Mat 22

₁Jesús yachajo tä tahuyej lhamel wet itech'aynej lhämet täja wet yok:

₂–Häp Dios Niyatyaj hätet iwoye täja: Iche niyat tä iwo käjyaja'pe lhäs tä tawhayey. ₃Wet ichen lakawos, ne'tek ihoyehen wichi tä lham t'äneje lakäjyaj, mat wichitso ihohiyet'a. ₄Wet yachajo tä ichen lakawos iyhäj wet yok, “Fwenhola olhämetna häp lhamel tä ot'äne, olak, Wak'alh n'olhäk, pajche õ'länhen w'asetas tä yätajen, wet nilhokej wak'alh t'at. Lhuyay, hoyay n'oye tä owo okäjyaja'pe olhäs tä tawhayey.”

₅“Mat häp lhamel tä niyat t'änetso ihohiyet'a. Elh ihoye lelafwek, wet elh ihoye lechumet, ₆wet iyhäj itsokwethä häp niyat lakawos wet ipäjwethä yäk y'inhen. ₇Tä niyat iläte, wuj tä lewäk ihi wet ichen laka sip'äl, ne'tek ilänhen anikoyistso wet iwunho häp hupuy tä lew'et. ₈Wet nech'e tahuyej lakawos iyhäj wet yok, Nilhokej wak'alh t'at yämthilek owo okäjyaja'pe olhäs tä tawhayey, mat häp lhamel tä pajche ot'äneje t'uhawethiyejt'a. ₉Tä mälhyejtso, amel hoyaye hupuy kawayhil tä wichi letajwet, wet elh at che häpe che lew'en äneje okäjyaj.

₁₀“Wet lakawos yikhen tä ihoye hup kawayhil, wet ihutwek nilhokej wichi tä nichutej, häp iyhäj tä isen lhäy'e iyhäj tä ni'isahen. Wet nech'e wichi tapoyej häp hup tä n'okäjyaj ihi.

₁₁“Tä paj niyat ihochufwi huptso, t'uhläk itetshan lhamel. Wet hiw'en hin'o tä nitw'uyahi lew'uy tä isilataj, ₁₂wet tay'ätshane tä yok, Yaelh, ¿chipte tä leho kana wet kaw'uyahi haw'uy tä t'uhawetej tä lhehi okäjyajna?

“Mat hin'otso yok tam. ₁₃Wet niyat tahuyej lakawos wet yok, Äythen takweyey lhäy'e takäläy wet thate honataj tä alhoye, häpkhilek ihi lhafwyhayaj wet wuj tä äytaj.”

₁₄Wet Jesús y'isej lhämet tä yok:

–Matche, wujpe wichi tä Dios t'äneje Leniyatyaj, mat wujit'a'pe lhamel tä nichätho.

₁₅Tä tajyäme täjtso, Fariseo lhayis yikhen wet y'ajwek lehusey tä tay'ätshane Jesús, yämthilek iche lhämet che lhamel yen tesayej. ₁₆Tä mälhyejtso, ichene Jesús elhpej lhamel lechufwenkay, lhäy'e iyhäj tä ihän Herodes lhayis. Tä lhamel nichäte, tahuyej tä yok:

–Maestro, olhamel ohanej tä ahäpe hin'o tä matche m'ak tä lhäme, wet nehit katsik lenowaye, wet tek letetshan hin'ol tä fwetaj häpehen iyhäj tä isen, mat lechufwenej t'at wichi m'ak tä Dios ne'tek lhamel iwoye. ₁₇Tä mälhyejtso, fwel n'ohohen atichunhayaj. ¿Hä is t'at tä otis häp niyat Romano tä t'alhpe impuestos, wok kha?

₁₈Mat Jesús nitäfwelej tä lhamel fwetaj ikanej, wet yok:

–¡A'akantses! ¿Chipte tä lhelhtay n'oye? ₁₉Lhek päyen n'oye chinaj t'äj tä õtiskanejpe impuesto.

Wet lhamel ichäje, ₂₀wet lham tay'ätshane tä yok:

–¿Atsi tä lepeyak lhäy'e lhey tä i'pe?

₂₁Lhamel nichulho wet yok:

–Häpe t'at niyat Romano.

Wet Jesús yok:

–Tä mälhyejtso, achaje niyat Romano häp m'ak tä lewuk, mat achaje Dios häp m'ak tä Lewuk lham Dios.

₂₂Tä lhamel iläte lhämettso, wuj tä iseltejen. Wet ileyej wet yikhen.

₂₃Iche p'ante Judío lhayis iyhäj tä lhey Saduceo lhayis, fwetaj n'op'itseyhay ninuyakwephä. Wet ifwalatso elhpej lhamel ihoye Jesús wet yok: ₂₄–Maestro, häp Moisés lhämet yop'antekwe, “Che hin'o ileyej honhat mat leles ihihit'a, t'uhawetej che lech'inij icheyäjo lew'et wet yen ch'efwaya häp tesa, yämthilek iche leles tä tälhe elh tä pajche y'il.” ₂₅Tä mälhyejtso, iche p'ante siete hin'ol tä lhalepuhfwas tä in'oyejen. Wet elh tä ichun iwo lech'efwaya, mat tä ileyej honhat wet leles ihihit'a. Wet lech'inij tä ichunche äp iyej laka tesa, ₂₆mat häte tä ileyej honhat wet leles ihihit'a. Wet äp lech'inij elh äp iyej, mat äp hätet iwoye lechilalis. Wet mälhyej p'antetso pajtha nofwej häp lhamel tä ihi siete, mat niwohit elh che leles ihi. ₂₇Tä lepese atsinha häte ileyej honhat. ₂₈Tä mälhyej'attso, tä wichi yäme tä inuhikwephäla häp n'op'itseyhay yämthilek äp yachajo che iläyhen, ¿atsihila elh lhamel tä siete tä atsinhana lech'efwa? Tsi pajche nilhokej lhamel tä iyej.

₂₉Jesús nichulho lhamel wet yok:

–Lewetahen amel, tsi letäfwenhiyejt'a Dios lhämtes tä ihi Lehi lhäy'e häp Dios lakhajyhayaj. ₃₀Tsi che inukwephä n'op'itseyhay, hin'ol lhäy'e atsinhay nemla tawhayeyhen, häp tä mälhhiyeja iwoye häp ángeles tä ipuleye. ₃₁Wet tä õyäme tä n'op'itseyhay inukwephä, ¿hä tek leyahyenay m'ak tä Dios ifwel amhohen tä yok, ₃₂“Ohäpe Abraham laka Dios, Isaac laka Dios, wet Jacob laka Dios”? Wet häp tä mälhyejtso, Dios häpe t'at wichi tä iläyhen laka Dios, tej tä pajche lhamel ileyej honhat.

₃₃Tä wichi iläte täja, wet lhäy'e lhip tä iseltejen Jesús lechufwenyaj.

₃₄Tä Fariseo lhayis ihanch'oye tä Saduceo lhayis ihanhiyejt'a lhämet che nichulhejlä häp Jesús, wet häp tä lhaihutwek lhamel. ₃₅Wet elh lhamel tä häpe lewo Ley p'ante tälhe Moisés, ihoye Jesús wet fwetaj yelhteje tä tay'ätshane tä yok:

₃₆–Maestro, ¿atsi Dios lhämet tä lhäy'e lhip tä laha ihi tä iyej lhämtes iyhäj?

₃₇Jesús nichulho wet yok:

–“Humin Awuk Dios, mälhewek ahusek, lhäy'e mälhewek atichunhayaj.” ₃₈Häp täja Dios lhämet tä lhamya tä inu'pe iyhäj. ₃₉Wet elh häte iwoye, yok, “Humin aelh, tech'ayen amej tä alehumin.” ₄₀Häp Dios lhämtesna, häp tä nilhokej Ley p'ante tälhe Moisés lhäy'e profetas chufwenyajay lefwetes.

₄₁Tä Fariseo lhayis kamaj lhaihutwek, Jesús tay'ätshane tä yok:

₄₂–¿Cho atichunhayaj häpet N'ofwayhthi tä Dios Chenek? ¿Atsi tä lhenayek tälhe?

Lhamel yok:

–Tälhe David.

₄₃Wet Jesús yok:

–Che mälhyejtso, ¿chip iwoye tä Dios laka Espíritu lhaithatho p'ante David wet yämyenlhi tä yok, “Owuk”? Tsi lhämet yok,

₄₆Wet nehit katsik ihanej lhämet che nichulhejlä häp Jesús, wet tälhe ifwalatso ihichet'a elh che tektshaneje yämthilek tay'ätshaneje m'ak at che häpe.