Jos 5

₁Nilhokej niyatey tä häpehen Amorreo lhayis tä tumej tewok Jordán lhip tä ifwala y'uy, lhäy'e niyatey tä Canaán lhayis tä ihi lhip tä tott'aho lewomekitaj Mediterráneo, tä lhamel ihanch'oye tä Lhawuk y'imhat tewok Jordán yämthilek Israel lhayis yistho, wet wuj tä lenowayhyaj iyej lhamel. Wet ihichet'a wichi tä lakhajyhayaj ihi yämthilek tatayhlä Israel lhayis.

₂Häp ifwalastso Lhawuk tahuyej Josué wet yok:

–Enwethä tsonhates tä tunte lhipey, wet wo atetnekayej Israel lhayis tä kamaj n'otetnek tä õyiset t'äj lhip newayej.

₃Tä mälhyejtso, Josué yenwethä tunte lhipey tä yen tsonhatesa, wet iwo lhijtsekayej hin'ol tä lhamel i'pe chenaj lhäsaj tä lhey N'olhijtsekw'et. ₄M'ak tä tamenej tä iwo lhijtsekayejwethä hin'ol, häp tä iyhäj tä pajche n'olhijtsek iyejwethä p'ante tä lhamel yikch'oye Egipto, nilhokej hin'oltso y'inhen tä lhamel inukwe honhat tä ts'anis. ₅Mat tej tä n'olhijtsek iyejwethä p'ante, mat leles tä nech'e ichehen tä lhamel nekche len'äyij, häp tä n'olhijtsek newayejwethä. ₆Tsi tä cuarenta nekchämis tä Israel lhayis iwo lew'ekyaja tä inukwe ts'anis, wet hin'ol tä thänhäy tä tälho Egipto tä pajche n'olhijtsek iyejwethä, nilhokej lhamel nofwej tä y'inhen tä inukwe ts'anis, tä niwoyaye p'ante Lhawuk lhämet. Wet häp p'ante tä Lhawuk hit'untejche lhämet lhamel wet yok:

–Amel tek lew'enla'pe häp honhat tä ofwenhohte atetsel tä oyok, “Ow'enhihola ales”, häp honhat tä t'os lhäy'e akäyek tet iwoye inät, iläfwelchehen tä ihi.

₇Tä mälhyejtso, häpe t'at lhamel leles tä Josué iwo lhijtsekayej, wok oyok, lhamel tä icheyäjo lew'et häp lajchalis tä pajche y'inhen. Tsi tä lhamel inukwe ts'anis, häp tä tamenej tä n'olhijtsek newayejwethä.

₈Wet tä nech'e nilhokej tä n'olhijtsek iyejwethä, lhamel lhay'up'at tä ihi lakasthawet pajtha nilhokej tä ichesen lhipey tä õyisthen. ₉Wet nech'e Lhawuk tahuyej Josué wet yok:

–Tälhe ifwalana tä elhpej tä n'olhijtsek iyej, nech'e oso amejen Egipto lheley läkwyhanyaj p'ante iti amejen tä ayen kwenkaya tä ahäpehen Israel lhayis.

Wet häp täjtso tä tamenej tä honhat p'ante lhamel ihi õyen lheya Gilgal, wok oyok, N'osokwek. Wet kamaj lhey iyej t'at yäk nämena.

₁₀Israel lhayis ihi p'ante Gilgal, wet häp iwel'a tä ichun, häp ifwala catorce tä honaj, lhamel yenlhi Pascua tä ihi lhip tä w'awulhchä tä iwhäye Jericó. ₁₁Tä ifwala elh nech'e lhamel tuj m'ak tä ihi honhat tä nichätho. Lhamel tuj pan tä levadura newayej lhäy'e trigo tä kamaj lakonkay tä n'otulhlhek. ₁₂Wet tälhe ifwalatso nemhit iche maná. Wet nekchämtso Israel lhayis nech'e tuj t'at m'ak tä ihi Canaán.

₁₃Fwala elh p'ante tä Josué iwhäye Jericó, wet hiw'ene hin'o tä takasit tä ihi tä tatache, wet lefwajnhat ihi t'at takwey. Josué ihoye wet tay'ätshane tä yok:

–¿Hä ahäpe elh olhamel, wok ahäpe elh olhamel otayhfwas?

₁₄Hin'otso nichulho wet yok:

–Kha. Ohäpe Lhawuk kanifwotaj kaniyat.

Tä Josué iläte, wet takhoschufwi yäk letacho taj honhat. Wet tä nephä, nech'e tay'ätshane wet yok:

–Iwuk, ¿atsi ämet tä lefwel n'oho tä akawon'o?

₁₅Wet Lhawuk kanifwotaj kaniyat nichulho wet yok:

–Lanche anisähes, tsi n'ot'amajchet tä lhehina.

Wet Josué ilanche lenisähes.