M'ak tä ikokyene hin'o
1Lhawuk tahuyej hap Moisés lhäy'e Aarón wet yok:
2– Häp tähesna olhämtes tä is chik lefwenho häp Israel lhayis. Chik iche hin’o tä nitsäyhchä m’ak tä tälho, häp tä nech’e kok’ayeje. 3Tä nitsäy m’ak tä tälho, wok nem nitsäyhchä, mat kok’aye t’at.
4“Lhip at chik hin’otso imähi wet m’ak tä tälho nitsäyho, nech’e lhiptso kok’ayeje. Wet m'ak at chik häpe chik tatayphä'pe, nech'e kok'aye. 5Elh chik häpe chik ihoye hin'otso lemäwet, iwohiyet'ak nilejahen lew'uyis wet inay. Mat kamaj kok'aye t'at pajla'tha ifwala y'uy, wet nech'e häp tä nofw tä õ'kokyene. 6M'ak at chik häpe chik hin'otso tatayphä'pe, wet chik äp iche elh tä tatayphä'pe, iwohiyet'ak nilejahen lew'uyis wet inay. Mat kamaj kok'aye t'at pajla'tha ifwala y'uy, wet häp tä nech'e nofwila tä kok'aye.
7“Elh chik häpe chik itsok elh tä lewit'äy tetso, iwohiyet'ak nilejahen lew'uyis wet inay. Mat kamaj kok'aye t'at pajla'tha ifwala y'uy, wet häp tä nech'e nofwila tä kok'aye.
8“Chik hin'o tä mälhyejtso lewit'äyhyaj tä iyej ifwats'une elh tä nikok'ayaye, iwohiyet'ak elh tä laj lech'ohleya nilejahen lew'uyis wet inay. Mat kamaj kok'aye t'at pajla'tha ifwala y'uy, wet häp tä nech'e nofwila tä kok'aye.
9“Yel'ataj howet elh at chik häpe chik hin'o i'pe tä lewit'äy tetso, häpe m'ak tä kok'aye. 10Elh chik häpe chik itsok hin'otso m'ak chik häpe tä tatayphän'ajpe, nech'e lham tä kok'ayeje pajla'tha ifwala y'uy. Wet chik tachuma, ichäj, iwohiyet'ak nilejahen lew'uyis wet inay. Mat kamaj kok'aye t'at pajla'tha ifwala y'uy, wet häp tä nech'e nofwila tä kok'aye.
11“Elh chik häpe chik hin'o tä lewit'äyhyaj tetso itsok chik nilejahen takwech'ol, iwohiyet'ak nilejahen lew'uyis wet inay. Mat kamaj kok'aye t'at pajla'tha ifwala y'uy, wet häp tä nech'e nofwila tä kok'aye.
12“Chik elh tä lewit'äyhyaj mälhyejtso tachuma häp towej tä iyhät, iwohiyet'ak õkn'ajaho towej. Mat chik hal'ä tä tachuma, is chik õ'lejlhi.
13“Chik hin'otso ichesej lewit'äy tä iyejna, wet pajla'tha äp ihi siete ifwalas wet nech'e is chik ilejen lew'uyis wet inayej häp inät tä hits'ifwik, häpkhilek nech'e nofw tä kok'aye. 14Chik nichäte ifwala elh tä y'ununche, is chik tachuma täkwfwas pop wok hokwinaj les, wet ihohiyela carpa tä olham owukwe lepe, wet yachajiyela häp sacerdote tä ihi tä ottache. 15Wet elhaj õ'länla tä õtiskanejpe hin'otso lech'isukyaj, wet elhaj õ'wunhihola. Wet sacerdote yachajila n'oye lhamel häpkhilek nofw hin'o lakokhayaj.
16“Chik iche hin'o tä leles nitsäy, iwohiyet'ak nileja imälhewek häp t'isan. Mat kamaj kok'aye t'at pajla'tha ifwala y'uy, wet nech'e nofwila tä kok'ayeje. 17Chik iche wesaj wok tsänt'äj tä n'oles nitsäype, iwohiyet'ak õknileja. Mat kamaj kok'aye t'at pajla'tha ifwala y'uy, wet nech'e nofwila tä kok'aye.
18“ Chik hin’o lhäy’e atsinha iwoyej lhamehen t’isan lenech’ethayaj, iwohiyet’ak ninaya. Mat kamaj kok'aye t'at pajla'tha ifwala y'uy, wet häp tä nech'e nofwila tä lhamel kok'ayeje m'ak tä iwoyej lhamehen.
M'ak tä ikokyene atsinha
19“Chik iche atsinha tä nichäte lewhäy tä nowaylhi, kok'ahiyejela pajla'tha ihi siete ifwalas. Chik iche elh tä itsok, wet kok'ahiyejela pajla'tha ifwala y'uy, wet häp tä nech'e nofwila tä kok'ayeje. 20M'ak at chik häpe chik imä'pe häp ifwalas tä nowaylhi, häpe m'ak tä kok'aye. Lhäy'e m'ak at chik häpe tä tatayphä'pe, häpe m'ak tä kok'aye. 21Elh chik häpe chik ihoye atsinhatso tä nowaylhi lemäwet, iwohiyet'ak nilejahen lew'uyis wet inay. Mat kamaj kok'aye t'at pajla'tha ifwala y'uy, wet nech'e häp tä nofw tä õ'kokyene. 22Elh chik häpe chik itsok m'ak tä tatayphä'pe, iwohiyet'ak nilejahen lew'uyis wet inay. Mat kamaj kok'aye t'at pajla'tha ifwala y'uy, wet nech'e häpkhilek nofw tä kok'aye. 23M'ak at chik häpe tä imän'ajpe wok tatayphän'ajpe, nech'e häpe m'ak tä kok'aye. Wet elh chik itsok nech'e kok'ahiyejela pajla'tha ifwala y'uy.
24“ Elh chik häpe chik iwoyeje t’isan lenech’ethayaj atsinha tä nowaylhi, lhatisi t’at m’ak tä õ’kokyeneje tä iyej. Wet nech'e lham kok'ayeje t'at pajla'tha siete ifwalas, lhäy'e häp lhip at chik häpe chik imähi, kok'aye t'at.
25“Chik iche atsinha tä w'oyis iyej tä kalewhäya tä nowaylhi, wet nitäkw ifwalas, wok häpe t'at lewhäy tä nowaylhi mat inu'pe lewhäy, kok'ahiyejela t'at nilhokej ifwalas tä lew'oyis iyej, tet iwoye tä lewhäy ifwalas tä nowaylhi. 26Wet lhip at chik häpe tä lemäwet, wet m'ak at chik häpe tä tatayphä'pe, häp ifwalas tä w'oyis iyej, häpe m'ak tä kok'aye, tet iwoye ifwalas tä lewhäy tä nowaylhi. 27Wet elh chik häpe tä tachuma m'ayhayna, nech'e lham tä kok'ayeje. Iwohiyet'ak nilejahen lew'uyis wet inay. Mat kamaj kok'aye t'at pajla'tha ifwala y'uy, wet nech'e häp tä nofwila tä kok'aye.
28“Wet chik lew'oyis tä iyej hiy'esi, wet pajla'tha äp ihi siete ifwalas wet nech'e häpkhila tä nofw tä kok'aye. 29Wet chik nichäte ifwala elh tä y'ununche, häp tä is chik tachuma täkwfwas pop wok hokwinaj les, wet ihänhiyela sacerdote tä ihi häp carpa tä olham owukwe lepe. 30Wet elhaj õ'länla tä õtiskanejpe atsinhatso lech'isukyaj, wet elhaj õ'wunhihola. Wet sacerdote yachajila n'oye lhamel häpkhilek nofw atsinha lakokhayaj.
Lepes Lhawuk lhämetna tä yäme n'okokhayaj
31“Wet häp tä mälhyejtso, is chik amel letontehlä n'okokhayaj häp Israel lhayis. Tä oiyejen häp lhamel, isit'ak tamenej tä kok'aye ow'etna, tsi häp tä tamenhiyeja chik lhamel y'inhen.”
32Häp tähestso y’aje elh chik häpek iche m’ak tä nitsäyhchä tä tälho, lhäy’e elh chik leles nitsäy, tsi kok’ayeje m’ak tä iyejen lhamel. 33Äpte y’aje atsinha tä nowaylhi, lhäy'e elh chik häpe tä atsinha wok hin'o tä iche m'ak tä nitsäyhchä tä tälhche, lhäy'e häp hin'o tä imäyej atsinha tä nowaylhi.
