Lev 10

₁Nadab lhäy'e häp Abihú, Aarón leles, lhamel iwoye m'ak tä Lhawuk nhuminache chik iwoye. Elh tefwaji tachuma laka fwiyhol lehi, wet itihi fwiyhol wet ithatho incienso, wet hiw'enho Lhawuk häp itäj tä nena t'amajchetayej. ₂Wet nech'e Lhawuk ichen itäj, wet hip'ohen häp lhamel wet y'inhen, ihi t'at tä Lhawuk tatache. ₃Wet nech'e Moisés tahuyej häp Aarón wet yok:

–Häp täja Lhawuk lhämet tä yäme naji tä yok, “Olhain'älthiyeja häp sacerdotes tä tach'ote ochumet tä ohäpe Elh tä N'ot'amajchet. Wet on'älthiyeja nilhokej häp Israel lhayis owujyaj tä in'oyej.”

Wet Aarón nichulhihot'a häp Moisés, yok tam.

₄Wet Moisés nech'e t'äne häp Aarón lewithok Uziel leles, Misael lhäy'e häp Elsafán. Wet yok:

–Lhuyay, tonayphä aiyhäj lep'itseyhay tä ihi Lhawuk lew'et. Hänay lhip elhe honhat tä wichi ihina.

₅Wet lhamel ihoye, wet kamaj lew'uyis ichetpe, itonchephä, ihän lhip elhe honhat tä wichi ihi, mälhyej m'ak tä Moisés t'uhläk iwoyneja.

₆Moisés tahuyej Aarón lhäy'e häp leles Eleazar lhäy'e Itamar, wet yok:

–Yej wahnej chik haw'oley nitsäyhchä, wet isit'a chik lech'esajchehen haw'uyis chik lhen atetnekayej tä aiyhäj y'inhen. Yej woyaye tähesna, häpkhilek kat'ilahen wet Lhawuk nitiyayej lewäkw imälhewek häp wichi. Mat aiyhäj tä Israel lhayis is t'at chik lhamel yen lelhakliya apuhfwas mathi tä Lhawuk ilänej itäj. ₇Wet äpte yej lhekaych'oye häp carpa tä Lhawuk lewukwe lepe, häpkhilek kat'ilahen. Tsi amel pajche õyen t'amajchetesa amejen tä otsäy atapehen häp aceite tä Lhawuk t'amajchet.

Wet Aarón, Eleazar lhäy'e Itamar, lhamel iwoye t'at m'ak tä Moisés ne'tek iwoye.

₈Lhawuk y'isej elh lhämet tä ifwenho häp Aarón wet yok:

₉–Chik am lhäy'e ales letiyäjilachufwi häp carpa tä olham owukwe, isit'a chik amel leyäyej hat'es at chik häpe, häpkhilek kat'ilahen. En akeya täja pajla'tha nichäte ales tä lepes lheley, ₁₀häpkhilek lehanej tä lew'enhat m'ak tä t'amajchet lhäy'e m'ak tä kan'ot'amajcheta, wet m'ak tä kok'aye lhäy'e m'ak tä laj lech'ohleya. ₁₁Wet is chik amel lechufwenej Israel lhayis nilhokej häp m'ak tä Lhawuk ifwenho Moisés tä t'uhläk lhamel yen lakeya.

₁₂Moisés tahuyej häp Aarón, wet lhäy'e Eleazar wet Itamar, häp Aarón leles tä imälhehi, wet yok:

–Häp Lhawuk t'awayhtes tä õ'wunhomche, chuma lhip tä õ'mälhthi tä õknip'oya tä tälhe yachuyaj lhay, wet en pana mat yej thate levadura. Chik wak'alh, is chik amel letufw t'at tä lhewhäye altar, tsi häpe m'ak tä matche tä n'ot'amajchet. ₁₃Tufwayla tä lhehi honhat tä n'ot'amajchet. Tsi häpe Lhawuk t'awayhtes tä õ'wunhomche lhip tä õ'mälhthi, häp tä Lhawuk ifwel n'oho tä hiw'enhat amej lhäy'e häp ales. ₁₄Wet am lhäy'e ales, lhäy'e häp ales tsinhay, is chik letufw häp itshäwet let'okwe tä õ'tiye Lhawuk, lhäy'e häp lheche t'isan tä õt'amajej tä õhw'enho Lhawuk. Is chik lheyayhi honhat tä laj lech'ohleya chik letufw. Tsi häpe itshäwet lhipey tä Lhawuk hiw'enhat amejen tä tälhe t'awayhtes tä wichi hiw'enho tä lhamel lha'isyene häp lham. ₁₅Häp itshäwet lhechetso lhäy'e let'okwe, õ'hänhiyela Lhawuk wet õ'tihiyela, õhp'ajthiyeja t'alhä tä õ'wunhomche. Häp lhipeyna lajit whäya tä am lhäy'e ales lew'enhahiyejpeja, tsi Lhawuk t'at tä lhämet täjna.

₁₆Moisés tay'ätshanej häp kayla tä õ'län tä õtiskanejpe n'och'isukyajay. Wet tä ihanej tä pajchem'at õ'wunho, nichuwete häp Eleazar lhäy'e Itamar, häp Aarón leles. Wet Moisés yäme tä yok:

₁₇–¿Chipte tä amel katufwa häp kayla tä õ'wompe n'och'isukyajay, wet lhewayhihin'e honhat tä n'ot'amajchet chik letufway? Häpe m'ak tä matche tä n'ot'amajchet. Lhawuk tä hiw'en amhohen häpkhilek ilejej wichi lech'isukyajay wet itäyhtejen letes. ₁₈N'älej tä lew'oyis wet äpte õ'hänhiyet'a m'athi häp honhat tä n'ot'amajchet. Isin'e t'at chik amel lhewhi honhat tä n'ot'amajchet wet letufwin'e t'at häp itshäwet, mälhyej tä ofwelnaj amhohen.

₁₉Aarón nichulho häp Moisés wet yok:

–Lhek yahinya, ifwalamatna wet lhamel pajchemat ihäne Lhawuk häp itshätäy tä õ'wompe n'och'isukyajay, lhäy'e itshätäy tä õ'wunhomche tä õyen n'okhayajayej Lhawuk. Mat kamaj wuj owit'äyhyaj tä imat n'oyej. Chik olham otufwi m'athi häp itshäwet tä õ'womejpe n'och'isukyajay, ¿wet hä Lhawuk akäjiyejlhin'e?

₂₀Tä Moisés iläte häp Aarón lhämet tä nichulho, ileyej tä tawäkwäylhi.