Mat 15

₁Iche elhpej Fariseo lhayis lhäy'e hin'ol tä lhayen lewosayej Ley p'ante tälhe Moisés, lhamel nämhen tälhe Jerusalén wet ihoye Jesús wet yok:

₂–¿Chipte tä achufwenkay inäk'äs lhachätilis lakey? Tsi olhamel ow'en tä lhamel t'ekhen tä kamaj nilejahen takwech'ol.

₃Mat Jesús nichulho lhamel wet yok:

–Wet amel, ¿chipte tä lenäk'äs Dios lhämet tä lehänay amel akeyes? ₄Tsi Dios yok, “Humin ajcha lhäy'e ako”, wet äp yok, “Elh chik takäpfwayeje lewit'äyhyaj lajcha wok lako, is chik õ'län t'at.” ₅Mat amel lhoyaykwe, “Is t'at chik hin'o tahuyej lajcha wok lako wet yok, Okalhihit'ak ow'en amho m'ak tä aisej, tsi m'ak tä in'oyej oyen Lewuka Dios.” ₆Tä mälhyejtso, achufwenyaj ilehatche hin'o chik tach'ote lhokwey wet lenuhtayejlä amel akeyes häp Dios lhämet. ₇¡A'akantses! Is alhoho profeta Isaías lhämet p'ante yäme amel tä yok,

₁₀Wet nech'e Jesús t'äne wichi wet tahuyej tä yok:

–Lhek ch'ahuyaye olhämetna wet hanayej: ₁₁Häpkhit'a m'ak tä tiyäjche hin'o lak'aj chik kok'ayeje tä ihi tä Dios itayche. Mat m'ak tä tälhche hin'o lak'aj, häp tä tamenej hin'o wet kok'aye.

₁₂Wet lechufwenkay ihowhäye wet yok:

–¿Hä lehanej tä Fariseo lhayis tä iläte ämettso tawäkwäyhen?

₁₃Jesús nichulho wet yok:

–Häp hal'ä chik häpe chik kahäpeya Ojcha tä ipuleye tä itihi honhat, õ'tonhihila lefwetes. ₁₄Yej tach'ahuye lhamel, tsi häpehen asnamis tä yikchufwi iyhäj asnamis. Wet chik asnam yikchufwi elh tä asnam, tan'islawek chik nichäte chowej.

₁₅Pedro yok:

–Lhek íthat n'ohohen häp ämet tä lewoyene.

₁₆Wet Jesús yok:

–¡Matlhat häte amel ahusey t'unhen! ₁₇¿Hä tek lehanayej tä m'ak chik tiyäjche hin'o lak'aj äp ihoho lets'e, wet tä paj iwom? ₁₈Mat häp m'ak tä tälhche lak'aj tälho lehusek, wet häp tä hin'o kok'ayeje tä ihi tä Dios itayche. ₁₉Tsi m'ak tä tälho lehusek häpe letichunhayaj tä ni'isa, lhäy'e tä ilän elh, wet iwo lakain'oyaja, iwo lemukwehyaja, wet etantsaj, isufwkane elh, wet isitäyen. ₂₀Tähestso häp tä tamenej hin'o wet kok'aye tä ihi tä Dios itayche. Mat chik nilejahen takwech'ol tä t'ek, häpkhit'a chik kok'ayeje.

₂₁Jesús yikch'oye täjtso wet ihoye honhat lhip tä hupuy tä Tiro lhäy'e Sidón ihi. ₂₂Tä nichäte, wet iche atsinha tä Canaán lhele tä lew'et honhattso, lham ihoye Jesús wet ifwitsenej lechos tä yok:

–¡Iwuk, David Lhäs, p'altsenn'o! ¡Olhäse lhäy'e lhip tä ni'isa, ahät tä ilän!

₂₃Mat Jesús lhämet ihichet'a. Wet lechufwenkay ihowhäye wet yok:

–Chen kanhi atsinhatsi, tsi t'änlhi tä nekche lhan'äyij.

₂₄Wet Jesús nech'e yok:

–Tajlhama tson'atas tä tatäywethä tä häpe Israel lhayis, häp tä Dios ichen n'oye.

₂₅Mat atsinha takhoschufwi wet yok:

–¡Iwuk, ch'ot n'oye!

₂₆Jesús nichulho wet yok:

–Isit'ak õ'soyej iyhäj tä n'oles häp pan wet õhw'enho asinhäs.

₂₇Atsinha yok:

–Matche, Iwuk, mat tej tä asinhäs, tujfwas t'at lewuhuy lhäk lhipey tä natchä tä tälhpe mesa.

₂₈Tä Jesús iläte lhämettso, wet yok:

–¡Atsinha, wuj achayaj! Is chik i'amej m'ak tä lewatlä.

Häpet tä iwoyetso, lhäse iches t'at.

₂₉Jesús yikch'oye täjtso wet inukwe lhip häp lewomek tä Galilea. Wet iho'pe chenaj wet tatayphä, ₃₀wet wujpey wichi tä ihoye, lhamel ihäne tsufwlas lhäy'e asnamis, lhäy'e elhpej tä takwey wok takälä t'oy, lhäy'e isukis, lhäy'e wujpe iyhäj t'inhayaj länhay. Wet itiwhäye Jesús lepach'ol wet lham ichesthen. ₃₁Wet wichi wuj tä iseltejen tä hiw'en tä nech'e tahuyhen häp isukis, wet elhpej tä takwey wok takälä t'oy iches t'at, wet tsufwlas nech'e w'elekwethä wet asnamis hiw'enchehen honhat. Wet häp tä wichi iwunit Israel lhayis laka Dios.

₃₂Jesús t'äne lechufwenkay wet yok:

–Wuj tä op'altsen häp wichina, tsi nech'e tres fwalas tä in'oyej wet nojche lhäk tä hiw'en. Tek ot'uhläk ochen lew'etese tä nichuyuhen, tsi elat nichätche katsi chik ihi n'äyij.

₃₃Mat lechufwenkay yok:

–¿Chi y'atälhthi pan tä w'awulhej häp wichi tä wujna tä y'ehi lhip tä mälhyejna atofwe?

₃₄Wet Jesús tay'ätshane lhamel wet yok:

–¿Chihätefwas pan tä lew'enay?

Lhamel yok:

–Siete, lhäy'e iyhäjfwas w'ahat tä lelemsas.

₃₅Wet lham ne'tek wichi tatachephä honhate, ₃₆wet tachuma pan tä ihi siete lhäy'e w'ahat, wet iwo graciasayej Dios. Tä ileyej, wet hich'esajen wet hiw'enhomche lechufwenkay, wet lhamel hiw'enhomche wichi. ₃₇Wet nilhokej t'ekhen yäk yipsejen. Wet lechufwenkay tachuma lhäk lhipey tä imälhehi, wet ihanche siete lehis tuskalis tä õyenlhi tä tapokwe. ₃₈Iche cuatro mil hin'ol tä t'ekhen, häte iche atsinhay lhäy'e nä'tshas.

₃₉Tä tajyäme täjtso, Jesús iwo tsilhekayej wichi wet tiyäjo chalana wet ihoye honhat lhip tä lhey Magadán.