Lam 5

₁Iwuk, lhek tichunche m'ak tä inaj n'oyejen.

Lhek yahin n'oyehen,

matche tä wichi n'äyi n'ohomche.

₂Nilhokej m'ak tä olewuhuy,

wichi tä kalew'eta täja

lhamel t'at tä lhayen lewuhuya athana.

Wichi tä tälhe lhip elh

lhamel yen lewukweya olhamel owukwey.

₃Olhamel ochipenhas t'at, lajit ojchaya.

Olhamel okolis tesalis t'at.

₄Inät tä olhamel t'at tä olewuhuy,

otiskan'atpe chik owatlä.

Olhamel olhetes owot lahaya chik owatlä.

₅Otayhfwas yäm äytajchey tä ichumyen n'owethä.

Tej chik oy'enhen, tha iwohit'a ot'elakw'eta.

₆Tä owatlä olhäk,

olhaip'altsenet Egipto lheley

lhäy'e Asirio lhayis.

₇Olhamel ojchalis tä iwonaj lech'isukyaja, nemhit ichehen,

wet olhamel t'at tä õyen tesa n'oyejen,

õ'tit n'o'pehen lhamel lech'isukyajaynaj iwoye.

₈Wichi tä n'okawos mhaji,

nech'e lhamel t'at tä niyat n'oyejen,

wet newache elh chik ifwayhat n'oyejen lhamel.

₉Olhamel olhaiwom'atpe olhäk chik ot'ukwe,

tsi wuj chowalhnhas tä ihi honhat tä ts'anis.

₁₀Olhamel ot'ähes chayo,

tet iwoye n'onhonthi.

Lhayen ot'inhayaja tä matche tä onchuyu,

häp tä tamenej ot'ahes chayo.

₁₁Hin'ol hip'ajtitchä atsinhay lhäy'e atsinha lhutshay

tä ihi Jerusalén lhäy'e lew'etes tä ihi Judá,

wet matche tä iwoyeje lhamel m'ak tä nit'uhawetayej.

₁₂Oka niyatey õ'fwuhatwethä takweyey,

oka thänhäy nemhit õ'wo haya lhamel,

w'et õyen at m'aka.

₁₃Mamses õ'chofwanyenhen,

wet nä'tshas lhamel nichätejche katsi

n'olhetes tä õ'lhuhyenejen.

₁₄Hin'ol tä thänhäy nemhit ihiche lew'etes

tä lhaihuthipejwek tä ihiche Jerusalén lepelis,

wet nemhit t'ichoywethä mamses.

₁₅Nemhit olhamel ohusey lakäjyaj ihi,

wet nemhit otkatinejwethä okäjyaj,

olhamel ofwitajayaj tä tamenej.

₁₆Tatäy olhamel on'ohyaj,

owit'äyhyaj ihi, tsi owonaj ch'isukyaja.

₁₇Häp tä tamenej tä ohusey nemhit lakhajyhayaj ihi,

wet ottet'ilis hip'o'pe ottelhoy.

₁₈Tsi chenaj tä Sión wasi,

nemhit wichi ihi.

Nech'e m'awo lhayis t'at tä ilunpe.

₁₉Mat am, Iwuk, lajit lepesa aniyatyaj.

Lajit lepesa tä letatayhiphä aniyatyajw'et.

₂₀¿Chipte tä nemhit lhen atichunhayaja n'ohen?

¿Chipte tä lhäm pitaj tä lhek n'och'oyehen?

₂₁Iwuk, is chik lenachaj n'ohen ame

häpkhilek olhamel otpil ame.

Nachaj n'oyehen olhamel owujyajnaj in'oyejen.

₂₂Matche tä am lewom n'ohen.

Wujnaj awäkw tä leti n'oyejen.