Õtchuma doce tuntey tä tälho tewokw'et yämthilek õyenpej tichunhayaja m'ak tä Lhawuk yenlhi
1Tä nilhokej wichi nilhok ufwe, Lhawuk tahuyej Josué wet yok:
2-3–Fwenho häp doce hin'ol tä letatshupiyehen tä iyejen wichi tä tälhehen letetsel tä ihi doce, Is chik elh weihalhapej lhamel itonphä tunte tä ihi tä sacerdotes takasthi, wet tilhäje tä amel lheyayhihila honatsina.
4Tä mälhyejtso, Josué t'äne doce hin'ol tä lham tatshupiye, 5wet ifwenho tä yok:
–Hoye tewokw'et wet eyayhila tä tatache häp Arca tä N'ot'amajchet tä Lhawuk Dios lhämtes ihi. Wet elh weihalhapej amel chumela tunte wet tilhäja, yäk w'awulh amhohen doce tuntey tä atetnekej wichi tä tälhehen letetsel tä ihi doce. Wet hänayela lhakasthawet tä y'ehihila honatsina. 6Häp tunteytso itichunyenhichela Israel lhayis häp m'ak tä Dios yenlhina. Chik ifwalas tä tatay alhoho, ales lhäy'e achetsos tay'ätshanhiyejpeja wet yok, “¿Atsi m'ak tä tamenej tä õ'woyneje p'anteni häp tunteyni?” 7Wet lechulhihola lhamel, lhohlakwe, “Tä sacerdotes ihänhohte tewok tä Jordán häp Arca tä N'ot'amajchet tä Lhawuk lhämtes ihi, wet lhaich'esaj inät.” Tä mälhyejtso, Israel lhayis yenhipeja tichunhayaja m'ak tä Lhawuk iwoyej n'amehen kana.
8Wet häp hin'oltso iwoye m'ak tä Josué ne'tek lhamel iwoye. Wet lhamel tachumahen doce tuntey tä tälho tewok Jordán, wet ihäne lew'et tä lhamel ihi honatsitso, wet lhamel yenlhi mälhyej tä Lhawuk ifwenho Josué. 9Häte Josué tachuma iyhäj doce tuntey, wet iskonwek tä itihi tewokw'et tä sacerdotes takasthi tä lhamel ichäj häp Arca tä N'ot'amajchet. Wet tunteytso ifwalasna kamaj ihi t'at.
10Wet sacerdotes tä tilhäj Arca, lhamel takasthi t'at tewok lechowej pajtha wak'alh nilhokej m'ak tä Lhawuk ne'tek wichi iwoye tä Josué ifwenho lhamel, mälhyej tä Moisés ifwenho p'ante Josué yämthilek lhamel iwoye. Wichi nakelchetshi tä hap'alakpe tewok. 11Wet nech'e sacerdotestso ichunlä wichi tä yikhen, wet tilhäjlhi Arca tä N'ot'amajchet. 12Häte nifwotas tä Rubén kawichi lhäy'e Gad kawichi lhäy'e lechowej Manasés kawichi, lhamel ichunlä iyhäj tä yikhen, mälhyej tä Moisés ne'tep'antek lhamel iwoye. Wet lhamel ichäj takwelheley tä laka'tshayajchal. 13Iche cuarenta mil (40.000) lhamel tä yikhen tä ihi t'at tä Lhawuk tatache, wet ihoye honhat lhip tä w'awulhchä tä iwhäye hupuy tä Jericó. Lhamel wak'alhen yämthilek iwo laka'tshayaja.
14Wet tälhe ifwalatso Lhawuk iwujyen Josué tä ihi tä Israel lhayis tatache. Wet lhamel yen häpeya hin'o tä lewujyaj ihi, mälhyej tä iwujyen p'ante Moisés nilhokej ifwalas tä kamaj iläy.
15Wet Lhawuk tahuyej Josué wet yok:
16–Fwenho sacerdotes tä ichäj Arca tä Ot'amajchet tä olhämtes ihi, Is chik lhamel yikch'oye tewok.
17Tä mälhyejtso, Josué tahuye sacerdotes tä takasthen tä ihi tewokw'et lechowej wet yok:
–Mäyaych'oye tewok.
18Wet nech'e lhamel yikch'oye tewok. Häpet tä lhamel t'äspe ufw, wet inät yäpilwek wet yachajo tä inukwe len'äyij. Wet lhäy'e lhip tä tapoyej wet tafwache'pe letachenhas.
19Ifwala tä Israel lhayis yistho Jordán häpe ifwala diez, häp iwel'a tä ichun. Wet lhamel iwo kasthawetahi lhip tä lhey Gilgal, häp Jericó lhip tä tumej tä ifwala tälhche. 20Wet häp tä Josué itihi häp doce tuntey tä hin'ol tilhäj wet iskonwek. 21Wet tä wak'alh, nech'e tahuyej Israel lhayis wet yok:
–Häp ifwalas tä tatay alhoho, chik ales tay'ätshan amehen wet yok, “¿Atsi m'ak tä tamenej tä õ'woyneje p'anteni häp tunteyni?”, 22fwenhola lhamel, oyaylakwe, “Tä Israel lhayis yisthohte tewok Jordán, y'im t'at. 23Tsi Lhawuk Dios häp tä y'imhat, mälhyej tä y'imhat p'ante Lewomekchät tä achätilis yistho.” 24Häpkhilek nilhokej wichi tä i'pe honhat ihanhiyeja tä Lhawuk Dios wuj tä takhajay, wet amel lewujyenaypej.
