lhamel häpehen tähesna: Jericó, Bet-hogla, N'och'esaj, ₂₂Bet-arabá, Tson'ataj W'ole, Betel, ₂₃Avim, Pará, Ofra, ₂₄Amón Lew'et, Ofni lhäy'e Geba. Nilhokej hupuyna iche doce, tek õ'thatlä wichi lew'etes tä tott'ahomche. ₂₅Wet hap'akej häp Gabaón, Ramá, N'opekis, ₂₆Mispa, T'owalhaj, Mosá, ₂₇Rekem, Irpeel, Tarala, ₂₈Sela, Elef, Jebús (wok oyok, Jerusalén), Gabaa, lhäy'e Kiriat. Nilhokej hupuyna iche catorce, tek õ'thatlä wichi lew'etes tä tott'ahomche.

Häp täjtso honhates tä õtajej häp Benjamín laka wichi.