M'ak tä Jesús imenyenej Fariseo lhayis lhäy'e hin'ol tä lhayen lewosayej Ley p'ante tälhe Moisés
1Tä tajyäme täjtso, Jesús tahuyej lechufwenkay lhäy'e wichi wet yok:
2–Häp Fariseo lhayis lhäy'e hin'ol tä lhayen lewosayej Ley p'ante tälhe Moisés, lhamel itayhiphä Moisés len'ohyaj p'ante yämlek y'ithatho wichi häp Leytso. 3Tä mälhyejtso, n'olhämet at chik häpe chik lhamel ne'tek let'amajayej, amajej t'at wet woye. Mat yej ten lhamel lakeyes, tsi tej tä lhamel yäme m'ak tä is alhoho, mat lhamel iwohiyet'a. 4Yäytejwethä iyhäj lelhuy tä choyhthen wet ikalhihit'a chik yikchufwi, wok oyok, lechufwenyajay tä iyhäj nikalhahi chik iwoye. Wet lhamel tek hich'otyeneje lefwuj yämlek ineyhatphä.
5“Iwoye m'ak chik häpe wet t'uhläk wichi iyahin. Yäm wus m'ak tä itech'aynej lhamis tä Dios lhämet lhipey ihi wet inayhtej letachol lhäy'e takweyey. Wet häte yäm wusche lew'uyes lhawol. 6Tä ihoye n'okäjyajay, iwatlä lew'etes tä isis, wet tä ihi n'ohusew'etes, ihumin lew'etes tä t'uhläk nilhokej wichi hiw'en. 7T'upejläk wichi n'okwiyej tä hiw'enlä wet itiyej lewujyaj wet yopejkwe, Maestro.
8“Mat amel yej watläk wichi yäm amehen wet yok, Maestro. Tsi alepuhfwaswek wet weihalha aka Maestro. 9Häte chik lhäme aelh chik häpe tä ihonhatena, yej lhoyaykwe, Olhamel Ojcha. Tsi weihalha Ajchayay, häpe t'at lham tä ipuleye. 10Wet yej alhenaye iyhäj chik wichi yäme wet yopejkwe, Häp tä owuk. Tsi weihalha Awuk, häpe t'at Cristo. 11Häp elh tä lewujyaj ihi tä i'amejen, is chik lhayen akawoya. 12Tsi elh chik häpe chik lhaiwujyen, õyenla w'et m'ayeka, wet elh chik lhayen w'et m'ayeka, õ'wujyenla.”
Äytajche Jesús lhämet tä itiyej Fariseo lhayis lhäy'e hin'ol tä lhayen lewosayej Ley p'ante tälhe Moisés
13Wet Jesús äp yok:
–¡Awit'äy ihla amejen, Fariseo lhayis lhäy'e amel tä alewos Ley p'ante tälhe Moisés! ¡A'akantses! Lep'oyayhi Dios Niyatyaj lepe yämlek wichi nitiyäjaho. Häte amel tek letiyäjayho, wet len'äyejo lhamel tä t'uhläk tiyäjo.
15“¡Awit'äy ihla amejen, Fariseo lhayis lhäy'e amel tä alewos Ley p'ante tälhe Moisés! ¡A'akantses! Lenuyaykwe honhat lhäy'e lewomekitaj yämlek lekalhi weihalhafwaj hin'o wet lechufwenej amel achumyaj. ¡Wet tä lekalhi, letamenayej tä nech'e häpe elh tä inu'pe amel tä t'uhawet amejen chik õ'that amhohen n'oteläythayaj tä t'un lew'et!
16“¡Awit'äy ihla amejen, n'äyijwos tä asnamis! Chik iche elh tä hit'unhatche lhämet wet iwo lheya Dios Lew'et tä ihi Jerusalénna, wet amel lhoyaykwe, Laha ihihit'a lhämettso. Mat häp elh tä hit'unhatche lhämet wet iwo lheya oro tä ihi Dios Lew'et, wet lhoyaykwe, Laha ihi t'at lhämettso, iwohiyet'ak näma matche. 17¡Ach'isukwis wet a'asnamis t'at! ¿Atsi m'ak tä lhäy'e lhip tä laha ihi? ¿Oro, wok Dios Lew'et tä häp tä tamenej tä nech'e n'ot'amajchet oro? 18Häte chik iche elh tä hit'unhatche lhämet wet iwo lheya altar, wet amel lhoyaykwe, Laha ihihit'a lhämettso. Mat häp elh tä hit'unhatche lhämet wet iwo lheya Dios t'awayhat tä i'pe altar, wet lhoyaykwe, Laha ihi t'at lhämettso, iwohiyet'ak näma matche. 19¡A'asnamis! ¿Atsi m'ak tä lhäy'e lhip tä laha ihi? ¿Dios t'awayhat, wok altar tä häp tä tamenej tä nech'e n'ot'amajchet Dios t'awayhat? 20Elh chik hit'untejche lhämet häp altar, ts'ilakhit'a altar mat häte nilhokej m'ayhay tä i'pe. 21Wet elh chik hit'untejche lhämet Dios Lew'et, ts'ilakhit'a Dios Lew'et mat häte Dios tä ihi. 22Wet elh chik hit'untejche lhämet pule, häte hit'untejche lhämet Dios niyatyaj tä ihi lhäy'e lham Dios tä itayphä'pe.
23“¡Awit'äy ihla amejen, Fariseo lhayis lhäy'e amel tä alewos Ley p'ante tälhe Moisés! ¡A'akantses! Tsi tej tä lelemsas m'ayhay, mat lew'enhatay lhip tä tälhe, mälhyej menta lhäy'e anís lhäy'e comino, wet lhenay aka diezmoya yämlek lew'enho Dios. Mat tek lewoyaye n'ochufwenyaj tä lhäy'e lhip tä laha ihi tä ihi Dios lhämet, tä häpe n'o'isyaj lhäy'e n'op'altsenyaj lhäy'e n'ohumnhayaj. Tähesna häp tä is chik lewoyaye, wet häte yej leyayej tä lhenlhi diezmo lhäy'e m'ayhay iyhäj tä isen. 24¡Ahäpehen n'äyijwos tä asnamis! ¡Letonphä k'atak tä ihi ät, mat letim camello tä wujtaj!
25“¡Awit'äy ihla amejen, Fariseo lhayis lhäy'e amel tä alewos Ley p'ante tälhe Moisés! ¡A'akantses! Lelejaywethä tä tumphä häp äthis lhäy'e äkhis, mat ilech'oye tapoyej akänyajay tä ni'isa lhäy'e m'ak tä etanhat. 26¡Ahäpe Fariseo tä asnam! ¡Chunkat lech'o tä lelej häp äthi lhäy'e äkhi, häpkhilek häte nech'e is lhip tä tumphä!
27“¡Awit'äy ihla amejen, Fariseo lhayis lhäy'e amel tä alewos Ley p'ante tälhe Moisés! ¡A'akantses! Amälhyayej at iwoye n'op'itseyhay lehis tä õ'pelnhathen, wuj tä isis tä tumphä, mat n'op'itsek lhiley tapokwe lhäy'e m'ak tä kok'aye. 28Amel amälhyejen'attso. Tumphä hätet iwoyek ahäpehen iyhäj tä isen, mat akanyajay lhäy'e m'ak tä ni'isachehen tapokwe ahusey.
29“¡Awit'äy ihla amejen, Fariseo lhayis lhäy'e amel tä alewos Ley p'ante tälhe Moisés! ¡A'akantses! Lhenaywethä profetas p'itseyhay lehis wet lesilatyenhen lep'itseyhay lehis häp hin'ol tä lehusey ihi, 30wet nech'e lhoyaykwe, Chik olhamel oihihi p'ante fwalas tä lhachätilis ihi, tek olhamtejiyej p'ante tä ilänhen profetas. 31¡Ämtestso alekalelhät tä ahäpehen leles häp lhamel p'ante ilänhen profetas! 32¡Tä mälhyejtso huwa, ämay wak'alh m'ak tä achätilis p'ante iwo tesa!
33¡“Ahäpehen amlhätas, tsi amlhäs tä aleles! ¿Hä lefwetaj letafwayhiyeja n'otasnhayaj tä häpe itäj tä n'oma? 34Wet täjtso häpkhilek tamenej chik ochenla amehen profetas, lhäy'e hin'ol tä ihan honhatejen, lhäy'e ochufwenyaj lewos. Mat amel lelänhihena, wet elhpej lhamel lep'ajthiyeja cruz, iyhäj letasnhilawethä chik ihiche aka n'ohusew'etes, lehänlawethä tä fwetaj ilethane hupuy yämlek letiyej aka'tshayaj. 35Tä mälhyejtso, Dios yenla tesa amejen nilhokej wichi tä isen tä pajche õ'länhen, tälhe Abel, häp hin'o tä is alhoho, yäk nichäte Zacarías, Berequías lhäs, tä amel lelänay p'ante tä ihi altar lhip tä tumejlä Dios Lewukwech'o Elh tä N'ot'amajchet. 36Matche tä ofwel amhohen, Nilhokej tähestso tamenhiyeja wichi tä ihi fwalasna chik n'otasnhayaj nichätpe.
Jesús yen lhakliya Jerusalén
37“¡Jerusalén, Jerusalén, lelänhen t'at profetas wet lethatejwethä tuntey Dios kasilätwos tä ichen ame! ¡Wujpe tä ot'upejläk ohut lhamej ales, mälhyej ho'o tä ihutchufwi lelesas häp lhefwis, mat lewohiyet'a! 38Lhek yahinya, niwohit elh chik ihihla haw'et. 39Wet ofwel amhohen, nemla lew'enayn'o pajla'tha nichäte lewhäy chik lhoyayhlakwe, ¡Is chik Lhawuk itiyej lakäpfwayaj tä is häp hin'o tä näm tä Lhawuk lhämetej!”
