Israel lhayis lhaiwaklhathen yämthilek inuye hupuy tä N'owastsek
1Lhawuk tahuyej Josué wet yok:
–Yej noway wet yej nuhat amho. Hutwek nilhok aka nifwotaj wet hoye hupuy tä N'owastsek wet tayhlä. Tsi olham otch'otla ame wet lekalhihila, lhäy'e wichi tä ihi, lhäy'e laka niyat, lhäy'e laka honhat. 2Wet hupuy lhäy'e laka niyat tech'ayneja m'ak tä lewoyejenaj Jericó lhäy'e laka niyat. Mat athana nilhok m'ak tä ihi hupuyna a'enayla lewuhuya, lhäy'e wichi leläy. Waklhat iyhäj aka nifwotaj, is chik lhamel iw'echehi häp hupuy häpkhilek iselkat chik lhamel inuye.
3Tä mälhyejtso, Josué iwaklhat nilhok laka nifwotaj yämthilek inuye häp hupuy tä N'owastsek. T'ähi treinta mil hin'ol tä wuj tä takhajayhen wet ichen tä honatsi. 4Wet ifwenho lhamel wet yok:
–Ch'ahuye olhämet. Hoyay w'echehi häp hupuy, yej aletontehlä wet yej alen'älthen. Mat awaklhathen häpkhilek lenuye. 5Wet lhip nifwotaj ihla n'oyej chik olhaitott'ayne hupuy. Wet chik lhamel tä ihi hupuy inu n'oyehen, olhamel onuhikwela alhoho, ofwetajla onowaye lhamel, tehla iwoye ifwalanaj yokwes lhaka nifwotaj. 6Wet lhamel yenhiyelak äp yachajo tä y'alethanlä lhamel. Wet ihänla olhamel yäk atofwehlä lew'et. 7Wet chik mälhyejtso, amel tä aleskathen nukwephäla wet nuye häp hupuy, tsi Lhawuk Dios hiw'en amhohen. 8-9Wet chik lewastayhi hupuy, wunhola, mälhyej tä Lhawuk ne'tek y'awoye. Häp täja m'ak tä ofwel amho. Woyaye t'at olhämet. ¡Mähen!
Wet lhamel yikhen tä lhaiskathen tä ihi N'owastsek lhip tä tumej tä fwala y'uy tä Betel itayhlä. Wet Josué iyej wichi iyhäj häp honatsitso.
10Tä nech'e fwamlafwaj Josué nephä wet itetshan laka sip'äl. Wet nech'e lham lhäy'e Israel lhayis kaniyatey, lhamel ichunlä nifwotaj wet lhaitott'ayne N'owastsek. 11Ihoye lhip tä itayhlä hupuy wet yenlhi lew'et tä ihi lhip tä tumej tafwojhiye, wet chenhas kawayhi tumejlä hupuy. 12Wet Josué iskat cinco mil hin'ol tä tumej tä fwala y'uy. 13Häp täjtso tä Israel lhayis iwoye tä lhaiw'enhathen, iyhäj ihi lew'et tä tumej tafwojhiye wet iyhäj tumej tä fwala y'uy. Wet tä honatsi Josué tiyäjo chenhas kawayhi.
Israel lhayis ikalhi N'owastsek
14Tä N'owastsek laka niyat hiw'en, inuphä lhäy'e laka nifwotaj yämthilek lhamel inuye häp Israel lhayis tä ihi chenhas kawayhi. Mat ihanhiyejt'a tä iche nifwotaj tä lhaiskat tä iw'echehi hupuy. 15Wet Josué lhäy'e hin'ol tä iyej, lhamel ifwech'enwethä letayhfwas wet fwetaj nowayhen. Wet yikhen, inukwe alhoho tä tiyäjche n'äyij tä tataye ts'anis. 16Tä N'owastsek laka niyat hiw'enche Israel lhayis, ichen laka nifwotaj yämthilek ihän. Wet tä lhamel yikhen, nech'e atofwehlä hupuy. 17Wet newache hin'ol chik imälhehi N'owastsek, wet lepelis tafwochehen, lhäy'e Betel, tä lhamel ihän Israel lhayis.
18Wet nech'e Lhawuk tahuyej Josué wet yok:
–Piyne ahun häp N'owastsek, tsi oyachaj ame.
Wet Josué ipiyne hupuy häp lehun. 19Wet nifwotaj tä lhaiskat, nech'e lhamel inuphä wet tiyäjo hupuy, wet ikalhi wet iwunho. 20-21Wet nifwotaj tä ihän Israel lhayis, tä lhamel iyahinche len'äyij, hiw'ene tutsaj tä tälho lew'et. Wet ihanej tä tatäy t'at lhamel wet len'äyij newache yämthilek ilethanhen. Tsi Josué lhäy'e hin'ol tä iyej tä fwetaj nowaye wet tiyäje ts'anis, nech'e takasitlä lhamel wet tatayhlä. 22Wet häte iyhäj, tä ileyej tä iwunho hupuy, lhamel yikch'oye tä ihän letäyhfwas. Tä mälhyejtso, N'owastsek lheley ihi t'at lechowej häp Israel lhayis, wet õ'länhen yäk nofwej. 23Tajlhama laka niyat tä õkniläna ayej, mat õ'tsoklhi wet õ'häne Josué.
24Tä Israel lhayis ihämtej tä ilänhen häp N'owastsek lheley tä fwetaj ihän, nech'e lhamel yäple hupuy tä pajche iwunho, wet ilänhen wichi tä imälhehi. 25Wet ifwalatso doce mil N'owastsek lheley tä õ'länhen, hin'ol lhäy'e atsinhay. 26Josué ilehiyejt'a tä ipiyne lehun häp hupuy, pajtha matche tä nofwej lhamel. 27Wet Israel lhayis tachuma nilhokej m'ak tä ihi hupuy, lhäy'e nilhokej itshätäy, mälhyej tä Lhawuk ifwenho häp Josué. 28Wet yäk häp ifwalasna kamaj n'äl t'at hupuy p'ante Josué iwasthi lhäy'e tä iwunho. 29Wet Josué tachuma p'ante häp N'owastsek kaniyat wet ifwuhthilhi hal'ä pajtha honaj. Wet tä ifwala y'uy p'ante Josué ne'tek õ'lanhi lep'itsek wet õ'tihi häp laka hupuy lepe wet õ'iskonpe tuntey. Wet tuntey p'ante õ'iskonpe kamaj ihi t'at ifwalasna.
Josué yahyen Lhawuk lhämet tä Israel lhayis i'pe chenaj tä lhey Ebal
30Tä Israel lhayis i'pe p'ante chenaj tä lhey Ebal, Josué ne'tek yenhoplhi altar häp Lewuk Dios, 31mälhyej tä Ley p'ante tälhe Lhawuk lakawo Moisés ne'tek õ'woye tä yop'antekwe, “Chik lhenaylhi altar, hutwek tuntey tä kahin'ol lheneka.” Wet tä wak'alh, lhamel ilänhen itshätäy wet iwunhomche tä i'pe altar yämthilek yen n'okhayajayej Lhawuk. Häte ilänhen iyhäj itshätäy häpkhilek lha'isyene Lhawuk. 32Wet Josué tachuma Lhawuk lhämet p'ante Moisés hiw'enho, wet itenlä tä ilesayen tä iti'pe tunte. Wet nilhokej Israel lhayis iyahin, 33lhäy'e wichi tä kahäpeya Israel lhayis tä iyej lhamel, lhäy'e nilhokej hin'ol tä thänhäy, lhäy'e niyatey, lhäy'e n'okalelhthayaj lewos. Wet Leví leles tä häpehen sacerdotes tilhäjlhi Arca tä N'ot'amajchet tä Lhawuk lhämtes ihi, wet itihi lechowej lhamel. Wet iyhäj tumej lhip elh wet iyhäj tumej lhip elh. Iyhäj ihi tä chenaj tä lhey Gerizim tatache, wet iyhäj ihi tä chenaj tä lhey Ebal tatache. Lhamel iwoye täjtso mälhyej tä Lhawuk lakawo Moisés ne'tep'antek iwoye, yämthilek Lhawuk takäpfwayeje lakäpfwayaj tä is lhamel.
34Wet nech'e Josué yahyen nilhokej Lhawuk lhämtes yämthilek wichi iläte. Yahyen lhämtes tä yäme n'okäpfwayajay tä isen lhäy'e iyhäj tä yäme n'owit'äyhyajay. 35Nilhokej n'olhämtes p'ante Moisés ne'tek wichi iwoye tä Josué yahyen yämthilek Israel lhayis tach'ahuye: häp hin'ol, atsinhay, nä'tshas, lhäy'e wichi tä kahäpeya Israel lhayis tä iyej lhamel.
