Jos 9

₁Häp niyatey tä yen lew'eta tewok tä Jordán lhip tä ifwala y'uy, lhamel ihanch'oye m'ak tä Israel lhayis iwoyeje Jericó lhäy'e hupuy tä lhey N'owastsek. Häp niyatey tä oyämetso häpehen t'at Het lhayis kaniyat, Amorreo lhayis kaniyat, Canaán lhayis kaniyat, Ferez lhayis kaniyat, Hiv lhayis kaniyat, lhäy'e Jebús lhayis kaniyat. Lhamel ihi t'at chenhas, lhäy'e häp lhip tä w'awulhchä, lhäy'e imälhewek lewomekitaj tä lhey Mediterráneo lhip yäk nichäte chenhas tä Líbano. ₂Wet nilhokej lhamel tä y'ajwek lehusey yämthilek iwo laka'tshayajayej Josué lhäy'e Israel lhayis.

₃Matkat tä Hiv lhayis tä lew'et hupuy tä Gabaón lhamel ihanch'oye tä Josué ikalhi Jericó lhäy'e N'owastsek, ₄lhamel iwo lehuseya wet yok:

–Is chik y'afwech'enlhi Josué wet n'atiyej lhatkanyaj.

Tä mälhyejtso, yikhen iyhäj wet itiche'pe lelhunthis wumhay häp leläy asnolis, lhäy'e hat'es lehis tä tsänt'ähes tä lewumhay tä lhamel itsekwethä tä tatoyhen. ₅Häte taw'uyhiche lew'uyis tä lewumhay wet t'äsiche lenisähes tä wasiche tä itsekwethä. Wet ichäj pan tä lewumhay tä sä'ä ihiche, ₆wet yikhen. Tä nichäte honhat tä Gilgal tä Israel lhayis ihi, tahuyej Josué lhäy'e Israel lhayis wet yok:

–Olhamel otälhe honhat tä atofwey. Chik lewoye tä olhamel owoye, ot'uhläk let'unhatche n'oyejen ämet yämthilek y'alhaip'ajtitwek wet kay'atiya n'amejen lhaka'tshayaj.

₇Israel lhayis nichulho wet yok:

–¿Chihla iwoyek kamatache ämet, chik ahäpehen iyhäj tä lew'et ni'tofwaye kana? Olhamel ohanhiyejt'ak ot'unhatche amejen olhämet chik mälhyejtso.

₈Matkat lhamel nichulho Josué wet yok:

–Olhamel ohäpehen t'at akawos.

Josué tay'ätshane wet yok:

–¿Atsi tä ahäpehen, wet atsi honhat tä letälhaye?

₉Lhamel nichulho Josué wet yok:

–Atofwey tä otälhe, häp tä otoyne wet oläte letoyaj häp Awuk Dios. Olhamel oläte tä wichi yämejwethä nilhokej m'ak tä lham iwoyej amehen amel tä lheyayhi p'ante Egipto, ₁₀lhäy'e m'ak tä iwoyeje Amorreo lhayis kaniyatey tä tumej Jordán lhip elh. Wok oyok, Sehón tä ihi Hesbón lhäy'e elh tä lhey Og tä lew'et Astarot tä ihi Basán. ₁₁Häp tä tamenej tä olhamel oka hin'ol tä thänhäy lhäy'e nilhokej wichi tä ihi oka honhat, lhamel tahuy n'oyejen wet yok, “Chuma äk yämthilek letufw chik lhehi han'äyij wet mähen, hoye Israel lhayis. Chik lechäte, fwenhola lhamel tä olhamel ot'uhläk olhayen häpeya lakawos. Wet ot'uhläk olhamel lhäy'e lhamel oyenlhi olhämet chik ot'unhatche lhamejen.”

₁₂“Wet tä owo tesa on'äyij tä onekhen tä oho amehen, pan tä ochäjna häpehte m'ak tä nech'ayek. Mat athana lew'enay tä t'un wet sä'ä ihiche t'at. ₁₃Wet hat'es lehis tä wasichena, nech'ayhis t'at tä olhamel onekhente. Mat athana lew'enay tä tatoyhen t'at. Häte ow'uyis lhäy'e onisähes wasiche t'at, tsi pitaj olhamel on'äyij.”

₁₄Tä mälhyejtso, Israel lhayis yelhte lhamel lhäk tä tilhäj, mat tek ichunkat chik tay'ätshane häp Lhawuk. ₁₅Wet nech'e Josué iwoyeje lhämet tä hit'untejche tä tek iwohla m'akayej lhamel. Häte Israel lhayis kaniyatey iyhäj, lhamel hit'unhatche lhämet tä hätet iwoye Josué.

₁₆Tä tajyäme tres ifwalas tä Israel lhayis hit'untejche lhämet häp wichitso, lhamel ihanej tä Gabaón lheley t'at wet tek lew'et atofwehlä häp lhamel. ₁₇Wet Israel lhayis yikhen tä ihoye, wet tä tres ifwalas nech'e lhamel nichäte hupuy tä hin'oltso tälhe tä lheyis Gabaón, T'owalhaj, N'opekis, lhäy'e Kiriat-jearim. ₁₈Matkat Israel lhayis tek ilänhen, tsi lhamel pajche hit'untejche lhämet häp tä isej Lhawuk, Israel laka Dios. Wet Israel lhayis wuj tä y'ulhanche m'ak tä laka niyatey iwoye. ₁₉Matkat lhamel nichulho wichi wet yok:

–Olhamel pajche ot'untejche olhämet häp wichitso, häp tä isej Lhawuk Dios, tä oyonajkwe, “Tek owohla m'aka amejen.” Häp tä tamenej tä athana niwohit m'ak chik owoyeje wichitso. ₂₀Tej t'atni, isit'ak y'alänhen. Tsi chik y'anäk'äs ilhämet tä pajche y'awoyeje lhamel, Lhawuk itihla n'amejen lewäk.

₂₁Tä mälhyejtso, Israel kaniyatey ifwenho laka wichi wet yok:

–Yej länhen. Mat enay alheteswosa wet yikeho inät wichi.

Wet mälhyejtso tä niyatey niwoya elha lhämet tä pajche ifwenho häp wichitso.

₂₂Wet Josué t'äne Gabaón lheley wet tay'ätshane tä yok:

–¿Chipte tä let'akan n'oyejen tä lhoyaykwe, “Atofwey tä otälhe.”? Tsi haw'etayna tek atofwehlä olhamel ow'etes. ₂₃Täjtso tamen amejen tä lhehi t'at awit'äyhyaj, wet lepes ihichet'a tä ahäpehen olhamel okawos t'at. Lhisthihena hal'äy wet letonhiphäla inät, yämthilek iche inät wet iche itäj huk tä ihi oka Dios lew'et.

₂₄Lhamel nichulho Josué wet yok:

–Olhamel owoynejetso m'ak tä owoye tsi wuj tä onoway amehen yämthilek lelänhen olhamel. Olhamel ohanej tä Awuk Dios pajche hiw'enho p'ante lhämet lakawo Moisés tä ifwenho tä lham yachajila amehen häp honhatesna, wet letäyhat nilhokej wichi tä yen w'etesa. ₂₅Wet athana olhamel oihi t'at akweyey. Woyej n'oyehen m'ak tä lehuminche.

₂₆Tä mälhyejtso, Josué iwahnhiyejt'a chik Israel lhayis ilänhen häp Gabaón lheley. ₂₇Mat ifwalastso Josué ne'tek lhamel t'ukwe Israel lhayis lhetes lhäy'e inät. Häte t'ukwe itäj huk lhäy'e inät wet ihäne Lhawuk laka altar, lhip chik häpek Lhawuk ne'tek õ'tihi. Wet yäk ifwalasna Gabaón lheley kamaj häpe t'at täjtso lechumet.