Lhawuk ihämit Jerusalén tä itasin
1¡Matche tä õhch'oyhat oro tä isi
wet tatäy lesilatyaj!
¡Nech'e w'et lhatpetso,
lhayej t'at tuntey tä õyenejlhi p'ante Lhawuk Lewukwe,
ichehen t'at hup kawayhil!
2Wichi tä lew'et Jerusalén,
lhamel wuj tä len'ohyaj ihi mhaji,
tet iwoye oro tä lhäy'e lhip tä laha ihi.
Mat athana õ'tech'aynej n'olhakwey
tä iyhät tä ni'isisa.
3Hay'äj itifwkathen leles
wet wuj tä t'uyehen lhamel.
Mat lhaka wichi nemhit t'uyehen iyhäj,
tet iwoye wänlhäj tä tayhlhele tä iwom lhich'ulh.
4Nä'tshas tä kamaj tiphasen,
lak'ajlhich'ulh sathomche lak'ajch'ol,
tsi matche tä tamchäy, ichimhen.
Nä'tshas t'alhch'oye pan,
mat ihichet'a n'oelh chik hiw'enho.
5Wuj mhaji lhäk tä hiw'en häp wichi,
wet athana y'ilejen nehläs,
lep'itseyhay ihichet hup kawayhil.
Wichi tä wuj mhaji lakäywet,
nech'e ifwute basuraw'etes
tä t'ukwe m'ak chik isej.
6M'ak tä ni'isa tä lhaka wichi iwoye
tafwaype Sodoma lheley lech'isukyaj p'ante iwoye.
Häp tä tamenej tä õ'täyhthen p'ante wet yokwet nofwej,
wet tek Lhawuk tachuttshanej tä ilänhen.
7Wichi tä õ'tshupyeneje tä len'ohyajay ihiche,
tate'pelis isis mhaji, ipelaj,
wet t'isanis lesilatyaj ihi
wet lhäy'e lhip tä takhajayhen.
8Wet athana nofw lesilatyaj,
mälhyej chik wichi nemhit nitäfwelej.
Wet ilopenhen, ts'ilak at lhiley tä t'äj i'pe,
tatshäjäy tet hal'ä wumek.
9Wujit'a leteläythayaj wichi
tä y'inhen naji tä ihi n'oka'tshayaj.
Mat wichi tä y'ilejennaj nehläs,
häp tä wuj tä iteläytej,
häp tä tek iwelkatchä tä y'inhen,
tsi lhäk tä newache.
10Atsinhay tä lechowhal ihi tachuma naji leles,
ilänhen wet ipen, häp tä laj lhäka,
tsi häp tä lhatayhfwas iwasthi Jerusalén.
11Lhawuk iwo lewäkwa,
tet iwoye itäj tä y'oho.
Lhal iwunej Jerusalén
pajtha y'aje lefwetes.
12Ihichet'a niyatey tä i'pe honhat,
wok hin'o chik häpe,
chik yenek Jerusalén letayhfwas isakanhihola Jerusalén
ifwala chik häpe.
13M'ak tä tamenej tä Jerusalén lewit'äyhyaj ihi,
häp tä profetas iwo lech'isukyaja,
wet sacerdotes äpte iwoye m'ak tä ni'isa.
Tsi häp tä lhamel itsäyhchä lew'oyis
wichi tä lajit letesa tä ihi Jerusalén.
14Wet lhamel tek ikalelhät len'äyhäy
tä tiyäjchehen hup kawayhil,
tet iwoye asnamis.
Wet ihichet'a elh chik ikalhi chik itsok lew'uy,
tsi häp tä õ'näfwtseyeje w'oyis
tä iyejen lew'uyis.
15Wichi tahuyhlä wet yok:
“¡Atonte n'ohlä, yej aletott'ayen n'oye!
¡Akok'aye, yej tsokn'o!”
Wichi tä ihiche honhates tahuye lhamel wet yok:
“W'et lelunhen t'at amel.
Lhekn'ajch'oye aka honhat,
mat lewohit'a haw'etachehchä.”
16Lhawuk t'at tä ifwtsatkatpetso,
wet nemhit iyahne lhamel.
Nemhit õ'wo haya sacerdotes,
wet nemhit n'op'altsenyaj iyej wichi tä thänhäy.
17Lhattelhoy y'enhen naji,
mat kamaj y'at'untejiche chik õtch'ot n'amehen.
Y'atichet chik näm n'amehen chik paj,
mat newache.
W'et y'aniwhitlä wichi chik näm
tä tälhe honhat elh,
häp wichi tä nhanayej iwoyneje chik n'aifwayhthen.
18Lhatayhfwas y'enhiyejt'a tä n'aiyahin t'at,
wet häp tä nemhit y'anukwehen hup kawayhil.
Y'ehi t'at lhawit'äyhyaj,
nemhit y'ahanej lewhäy chik y'at'inhen.
19Iläfwenhen wichi tä n'atkähännhej,
inutpe iyhäjkottas tä iläfwenhen tä wey'ähen.
N'atkähännhej tä y'ehi chenhas,
wet n'ainiwhi tä y'ehi ts'anis.
20Lhatayhfwas isakanej lhaka niyat
tä häpe hin'o tä Lhawuk tatshupiye.
Häpe niyat tä lhakhajyhayaj tälhe,
tet iwoye hal'ä tä y'echufwi lehupel
yämthilek y'atfwayej wichi iyhäj tä i'pe honhat.
21Amel tä haw'etes Edom lhäy'e honhat tä Us,
ascheylhit n'oyejen, en at aläkwika n'ohen.
Mat tehla amel Dios iyäynhila amejen
n'olhät tä tapay tä häpe lewäkw.
Aw'oknhasiyeja wet pajla'tha lemälhtej at haw'uyis.
22Jerusalén lheley,
nofw tä Dios aitasinpe akeyis tä ni'isa.
Ileyej tä iwahin amejen
tä atayhfwas ayen kwenkaya.
Mat amel tä Edom lheley,
Dios aitasnhila'pe akeyis tä ni'isa tä lewoyaye,
wet hin'älthila'pe nilhokej hach'isukyajay tä i'amejen.
