Luc 18

₁Jesús yäme lhämet tä itech'aynej täja, tä ichufwenejen lechufwenkay yämlek iwopej let'alhyaja wet nileyayej. ₂Wet yok:

–Iche p'ante n'okalelhthayajwo tä ihi hupuy, lham tek nowaye Dios wet lep'altsenyaj itihiyejt'a elh che häpe. ₃Wet häte iche atsinha tesa tä ihi hupuytso, lham ihoyepej n'okalelhthayajwotso wet yok, “Woye tä owoye, ch'ot n'oye, häpkhilek is n'oye elh tä yenn'o letayhfwaya.” ₄Wet wujpe lewhäy tä n'okalelhthayajwotso nitetshana. Mat tä paj wet letichunhayaj yok, “Ohäpe elh tä ninowayaye Dios wet oyenhit'a lhakliya elh che häpe, ₅matkat häp tesatso ilehiyejt'a tä nämpej wet ilhaklitn'o. Tä mälhyejtso otetshanhila, otch'othiyela, häpkhilek nemhit näm, tsi oy'elej.”

₆Wet Lhawuk y'isej tä yok:

–Häp täjtso lhämet häp n'okalelhthayajwo tä ni'isa. ₇Tä mälhyejtso, ¿chiwoye Dios? ¿Hä nitihiyeja lech'otyaj lham leles tä t'alhe ifwalapej honatsipej? ¿Hä ne'tehlak tataye t'at? ₈Kha. Ofwel amhohen tä tek ipanthiyeja wet tach'othiyela. Mat lhek tetshan, che tapinla Hin'o Lhäs, ¿hä hiw'enla tä wichi lechayaj ihi tä ihonhatena?

₉Jesús y'isej elh lhämet tä itech'aynej täja, tä yäme wichi tä yäm lhamehen tä le'isyaj ihi wet yen w'et m'ayeka iyhäj. Yok:

₁₀–Täkwfwas hin'ol ihoye Dios Lew'et yämlek iwo let'alhyaja, elh häpe Fariseo wet elh häpe hin'o tä lechumet impuestos tä Romano lhayis t'alhpe. ₁₁Wet Fariseo takasit wet iwo let'alhyaja wet yok, “Dios, ow'en amho oka gracias, tsi tek ohäte iwoye iyhäj tä lhamel häpehen etantses, lhäy'e tä iwo lakain'oyaja, lhäy'e tä iwoye m'ak at che häpe tä ni'isa, wet tek ohäte iwoye hin'o l'itsi tä häpe elh tä t'alhpe impuestos. ₁₂Semanapej olhaichuyhat dos veces, wet m'ak tä okalhipej oyenpej oka diezmoya lhip.”

₁₃“Häp täjtso Fariseo lhämet. Matkat häp hin'o tä impuesto lewo ihi tä mälhyej l'itsi, wet nifwetajiyet che iyahin puleye, mat y'ajpe let'okwe wet yok, ¡Dios, p'altsenn'o tä ohäpe elh tä lech'isukyaj ihi!”

₁₄Wet Jesús nech'e äp yok:

–Ofwel amhohen, häp hin'otso tä yäple lew'et, tatäy t'at lech'isukyajay, mat Fariseo kamaj letes ihi. Tsi elh che häpe che lhaiwujyen, õyenla w'et m'ayeka, wet elh che lhayen w'et m'ayeka, õ'wujyenla.

₁₅Wet wichi ihäne nä'tshas tä lelemsas häp Jesús yämthilek tachumche'pe. Mat tä lechufwenkay hiw'en, ifwonlä wichitso. ₁₆Mat Jesús t'äne nä'tshas, wet tahuyej lechufwenkay tä yok:

–Ch'anlhaye nä'tshas, yej n'äyejo tä iho n'oye. Tsi wichi tä ihi Dios Niyatyaj häpe lhamel tä hätet iwoye nä'tshasna. ₁₇Matche tä ofwel amhohen tä elh tä lhaknitech'aynayej han'äfwaj yämthilek tachumlä Dios Niyatyaj, tek nichäthihola.

₁₈Elh hin'ol tä len'ohyajay ihi tay'ätshane Jesús wet yok:

–Maestro tä ais, ¿atsi m'ak che owoye häpkhilek onchäte ow'atshancheyaj tä t'un?

₁₉Jesús nichulho wet yok:

–¿Chipte tä lhenn'o isa? Tajlhame Dios tä is. ₂₀Pajche lehanej m'ak tä Dios ne'tep'antek õ'woye. Yok, “Yej lewo akain'oyaja, yej lelän aelh, yej let'etan, yej lesufwkane aelh, humin ajcha lhäy'e ako.”

₂₁Hin'o yok:

–Tälhe tä n'am thaläkw owoye t'at nilhokej lhämtestso.

₂₂Tä Jesús iläte, nichulho wet yok:

–Kamaj m'ak weihalha tä tatäy amej. Wom nilhokej m'ak tä i'amej, w'enhomche p'elitses, wet akäywet ihla puleye. Wet lhuu, nek n'okwe.

₂₃Mat tä hin'o iläte täja, lefwitajayaj ihi, tsi häpe elh tä wuj m'ak tä hiw'en. ₂₄Wet Jesús iyahin wet yok:

–¡Matche tä athaho lhamel tä hiw'en m'ayek yämthilek nichätho Dios Niyatyaj! ₂₅Lhek tichunache camello, ¡athahit'a che tiyäjche kanotte! ¡Mat häp hin'o tä hiw'en m'ayek häp tä athaho yämthilek nichätho Dios Niyatyaj!

₂₆Häp lhamel tä iläte täjtso tay'ätshane Jesús wet yok:

–¿Atsihilak tafway che mälhyejtso?

₂₇Jesús nichulho wet yok:

–Häp m'ak tä hin'ol nikalhahi, Dios ikalhi.

₂₈Wet Pedro ifwenho tä yok:

–Häp olhamel owomte katsi nilhokej m'ak tä in'oyejen wet onekte amche.

_29-30Jesús nichulho wet yok:

–Matche, wet elh che häpe tä iwom katsi lewukwe, wok lech'efwa, wok lepuhfwas, wok lajcha, wok lako, wok leles, wet wuj tä tach'ote Dios Niyatyaj, ofwel amhohen tä lhäy'ehila lhip m'ak che ikatej tä ihonhatena, wet häp lewhäy tä tatay alhoho ikathiyeja lew'atshancheyaj tä t'un.

₃₁Jesús hits'ilkat lechufwenkay tä ihi doce wet tahuyej tä yok:

–Lhek yahinya, y'ahoye Jerusalén, häpkhilek lhayäm matche nilhokej profetas lesaynhay tä yämeje Hin'o Lhäs. ₃₂Tsi õyachajiyela häp Romano lhayis, wet lhamel itihiyeja leläkwyhanyaj wet iwohla m'akayej, wet ifwats'unhilhila ₃₃wet itasnhilhila, wet ilepese ilänla. Mat chik tres ifwalas inuhiphäla tä tälho n'op'itseyhay.

₃₄Mat lechufwenkay ihanhiyejt'a tähestso tsi õ'iskatho m'ak tä häpe, wet häp tä lhamel nitäfwenhiyejt'a m'ak tä Lewuk yäme.

₃₅Tä Jesús tott'aye p'ante hupuy tä Jericó, wet iche asnam tä iwhäye n'äyij tä tatayphä wet t'alheje t'awayhat häp wichi. ₃₆Tä ilätche wichi tä wujpey tä inukwe lhip, wet yok:

–¿Atsi tä tamenej tä wujpey wichi tä olätche tä inukwe n'äyij?

₃₇Wet wichi ifwenho tä yok:

–Jesús tä Nazaret lhele tä nekche.

₃₈Häpet tä iläte täjtso, wet ifwitsenej tä t'än wet yok:

–¡Jesús, David Lhäs, p'altsenn'o!

₃₉Wet lhamel tä ichunche n'äyij ifwone wet yok:

–¡Ch'eet!

Mat lham nem koyhyaj tä t'än wet yok:

–¡David Lhäs, p'altsenn'o!

₄₀Tä Jesús iläte, takasit wet ifwenho wichi wet yok:

–Hän alhoho.

Wet elh tachuma takwey wet ihäne. Tä nichäte, Jesús tay'ätshane tä yok:

₄₁–¿Atsi m'ak tä let'uhläk owoyej ame?

Asnam nichulho wet yok:

–Iwuk, ot'uhläk ow'enche honhat.

₄₂Wet Jesús yok:

–¡W'enche honhat! Achayaj tä aichesat.

₄₃Häpet tä mälhyejtso, asnam hiw'enche honhat, wet yikche Jesús wet iwunit Dios. Wet nilhokej wichi tä hiw'enej, häte lhamel iwunit t'at häp Dios.