Mar 1

₁Häp täja letes Dios Silätyaj tä Is tä yäme Jesucristo, Dios Lhäs.

₂Dios yäm matche lhämet tä profeta Isaías ilesayen p'ante tä yok:

₄Iche p'ante hin'o tä lhey Juan, lham ihi häp ts'anis tä ibautisaynhen wichi wet ifwenhopej lhamel wet yok:

–Woyay ahusey iyhäja wet abautisaynhen, häpkhilek Dios itäyhat amejen hach'isukyajay.

₅Wet wujpe wichi tä tälho Judea lhäy'e hupuy tä Jerusalén, lhamel ihoye Juan wet lhaifwelejen lech'isukyajay, wet lham ibautisaynhi tewok tä Jordán.

₆Lew'uy häpe t'at n'oyik tä camello w'ole, wet yen kawaka tsänt'äj lhip, wet m'ak tä yen lhäka häpe t'at chol lhäy'e akäyek. ₇Wet lesilätyaj yopejkwe:

–Iche elh tä nekche on'äyij, lakhajyhayaj inu'pe okhajyhayaj, wet matche tä n'am t'uhawetej che ot'upeyejchä yämthilek olanhi lenisäj t'ak. ₈Olham obautisayen amejen inät, mat lham ibautisaynhila amejen Espíritu tä Dios T'amajchet.

₉Ifwalastso näm Jesús tälho Nazaret, häp lhip tä ihi Galilea, wet Juan ibautisayen tä ihi Jordán. ₁₀Wet tä Jesús inuphä tä tälho inät, hiw'en pule tä lhahich'enhi, lhäy'e Dios laka Espíritu tä hätet iwoye hokwinaj tä inuhchä tä iho'pe häp lham. ₁₁Wet iche n'opak tä tum puleye tä yok:

–Ahäpe Olhäs tä Ohumnek, wuj tä okäjlhi amej.

₁₂Tä tajyäme täjtso, Dios laka Espíritu ichäj Jesús wet ihäne ts'anis. ₁₃Wet ihi t'at yäk cuarenta ifwalas, iyej itshätäy, wet Satanás yelhte. Mat Dios laka ángeles tach'ote.

₁₄Tä tajyäme tä õhp'ohi Juan, Jesús ihoye Galilea yämthilek yen lhämeta Dios Silätyaj tä Is. ₁₅Yopejkwe:

–Nichäte lewhäy, Dios Niyatyaj tott'a alhoho. ¡Woyay ahusey iyhäja wet ekhayaye Dios Silätyaj tä Is!

₁₆Wet Jesús inukwe lhip häp lewomek tä Galilea, wet hiw'ene hin'o tä lhey Simón lhäy'e häp lechila Andrés, lhamel ithat inäte lewot tsi häpehen w'ahatwos. ₁₇Jesús tahuye wet yok:

–Nekay n'okwe, wet nemla let'ukwe w'ahat, mat let'uhikwela wichi.

₁₈Wet yofwajkwet lhamel ileyej lewotey wet yikche.

₁₉Tä Jesús yäm kanhi, hiw'ene hin'o tä lhey Zebedeo leles tä häpehen Santiago lhäy'e lech'inij Juan, lhamel ihi chalana tä yenwethä lewotey. ₂₀Wet Jesús äp t'änehen, wet lhamel yikch'oye lajcha tä ihi chalana, lhäy'e lechumyenhay, wet yikche Jesús.

₂₁Tä Jesús lhäy'e let'unfwastso nichätho hupuy tä Capernaum, wet ifwala tä n'ot'elakw'et lhamel ihoye Judío lhayis laka n'ohusew'et, wet Jesús iwo lechufwenyaja. ₂₂Wet wichi wuj tä t'iseltejen, tsi tä ichufwen lhamel, mälhyet iwoye hin'o tä len'ohyaj ihi, tek häte iwoye hin'ol tä lhayen lewosayej Ley p'ante tälhe Moisés. ₂₃Wet iche hin'o tä ahät ihi tä iyej iyhäj tä ihi n'ohusew'ettso. Wet lham t'änpe tä yok:

₂₄–Jesús tä Nazaret lhele, ¿chipte tä alenuhtho olhamel? ¿Hä lenäm yämthilek letäyhat olhamel? ¡Olham ontäfwel amej tä ahäpe Dios T'amajchet!

₂₅Mat Jesús ifwone wet yok:

–¡Wo tamseka, mäch'oye hin'otsi!

₂₆Wet ahät ichätyen katsi hin'o wet ifwitsenej tä t'än, wet inuphä tä tälho. ₂₇Wet nilhokej wichi inuhat lhamhohen wet tay'ätshanpej lhamehen tä yok:

–¿Atsi m'ak tä häpe täja? ¡Tsi n'ochufwenyajna nech'ayek, wet wuj len'ohyaj ihi Jesús, tsi tahuye ahät lhayis wet lhamel iwoye t'at lhämet!

₂₈Wet yofwajkwet Jesús letoyaj y'ajpe nilhok Galilea.

₂₉Tä lhamel inukwephä tä tälhchufwi n'ohusew'et, Jesús ihoye Simón lhäy'e Andrés lew'et, wet Santiago lhäy'e Juan yikche. ₃₀Wet Simón lech'efwa ko imä katsi, t'äj chayo. Wet lhamel ifwenho Jesús, ₃₁wet lham ihoye wet tachuma takwey wet ineyhatphä. Wet yofwajkwet tatäy tä chayo t'äj. Wet atsinha yenlhi lhamel lhäk.

₃₂Tä ifwala y'uy, tä nech'e ichalajchä, wichi ihäne nilhokej t'inhayaj länhay häp Jesús, lhäy'e iyhäj tä ahät länhay, ₃₃wet nilhokej wichi lhaihuthiwek häp huppe. ₃₄Wet ichesthen wujpe lhamel tä t'inhayaj w'enhahiche, wet ichenchephä wujpe ahät lhayis tä ihiche wichi. Mat tach'anlhahiyet'a ahät lhayistso che yämwethä, tsi lhamel nitäfwelej t'at.

₃₅Tä nech'e ifwala, tä kamaj honatsi i'pe honhat, Jesús nephä, yäp'elhtshi tä tiyäje lhip tä naj wichiyahi yämthilek iwo t'alhyaja. ₃₆Tä paj Simón lhäy'e let'unfwas yikhen tä t'ukwe Lewuk. ₃₇Tä lhamel nilhoke, wet tahuyej tä yok:

–Nilhokej wichi tä t'u amche.

₃₈Mat lham yok:

–Mäh n'ahoye lew'etes tä ni'tosayehen yämthilek häte owo silätahi Dios lhämet. Tsi häp täja tä tamenej tä onek.

₃₉Wet häp tä mälhyejtso, Jesús ilunche t'at nilhokej Galilea lhipey tä iwo siläta Dios lhämet tä ihiche n'ohusew'etes wet inuhatchephä ahät lhayis tä ihiche wichi.

₄₀Wet iche hin'o tä amostas ilän, ihoye Jesús wet lakamchetey itihi honhat, wet lhahip'altsene tä yok:

–Che lewoye, lehanej lewoyneje che letäyhat n'oyej ot'inhayaj.

₄₁Jesús hip'altsen, wet tachumpe wet yok:

–Owoye. Otäyhat amej.

₄₂Wet yofwajkwet tatäy amostas wet hin'o iches. ₄₃Wet Jesús ichen, mat y'isej lhämet tä äytajche tä yok:

₄₄–Lhek yahinya, yej fwenhola elh che häpe. Mat apäynela häp sacerdote wet chäje m'ak che lhenla t'awayhata Dios, häp achesyaj tä tamenej, mälhyej tä Moisés p'ante ne'tek õ'woye, häpkhilek nilhokej wichi ihanej tä noj anhayaj.

₄₅Matkat hin'otso yik wet ifwenho nilhokej wichi m'ak tä Jesús iwoyeje. Tä mälhyejtso, Jesús nemhit tiyäjo hupuy elh che häpe, mat ihipej lhip che häpe tä wichi newahi. Mat tej tä mälhyejtso, wichi tälhomchepej lew'etes tä ihoye.