Lev 9

₁Tä nichäte ocho ifwalas, Moisés t'äne Aarón lhäy'e häp leles, wet lhäy'e Israel lhayis laka hin'ol tä thänhäy. ₂Wet yäme häp Aarón wet yok:

–Chuma tolo tä pumfwetaj häpkhilek lelän tä letiskanejpe amel hach'isukyajay. Wet äp chuma tson'ataj tä asnak häpkhilek lewunho tä lhen Lhawuk t'awayhata. Is chik häpehen itshätäy tä isis tä newache m'ak chik iyej, häpkhilek lehäne Lhawuk. ₃Wet fwenho häp Israel lhayis tä is chik tachuma kayla tä asnak häpkhilek õ'län tä õtiskanejpe lech'isukyajay. Wet äp is chik tachuma tolo tä pumfwetaj wet tson'ataj lhäs häpkhilek lewunhomche tä õyen Lhawuk t'awayhtesa. Is chik tolo lhäy'e tson'ataj lhäs hiw'en tefwaji nekchäm wet äp isis wet newache m'ak chik iyej. ₄Äpte is chik ichäj alhoho tolo wet äp tson'ataj tä asnak häpkhilek õ'länhen tä wichi lha'isyene Lhawuk. Wet äpte is chik ichäje Lhawuk t'awayhat tä n'olhäk tä tälhe yachuyaj lhay tä õ'thate aceite. Tsi häp tä Lhawuk lhain'älthila amejen ifwalana.

₅Wet Aarón ifwenho Israel lhayis häp Moisés lhämtesna. Wet lhamel ichäje carpa tä Lhawuk lewukwe nilhokej häp m'ayhaytso tä Moisés ne'tek ihäne, wet lhamel itihi lhip tä tatache. Wet nilhokej lhamel lhayämet alhoho wet takasthen tä ihi tä Lhawuk tatache. ₆Wet Moisés tahuyej lhamel wet yok:

–Häp täja Lhawuk lhämet tä ne'tek amel lewoye. Is chik amel lewoyaye, wet Lhawuk lhain'älthila amejen wet lew'enayhla lewujyaj tä matche tä isi.

₇Wet Moisés tahuyej häp Aarón wet yok:

–Is chik lehoye altar wet lehäne itshäwet tä lelän tä lewomejpe hach'isukyaj, lhäy'e itshäwet elh tä lewunho. En Lhawuk t'awayhtesa itshätäyna, häpkhilek itäyhat amej ates lhäy'e wichi letes. Wet äpte is chik lehäne t'awayhtes tä Israel lhayis hiw'enho tä tiskanejpe lhamel lech'isukyajay tä iwoye. Tsi häp täja tä lham ne'tek Israel lhayis iwoye.

₈Tä mälhyejtso, Aarón ihoye altar wet ilän tolo tä pumfwetaj tä tiskanejpe lham lech'isukyajay. ₉Wet leles yike lew'oyis wet ichäj, wet Aarón y'uytho lefwuj wet ilänej altar lech'ul. Wet lhip tä imälhehi itsäche altar lhip tä honhate. ₁₀Tä tajyäme täja, wet iti'pe altar tä iwunhomche itshäwet t'alhä, lhäy'e lechäntowayis, wet t'alhä tä iyej letänek, mälhyet iwoye m'ak tä Lhawuk ifwenho Moisés. ₁₁Wet häp t'isan lhäy'e t'äj õ'hän alhoye tä õ'wunhomche.

₁₂Wet Aarón ilän häp itshäwet elh tä häpkhilek õ'wunho. Wet leles yike lew'oyis wet ichäj, wet häp tä Aarón itsächehen häp altar lhipey. ₁₃Wet lhamel ichäje itshäwet lhetek lhäy'e lhipey tä pajche õyisthen, wet häp tä Aarón iwunhomche tä iti'pe altar. ₁₄Wet ilejen lheley lhäy'e häp lhechey, wet iti'pe altar tä iwunhomche, tet iwoye tä imälhewek häp itshäwet.

₁₅Tä tajyäme täja, wet Aarón äp ihäne Lhawuk häp t'awayhtes tä wichi hiw'enho. Wet tachuma kayla tä tiskanejpe wichi lech'isukyajay wet ilän, itech'aynej t'at itshäwet tä ichun tä ilän tä tiskanejpe lham lech'isukyaj. ₁₆Wet nech'e äp elh itshäwet tä ihäne Lhawuk wet iwunho, itenche t'at m'ak tä pajche Lhawuk ichufwenej. ₁₇Tä tajyäme täja, ihäne Lhawuk t'awayhtes tä n'olhäk tä tälhe yachuyaj lhay. Wet tach'awho, iti'pe altar tä iwunho, hip'ajtej m'ak tä õ'wunho tä nech'e fwalapej tä õyen n'okhayajayej Lhawuk.

₁₈Wet Aarón äp ilänhen häp tolo lhäy'e tson'ataj tä asnak tä wichi ihäne tä lha'isyene Lhawuk. Wet Aarón leles yachaje lajcha häp itshätäyna lew'oyis, wet lham itsächehen altar lhipey. ₁₉Äpte lhamel yachaje itshätäyna t'alhä, wet lechäs t'alhä, lhäy'e t'alhä tä iyej lheley, wet lechäntowayis, lhäy'e t'alhä tä iyej letänek, ₂₀wet lhäy'e let'okwelis tä hip'ajtej, wet Aarón iwunhomche t'alhä, iti'pe altar. ₂₁Wet tachuma let'okwelis lhäy'e lhechey tä lefwomkat wet itiye Lhawuk, mälhyej m'ak tä Lhawuk ichufwenej Moisés.

₂₂Tä Aarón ileyej lechumtesna, itichephä takweyey tä iwo lakäpfwayajayej wichi. Tä tajyäme täja, wet inuhchä tä yikch'oye altar. ₂₃Wet Moisés lhäy'e Aarón lhamel weschufwi häp carpa tä Lhawuk lewukwe. Wet tä inukwephä, lhamel itiyej lakäpfwayaj wichi. Wet nech'e Lhawuk hin'ältej lewujyaj tä matche tä isi nilhokej häp laka wichi. ₂₄Wet Lhawuk ichen itäj wet yokwet ihämit itshäwet tä onte õ'wunho, lhäy'e häp itshäwet t'alhä tä i'pe altar. Tä wichi hiw'en tä tetso, wet lhamel t'änhen. Wet lhamel t'upechehchä pajtha letachol tijiche honhat, wet n'okwiyej Lhawuk.