Jesús lhämet tä itech'aynej chumhas
1“Häp Dios Niyatyaj hätet iwoye täja: Iche hin'o tä yik tä nech'e fwala tä t'ukwe lechumyenhay yämthilek tachumwethä tä ihi lelafwek. 2Tä hiw'en, ifwenho laha tä tiskanpe fwala weihalha, wet tä lhamel yok, Is t'at, wet ichene lhamel häp lechumet.
3“Wet tä fwala tojche yachajo tä yik. Tä nichäte hupuy, hiw'en iyhäj tä takasit'atwethä tä naj lechumeta. 4Wet tahuyej lhamel wet yok, Häte amel hoyaye olafwek, chumwethä, ow'enla amhohen laha tä is. Wet lhamel yikhen tä ihoye lechumet.
5“Wet tä fwala ihi lechowej lewuk yachajo tä yik, lhäy'e tä fwala itayhchä, wet t'äneje lechumet iyhäj. 6Wet tä honaj yachajo tä yik, wet hiw'en iyhäj tä takasit'atwethä, niwohit m'ak che iwoye. Wet tay'ätshane lhamel wet yok, ¿Chipte tä mälhewek fwala tä lheyayhi täja wet letakasit'atwethä?
7“Lhamel nichulho wet yok, Häp tä newache elh che ichumyenwethä olhamel.
“Wet lham yok, Tä mälhyejtso, häte amel hoyaye olafwek, chumwethä.
8“Tä fwala y'uy lewuk tahuyej häp elh tä t'uye lechumet wet yok, Äne chumhas wet wo lahaya. Chunkat häp iyhäj tä imälhnhen tä tiyäjo lechumet, pajla'tha lechäte iyhäj tä ichun mathi.
9“Tä mälhyejtso, nämhen iyhäj tä iwo tesa lechumet tä honaj, wet elhpej ikatej lakaha tä w'awulho fwala mälhewek. 10Wet tä nämhen iyhäj tä tachumwethä tälhe tä nech'e fwala, lhamel yenek lakaha inuhla'pe iyhäj, mat elhpej ikatej lakaha tä w'awulho fwala weihalha. 11Tä hiw'en tä mälhyejtso, lhamel inokwajejlhi lewuk 12wet yok, Häp lhamel tä nämho lechumet tä lepes t'at fwala wet tachumwethä hora weihalhafwaj. Mat m'ak tä lew'enho lhamel w'awulhej t'at olhamel okaha tä otchumwethä fwala mälhewek wet wuj tä oteläytej nahayoj.
13“Mat lewuk nichulho elh lhamel wet yok, Yaelh, ihichet'a m'ak che ni'isa tä owoyej ame. Tä ot'änmat ame, ofwelmat amho laha tä otiskanpe fwala weihalha, wet lhomatkwe, Is t'at. 14Tä mälhyejtso, chuma akaha wet mäh. Olham ot'uhläk ow'awlhatej akaha häp elh tä lepes lakaha. 15Olewuk t'at oka kolhki wet owoyeje m'ak tä owoyeje. Wok ¿hä lechuwet n'oye'pe m'ak tä is tä owoye?”
16Wet Jesús y'isej lhämet tä yok:
–Mälhhiyejattso, lhamel tä imälhnhen ichunla, wet lhamel tä ichun imälhnhihena.
Nech'e tres tä Jesús yäme lham t'ilek
17Tä Jesús inukwe len'äyij tä tataye Jerusalén, ihänej kanhi lechufwenkay tä ihi doce wet yok:
18–Lhek yahinya, y'ahoye Jerusalén, wet õyachajiyela Hin'o Lhäs häp sacerdotes tä len'ohyajay ihiche lhäy'e häp hin'ol tä lhayen lewosayej Ley p'ante tälhe Moisés. Lhamel ne'tehlak õ'län, 19wet yachajiyela häp Romano lhayis yämthilek itiyej leläkwyhanyaj wet itasin wet hip'ajtej cruz. Mat chik fwalas tres inuhiphäla tä tälho n'op'itseyhay.
M'ak tä Santiago lhäy'e Juan lhamel lako t'alhe
20Häp Zebedeo lech'efwa ihoye Jesús wet ichäj lhamche leles, häp Santiago lhäy'e Juan. Wet atsinhatso itsinen lakamchetey tä ihi tä Jesús itayche wet t'alheje m'ayek. 21Jesús yok:
–¿Atsi m'ak tä häpe tä lewatlä?
Lham yok:
–Che lhehi Aniyatyaj, w'enho len'ohyaj oles, is che elh tumej afwomkat wet elh tumej hats'amkat.
22Mat Jesús nichulho wet yok:
–Lehanhiyejt'a m'ak tä let'alhe amel. ¿Hä lekalhayhi che leyähiyeja häp n'olhät tä tapay che olham oyähiyeja?
Lhamel yok:
–Okalhi.
23Wet Jesús ifwenho lhamel wet yok:
–Matche t'at, leyähiyeja olhät tä tapay tsi amälhhiyejat iwoye olham tä oteläythayaj ihi. Mat elh che ihi olhip tä ofwomkat wet elh che ihi ots'amkat, olhamhit'ak otshupyene. Tajlhama Ojcha tä hiw'enhihola lew'etesna häp iyhäj tä lham pajche iwaklhatho.
24Tä lechufwenkay iyhäj tä ihi diez iläte Santiago lhäy'e Juan, lhamel nichuwetehen. 25Mat Jesús t'äne nilhokej lhamel wet tahuyej tä yok:
–Lehanayej tä wichi tä ihiche honhates, lhamel laka niyatey lhaiwujyenejpe wet häp n'owustas lhayen lewuhuya. 26Mat amel isit'ak amälhyayej iwoye lhamel. Oyok, elh amel che t'uhläk inu atapehen, is che lhayen akawoya, 27wet elh che t'uhläk niyat amejen, is che lhayen akweneka. 28Tsi häp tä mälhyej'attso Hin'o Lhäs, näm wet yenhit'a lakawosa wichi, mat lhayen wichi lakawoya, wet iwom lew'atshancheyaj tä lhayen lahayayej wujpe wichi.
Jesús hiw'enyenche honhat asnamis täkwfwas
29Tä lhamel yikch'oye hupuy tä Jericó, wujpe wichi tä ihän Jesús. 30Wet iche täkwfwas hin'ol tä asnamis tä itaychephä tä ihi n'äyij lhip. Wet tä ilätch'oye tä Jesús nekche n'äyij, wet t'änhen tä yok:
–¡Iwuk, David Lhäs, p'altsen n'ohen!
31Wet wichi ifwone wet yok:
–¡Ch'eet!
Mat lhamel nem koyhyaj tä t'än tä yok:
–¡Iwuk, David Lhäs, p'altsen n'ohen!
32Tä Jesús iläte, takasit wet t'äne lhamel, wet tay'ätshane wet yok:
–¿Atsi m'ak tä let'uyayhläk owoyej amehen?
33Lhamel nichulho wet yok:
–Iwuk, ot'uhläk ow'enchehen honhat.
34Wet Jesús hip'altsen wet tachumpe tatelhoy. Wet yofwajkwet lhamel hiw'enchehen honhat wet yikche.
