1Tajyäme p'ante wujpe nekchämis tälhe tä Lhawuk iwo letamsekahlä letayhfwas häp Israel lhayis. Wet Josué nech'e häpe t'at hin'o tä wuj tä hich'ut. 2Wet lham t'äne nilhokej Israel lhayis, hin'ol tä thänhäy, lhäy'e niyatey, lhäy'e hin'ol tä n'okalelhthayajwos, lhäy'e sip'äl kaniyatey. Wet tahuyej wet yok:
–Nech'e ohäpe hin'o tä och'ut t'at. Wujpey nekchämis tä otfwayej. 3Amel lew'enay t'at häp m'ak tä Lhawuk Dios iwoyeje nilhokej wichi tä fwetaj tatay ahilähen, wet lham t'at tä iwo ka'tshayaja atapehen. 4Wet ow'enhomche nilhokej amel häp honhates. Tajlhamhiyet'a honhates tä pajche amel lekalhayhi tä ow'en amhomche, mat häte honhates tä kamaj kakalhahi. Mat lekalhihila, tälhe tewok Jordán tä tumej lhip tä ifwala tälhche, pajla'tha nichäte lewomekitaj Mediterráneo tä tumej tä ifwala y'uy. 5Lhawuk Dios yokwesichephäla wichi tä lew'etes, wet amel lhenla aka honhatesa, mälhyej tä lham pajche ifwel amhohen.
6“Tä mälhyejtso, akhajyenhen tä let'amajej wet lewoye nilhokej Dios lhämet tä häpe Ley tä tälhe Moisés, tälhe elh tä ichun pajtha nichäte elh tä lepes. 7Yej alelhahtej wichi tä kahäpeya amel tä imälhehi tä i'amejen. Yej n'okwiyej lhamel laka dios lhayis wet yej alhachaje. Nits'ilakhiyet chik lewo lheya, wet yej t'untejche lheyis m'ak at chik häpe tä lewoye. 8Mat tujlhache tä let'ifwtiyej Lhawuk Dios, mälhyej tä lewoyaye ifwalas tä tajyämetso yäk athana. 9Lhawuk pajche yokwes wichi tä wuj lhäy'e tä takhajayhen tä ihi honhat tä amel lenukwe, wet yäk häp ifwalana nehit katsik ikalh amhihen. 10Wet aelh tefwajpejni ihanej tä yokwes mil wichi, tsi Lhawuk Dios lham t'at tä iwo ka'tshayaja atapehen, mälhyej tä pajche ifwel amhohen.
11“Tä mälhyejtso, huminay Lhawuk Dios. Chik lewoye täjtso, häpkhilek let'amaj amejen. 12Tsi chik leleyayej Lhawuk Dios, wet alelhahtej wichi tä kamaj imälhehi tä i'amejen, wet elhpej yen ch'efwaya laka'tsinha, 13hanayej tä Lhawuk Dios nemla yokwes wichitso. Mat hätehlat iwoye hotanaj wet ikanla amejen, wet awit'äy ihla amejen. Hätehlat iwoye n'otasnhat chik otasnejche achäyi, wet hätehlat iwoye ch'uthanil chik otasnejiche atelhoy, pajla'tha niwohit elh amel chik imälhehi honhat tä wuj tä isna tä Lhawuk Dios pajche hiw'en amhohen.
14“Athana olham otott'aye tä oy'inhila. Mat tä kamaj n'am chäte, ot'uhläk imälhewek ahusey wet imälhewek atichunhayaj tä matche tä lehanayej tä Lhawuk Dios yäm matchehen nilhokej lhämtes tä isen tä pajche p'ante ifwel. Wet niwohit elh chik imälhehchä chik kamaj niwoyaye. 15-16Mat tetshan: Tej tä imatitche nilhokej lhämtes p'ante ischehen tä ifwel, mat chik amel lenäk'äsay lhämet tä hit'unhatche amejen, häte ichätyenla atapehen nilhok awit'äyhyajay tä w'enhache lhamej, pajla'tha lenofwayej t'at tä lhehi honhat tä isna tä lham hiw'en amhohen. Chik len'okwiyayej dios lhayis tä kamatachehen, Lhawuk itihla amejen lewäk, wet yofwajkwet nofwila amel tä lheyayhi honhat tä isna tä lham hiw'en amhohen.”
