Jos 24

₁Josué ihutwek nilhokej Israel lhayis tä lhamel ihi hupuy tä Sikem. T'äne hin'ol tä thänhäy, lhäy'e niyatey, lhäy'e hin'ol tä n'okalelhthayajwos, lhäy'e sip'äl kaniyatey, wet lhamel takasthi tä Lhawuk tatache. ₂Wet Josué tahuyej lhamel wet yok:

–Lhawuk, Israel laka Dios, yok, “Amel atetsel Taré lhäy'e leles Abraham lhäy'e Nacor, pajche lhamel lew'et t'at tewokitaj tä lhey Éufrates lhip elh. Wet lhamel n'okwiyej t'at dios lhayis tä kamatachehen. ₃Wet otälhehte lew'ettso tä otchuma Abraham, wet onuhatche imälhewek honhat tä Canaán, wet oyäm wujpey leles. Wet lhäs tä ow'enho häpe t'at Isaac, ₄wet lham Isaac ow'enho leles Jacob lhäy'e Esaú. Wet Esaú häp tä ow'enho honhat tä chenhas tä lhey Seír yämthilek lewuk. Mat häp Jacob lhäy'e leles lhamel ihoye honhat tä Egipto.

₅“Tä paj ochenehte Moisés lhäy'e Aarón, wet olänejen Egipto lheley häp m'ayhay tä äyteschehen tä owoyeje lhamel, pajtha otonphä amel achätilis tä ihi honhattso. ₆Wet tä lhamel yikch'oye, wet Egipto kanifwotaj ihiche kaletas tä n'oka'tshayajchal wet iyhäj iche'pe yel'atas tä lhamel ihän, pajtha nichäte Lewomekchät. ₇Wet lhamel t'än n'oye wet otch'ote lhamel. Otumtejlä honataj häp letayhfwas wet op'oyejpe inät häp nifwotajtso. Amel lehanayej t'at m'ak tä owoyeje p'ante Egipto.

“Tä paj wujpe nekchämis tä amel lenuyaykwe ts'anis, ₈pajtha ohän amehen Amorreo lhayis kahonhat tä tumej tewok Jordán lhip tä hichä. Wet lhamel iwo laka'tshayaja amejen, mat otch'ot amehen yämthilek letäyhthen lhamel, wet alhen lewuhuya laka honhat. ₉Tä paj Balac, Sipor lhäs tä häpe Moab lhayis kaniyat, lhaikhajyen wet t'uhläk tatay ahilähen. Wet iwo chenekaye Beor lhäs tä lhey Balaam, wet ne'tek takäpfwayej amehen awit'äyhyaj. ₁₀Mat olham otch'anlhahiyet'a, wet häp tä takäpfwayej amehen m'ak tä is. Mälhyejtso m'ak tä owoye tä ofwayhthen amel.

₁₁“Tä tajyäme täjtso, amel lhistayho tewok Jordán wet lechätaye Jericó. Wet wichi tä lew'et honhattso, lhäy'e häp Amorreo lhayis, Ferez lhayis, Canaán lhayis, Het lhayis, Gerges lhayis, Hiv lhayis, lhäy'e Jebús lhayis, nilhokej wichitso iwo ka'tshayaja amejen wet tatayhlä amel. Mat olham ow'en amhohen akhajyhayaj yämthilek amel lekalhi lhamel. ₁₂Wet häp Amorreo lhayis kaniyatey täkwfwas, häpkhit'a amel chik lelänejen afwajnhates wok hach'ähal. Mat olham ochene lenowayhyaj tä wuj lhamel wet inukwe alhoho tä kamaj amel tek lechätaye. ₁₃Olham ow'en amhohen häp honhat tä yachuyajw'etes ihi tä ka'amelak enek, lhäy'e hupuy tä ka'enhaya. Athana lhenay haw'eta, wet letufway yachuyaj lhay tä amel ka'achumeta.”

₁₄Wet Josué y'isej lhämet tä yok:

–Tä mälhyejtso, yej lhenay w'et m'ayeka häp Lhawuk, mat amälhetwek tä lhen Awuka. Tiyayej kanhi achätilis laka dios lhayis tä kamatachehen tä i'amejen, tä lhamel n'okwiyej p'ante tä ihi tewokitaj Éufrates lhip elh, lhäy'e tä äp ihi Egipto. En häpeya aka Dios Lhawuk.

₁₅“Mat chik lhämayek ni'isa chik lhenay häpeya aka Dios Lhawuk, kalelhät athana elh tä lhenayhla awuka. Häpe p'iya dios lhayis p'ante atetsel n'okwiyej tä lhamel ihi tewokitaj Éufrates lhip elh, wok häpe dios lhayis tä Amorreo lhayis tä ihi honhatna n'okwiyej. Mat olham, lhäy'e ow'et lheley, olhamel oyen häpeya oka Dios Lhawuk.”

₁₆Wichi nichulho wet yok:

–¡Olhamel olehiyejt'a Lhawuk, wet tek oyenla owuhuya dios lhayis tä w'enha lhamej! ₁₇Tsi Lhawuk tä itonphä p'ante olhamel ojchalis tä lhamel ihi p'ante Egipto tä wichi tä lew'et honhattso yen kwenkaya lhamel. Wet olhamel ohanej t'at m'ayhay tä lham iwoye tä lhamel isej. Wet tä äp olhamel onukwe on'äyij, lham t'u n'oyehen wet ifwayhat n'oyejen otayhfwas. ₁₈Yokwes nilhokej wichi tä ihi tä olhamel onukwe, lhäy'e Amorreo lhayis tä lew'et honhatna. Tä mälhyejtso, häte olhamel on'okwihiyeja lham Lhawuk, tsi lham häpe olhamel oka Dios.

₁₉Mat Josué tahuyej lhamel wet yok:

–Amel lekalhihit'alak lefwetajay lhenla häpeya aka Dios Lhawuk. Tsi lham häpe Dios tä n'ot'amajchet, wet matche tä y'ulhan wichi tä n'okwiyej dios lhayis iyhäj. Iteläythiyejt'a hach'isukyajay tä letatayhlä häp lham. ₂₀Chik leleyej lham wet lhen awuka dios lhayis tä w'enha lhamej, lham yachajiyeja ahilähen m'ak tä ni'isa wet aitäyhthenla. Wet aisiyejt'ala m'ak tä wuj tä is tä lham pajche iwoyej amehen.

₂₁Wichi nichulho Josué wet yok:

–Tek mälhhiyejatso. Olhamel oyenlat häpeya oka Dios Lhawuk.

₂₂Tä mälhyejtso, Josué yok:

–Amel atesla ämtestso chik ka'ämaya matche tä lhenla häpeya aka Dios Lhawuk.

Wichi nichulho Josué wet yok:

–Matche.

₂₃Wet Josué äp yok:

–Tä mälhyejtso, tiyayej kanhi nilhokej dios lhayis tä i'amejen, wet a'achajaye Lhawuk, häp Israel laka Dios.

₂₄Wichi nichulho wet yok:

–Olhamel oyenlat häpeya oka Dios Lhawuk wet owohiyela lhämtes.

₂₅Wet häp fwalatso Josué lhäy'e nilhokej wichi lhamel hit'unhatche lhämet tä iwoye tä lhamel ihi Sikem. Wet Josué hiw'enho lhamel häp Lhawuk lhämtes lhäy'e lechufwenyajay yämthilek lhamel isej, ₂₆wet ilesayen tä ihi Dios lhämtes Lehi. Wet nech'e tachuma tunte tä wuj wet ikasthayen tä ichufwi hal'ä tä iwhäye Lhawuk lew'et tä t'amajchet. ₂₇Wet tahuyej wichi wet yok:

–Häp tuntena hätet iwoyek iläte t'at m'ak tä Lhawuk ifwel n'amhohen. Tä mälhyejtso, tuntena hin'älthila amel ates chik ka'ämaya matche ämtes tä lewoyeje lhaka Dios.

₂₈Tä ileyej tähestso, nech'e Josué ichen wichi yämthilek yäpnhomche lew'etes.

₂₉Tä paj p'ante, Josué, Nun lhäs wet äp Lhawuk lakawo, ileyej honhat tä hiw'en p'ante ciento diez nekchämis. ₃₀Wet õtjänch'oye tä ihi laka honhat tä lhey Timnat-sera tä ihi chenhas tä lewuk Efraín kawichi tä tumej chenaj tä lhey Gaas lhip tä tafwojhiye. ₃₁Wet Israel lhayis ilehiyejt'a tä yen häpeya laka Dios Lhawuk häp fwalas tä Josué iläy, wet häte fwalas tä lham ileyej honhat, lhäy'e tä kamaj iläyhen hin'ol tä thänhäy tä ihanej nilhokej m'ak tä Lhawuk pajche iwoyeje Israel lhayis.

₃₂Häp José lhiley tä Israel lhayis tilhäj tä tälhe Egipto, lhamel tajänch'oye tä ihi honhat lhip tä ihi Sikem, tä Jacob ichäj p'ante tä laha cien chinaj t'äj, häp honhat tä lewuk p'ante Hamor leles. Hamor häpe hin'o p'ante lhey Sikem tä lajcha, wet tä paj p'ante honhattso nech'e lewuhuy José leles.

₃₃Wet y'il p'ante sacerdote Eleazar tä häpe Aarón lhäs. Wet õtjänch'oye lep'itsek tä ihi chenaj tä õyen p'ante lewuka lhäs tä lhey Finees, tä ihi chenhas tä lewuk Efraín kawichi.