Mat 21

₁Tä Jesús lhäy'e lechufwenkay tott'aye p'ante Jerusalén, nichätho hupuy tä niwuja tä lhey Betfagé tä ihi lhip chenaj tä lhey Oliwachat. Wet Jesús ichen täkwfwas lhamel ₂wet ifwenhomche tä yok:

–Mäyay hoyaye häp wichi tä y'attaye l'ini, wet chik lechätaye, lew'enla asno tä õ'nayhit, lhäy'e lhäsaj. Lanhila wet chäja n'oye. ₃Wet chik iche elh chik yok, “¿Chipte tä lelanhi?”, olak, “Lhawuk tä iwatlä, mat inachajila.”

₄Wet mälhyejtso tä lhayäm matche profeta lhämet p'ante yok:

₆Wet lechufwenkay yikhen, iwoye t'at m'ak tä Jesús ne'tek iwoye, ₇ichäj alhoho asno lhäy'e lhäsaj, wet iti'pe lew'uyes wet nech'e Jesús i'pe. ₈Wet wujpe wichi tä hich'enche lew'uyes häp n'äyij, wet iyhäj yisthen hal'ä pesey wet hich'enche n'äyij. ₉Wet häp lhamel tä ichunch'oye lhäy'e iyhäj tä imälheche len'äyij, lhamel t'änhen wet yok:

–¡Lewujyaj ihi David Lhäs! ¡Is chik Lhawuk itiyej lakäpfwayaj tä is häp hin'o tä näm tä Lhawuk lhämetej! ¡Lewujyaj ihi Dios tä ipuleye!

₁₀Tä Jesús tiyäjo Jerusalén, nilhokej wichi iwo huyaja wet yok:

–¿Atsi hin'o tä häpe täja?

₁₁Wet iyhäj nichulho wet yok:

–Häpe profeta Jesús tä lew'et Nazaret tä Galilea lhip.

₁₂Wet Jesús tiyäjo Dios Lew'et wet yokwesphä nilhokej lhamel tä ihi tä iwom lhäy'e tä ichäj m'ayhay. Wet itilhkatchehchä mesas tä lewuk lhamel tä iwo iyhäjahi kolhki, lhäy'e häp lew'etes tä iyej lhamel tä iwom hokwinhas. ₁₃Wet tahuyej lhamel tä yok:

–Häp Dios lhämet tä ihi Lehi yok, “Ow'et lheyla N'ot'alhyaj tä Lew'et.” ¡Matkat amel lhenayp'at etantsesw'eta!

₁₄Tä Jesús kamaj ihi Dios Lew'et, asnamis lhäy'e tsufwlas ihoye wet lham ichesthen. ₁₅Wet nä'tshas tä ihi t'änhen tä iwunit Jesús wet yok:

–¡Lewujyaj ihi David Lhäs!

Matkat häp sacerdotes tä len'ohyajay ihiche, lhäy'e hin'ol tä lhayen lewosayej Ley p'ante tälhe Moisés, tä lhamel iläte nä'tshas lhämtesna wet hiw'enej m'ak tä isentso tä Jesús yenlhi, lhamel lewäk ihi ₁₆wet tahuyej Jesús wet yok:

–¿Hä leläte m'ak tä lhamel yäme?

Jesús nichulho wet yok:

–Ey'a, oläte t'at. Mat ¿hä tek leyahyenay häp n'olhämet p'ante ihi Lehi tä yäme täja? Yokwe,

₁₇Wet Jesús ileyej lhamel wet yikch'oye hupuy, ihoye Betania wet ihi honatsitso.

₁₈Tä nech'e fwala tä Jesús yäple Jerusalén, wet nichuyu. ₁₉Tä yik, hiw'ene higo lhile tä iwhäye n'äyij, wet ihoye mat hiw'enhit'a lhay chik ihi, tajlhamet lew'oley. Wet tahuye wet yok:

–¡Äp ihichet'alak lewo aya!

Häpet tä iwoyetso, wet tamchäy.

₂₀Tä lechufwenkay hiw'en, wuj tä iseltejen, wet tay'ätshane Jesús wet yok:

–¿Chipte tä yofwajkwet tamchäy?

₂₁Lham nichulho lhamel wet yok:

–Matche tä ofwel amhohen, Chik newache akachuhanyaj wet achayaj ihi, lehanhiyeja lewoyneje chik lhenlhi m'ak tä olham owoyeje higo lhiletso. Wet tajlhamhiyet'a täjtso, mat häte chik letahuye chenajni chik lhok, “¡Mäch'oye tä lhehi, athat inäte!”, wet matche, mälhhiyejattso. ₂₂Wet m'ak at chik häpe chik achayaj iyeji tä let'alheje Dios, lekathiyeja.

₂₃Tä tajyäme täjtso, Jesús ihoho Dios Lew'et wet iwo lechufwenyaja. Wet sacerdotes tä len'ohyajay ihiche lhäy'e hin'ol tä thänhäy, lhamel ihoye wet tay'ätshane tä yok:

–¿Chi tälhe han'ohyaj tä lewoye m'ayhay tä lhenlhitso? ¿Atsi tä hiw'en amho?

_24-25Jesús nichulho wet yok:

–Häte iche m'ak tä olham oty'ätshanej amehen. ¿Chi tälhe Juan Bautista len'ohyaj tä ibautisaynhente wichi? ¿Hä tälhe Dios wok hin'ol? Chik lechulhay n'oho, häte olham ofwenla amhohen elh tä on'ohyaj tälhe tä owoye m'ayhay tä oyenlhitso.

Tä lhamel iläte, yämwethä lhamhohen tä yok:

–¿Atsi m'ak tä y'awoye? Chik y'ok, “Tälhe Dios”, wet lham yohlak, “Tä mälhyejtso, ¿chipte tä kachayaye?” ₂₆Wet y'akalhihit'a chik y'ok, “Tälhe hin'ol”, tsi y'anowaye wichi, häp tä nilhokej lhamel ihumin Juan wet fwetaj matche tä häpe profeta.

₂₇Tä mälhyejtso, lhamel nichulho Jesús wet yok:

–Ohanhiyejt'a.

Wet Jesús yok:

–Tä mälhyejtso, olham häte tek ofwel amhohen elh tä on'ohyaj tälhe tä owoye m'ayhay tä oyenlhitso.

₂₈“¿Chiwoye amel atichunhayaj? Iche hin'o tä leles täkwfwas, wet ihoye lhäs elh wet yok, Yäs, mäh hoye olafwek wet chumlhi.

₂₉“Lhäs nichulho wet yok, Ohohiyet'a.

“Mat tä paj iwo elha letichunhayaj, wet yik t'at tä ihoye lajcha lelafwek.

₃₀“Wet nech'e hin'otso ihoye lhäs elh wet yok, Häte am hoye olafwek wet chumlhi.

“Lhäs nichulho wet yok, Eh, ohohiyela.

“Mat ihohiyet'a. ₃₁¿Atsi elh tä häpe häp lhamelna tä iwoye m'ak tä lajcha ihuminche?”

Lhamel nichulho wet yok,

–Häpe t'at elh tä ichun.

Wet nech'e Jesús yok:

–Matche tä ofwel amhohen, Häp hin'ol tä lechumet impuestos tä Romano lhayis t'alhpe, lhäy'e atsinhay tä kain'oyaj länhay, lhamel ichun ahilähen tä nichätho Dios Niyatyaj. ₃₂Tsi Juan Bautista näm wet ipäyen amehen n'äyij yämlek lewoyaye m'ak tä is alhoho, mat tek lechayaye. Matkat lhamel tä lechumet impuestos, lhäy'e kain'oyaj länhay, lhamel ichaye t'at. Wet amel, tej tä lew'enay täjtso, tek lewoyay ahusey iyhäja yämlek lechayaye.

₃₃“Lhek ch'ahuyaye olhämet elhna: Iche hin'o tä yenlhi lelafwek wet itihchä uva, wet äp tijo tunte tä yen lehiya t'i, wet häte äp yenlhi hup tä atojphä yämlek elh tä t'uye nilhokej ihi. Tä wak'alh, hiw'enho ayej häp chumhas, ne'tek ichumyenlhi, wet lham yik tä ihoye honhat elh. ₃₄Tä taj lewhäy tä y'o uvas, ichen lakawos, ne'tek yike m'ak tä chumhas hiw'enhatej. ₃₅Mat tä nichäte, chumhas itsokwethä wet ipäjlhi elh, wet ilän elh, wet ithatej tuntey häp elh. ₃₆Wet lewuk ichen iyhäj tä nitäkw, inu'pe lakawos tä ichun. Mat tä nichäte lewuk lechumet, chumhas itech'aynej iyhäj.

₃₇“Ilepese lewuk ichen lhäs, tsi letichunhayaj yok, Lhamel tek yenla w'et m'ayeka, tsi olhäs t'at.

₃₈“Mat tä chumhas hiw'enlä, yok, Häp täjtsi hin'o tä lewukla honhatna. ¡Mäh n'alän wet n'alewuhuyla!

₃₉“Wet lhamel itsoklhi wet ithat w'echehi n'olafwek wet ilän.”

₄₀Wet nech'e Jesús äp yok:

–Tä mälhyejtso, chik lewuk ihoye lelafwek, ¿atsi m'ak tä lefwetajay iwohiyejela häp chumhastso?

₄₁Lhamel nichulho wet yok:

–Itäyhthihena hin'ol tä ni'isahentso wet iwohla lewos iyhäja lechumet, yachajiyela hin'ol tä hiw'enhihopeja lhay chik nichäte lewhäy yachuyaj.

₄₂Wet Jesús äp yok:

–¿Hä tek leyahyenay häp Dios lhämet tä ihi Lehi tä yok,

₄₅Häp sacerdotes tä len'ohyajay ihiche, lhäy'e Fariseo lhayis, tä lhamel iläte Jesús lhämtes tä itech'aynej tähestso, nitäfwelej t'at tä yäme lhamel. ₄₆Wet t'uhläk itsoklhi, mat ikalhihit'a, tsi nowaye wichi tä yen profetaya.