Mar 2

₁Tä tajyäme ifwalas iyhäj, Jesús yachajo tä tiyäjo häp Capernaum. Wet tä wichi ihanch'oye tä ihi lew'et, ₂wujpe lhamel tä lhaihute, wet tek lew'et iyej lhamhiche tä ichufwi hup lhäy'e tä huppe tatache. Wet lham ifwenho Dios lhämet. ₃Wet nech'e nämhen cuatro hin'ol tä ihäne elh tä k'efwitas länek, ₄mat lhamel tek len'äyij iyeji wichi tä wuj yämlek nichäte Jesús. Tä mälhyejtso, lhamel iho'pe hup lhetekch'o, wet ifwoynho lhip tä yiwetpe häp lham, wet itälhetche k'efwitas länek tä i'pe lehowet wet iti honhate. ₅Tä Jesús hiw'en lhamel t'ekhahyaj, tahuyej häp k'efwitas länek wet yok:

–Yäs, tatäy amej hach'isukyajay.

₆Mat iche elhpej hin'ol tä lhayen lewosayej Ley p'ante tälhe Moisés, lhamel iwhäye tä tatachephä wet letichunhayaj yok, ₇“¿Chipte tä iwoynejetso lhämet hin'otsi? Lhämtestso iläkwlhi Dios, tsi ts'ilak Dios tä ihanej iwoyneje tä itäyhat n'och'isukyajay.” ₈Mat Jesús yofwajkwet nitäfwelej tä lhamel letichunhayaj ihiche, wet tay'ätshane lhamel wet yok:

–¿Chipte tä mälhyejtso atichunhayaj? ₉¿Atsi m'ak tä lhäy'e lhip tä ni'thaya? ¿Häpe p'iya tä oyok, “Tatäy amej hach'isukyajay”, wok häp che oyok, “Nephä, chuma ahowet wet w'eleklhi”? ₁₀Lhek yahinya, opäyen amehen häpkhilek lehanej tä Hin'o Lhäs len'ohyaj ihi tä ihonhatena yämlek itäyhthen wichi lech'isukyajay.

Wet nech'e tahuyej k'efwitas länek wet yok:

₁₁–Am tä oyäm ame, oyok, Nephä, chuma ahowet, mäh aple haw'et.

₁₂Häpet tä iwoyetso, nephä hin'o wet tachuma lehowet wet yik. Wet tä nilhokej wichi hiw'en täja, lhamel wuj tä t'iseltejen wet yok:

–¡Ihichet'a che y'aw'en m'ak tä mälhyejtso!

Wet lhamel iwunit t'at häp Dios.

₁₃Tä tajyäme täja, Jesús yachajo tä tiyäje häp lewomek, wet tä inukwe lhip wichi ihoyepej wet lham ichufwenhen. ₁₄Wet tä tujlhache len'äyij, hiw'en hin'o tä lhey Leví, Alfeo lhäs, tä tatayphä tä ihi lew'et tä ihutpejwek impuestos laha tä niyatey Romano lhayis t'alhpe. Wet Jesús tahuyej tä yok:

–Nek n'okwe.

Tä Leví iläte, nephä wet yikche.

₁₅Tä paj Jesús lhäy'e lechufwenkay t'ekhen tä ihi Leví lew'et. Wet wujpe iyhäj hin'ol tä impuesto lewos tä ihän Jesús, lhäy'e wichi tä õyämejwethä tä ni'isahen tä häte yen lehäneka, lhamel tachufwiyej. ₁₆Wet elhpej Fariseo lhayis tä häpehen iyhäj tä lhayen lewosayej Ley p'ante tälhe Moisés, tä lhamel hiw'en tä Jesús tachufwiyej nilhokej wichitso, tay'ätshane lechufwenkay tä yok:

–¿Chipte tä awuk tachufwiyej impuesto lewos lhäy'e iyhäj tä ni'isahen tä t'ekhen?

₁₇Mat tä Jesús iläte, wet yok:

–Häp wichi tä t'inhayaj länhay, häp tä iwatlä kachawo. Iyhäj tä newache t'inhayaj tek iwatlä. Onekhiyet'a lhamel tä isen, mat iyhäj tä ni'isahen häp tä oneke.

₁₈Tä Juan Bautista lechufwenkay lhäy'e Fariseo lhayis lhaichuyhathen, wet iche iyhäj tä ihoye Jesús wet tay'ätshaneje tä yok:

–¿Chipte tä am achufwenkay lhaknichuyhatahen? Tsi Juan lechufwenkay lhäy'e iyhäj tä ihän Fariseo lhayis, lhamel iwoyepej täjtso.

₁₉Jesús nichulho tä yok:

–¿Chiwoye wichi tä ihoye elh tä tawhayey tä iwo lakäjyaja? ¿Hä is chik lhaichuyhathen tä hin'o tä whayenaj kamaj iyej lhamel? ¡Kha! ₂₀Mat nichäthiyela ifwala tä õ'soyej lhamel häp whayenaj, nech'e häpkhilek lhaichuyhathen.

₂₁“Nehit katsik itseklhi lew'uy wumek wet hip'oyeji wesaj lhip tä nech'ayek. Tsi lhip tä nech'ayek yäpnho wet itonhi wet hikw'esche lew'uy wumek, wet nem koyhyaj tä wasi.

₂₂“Häte nehit katsik itsäyho hat'es tä nech'ayek häp tsänt'äj tä lewumek. Tsi che y'ohi hat'es, y'ajihola lehi tä lewumek, wet itsäy hat'es lhäy'e lehi tatäy. Tä mälhyejtso, is che õ'tsäyho hat'es tä nech'ayek häp lehi tä nech'ayek.”

₂₃Häp ifwala tä n'ot'elakw'et p'ante, Jesús lhäy'e lechufwenkay ilunche yachuyaj. Wet tä inukwe, lechufwenkay iwo tesa tä itonhiche trigo lhay tä kamaj lakonkay. ₂₄Mat tä Fariseo lhayis hiw'en, tahuyej Jesús tä yok:

–Lhek yahinya achufwenkay, ¿chipte tä iwoye m'ak tä tek õ'wahnej elh che iwoye häp ifwala tä n'ot'elakw'et?

_25-26Mat lham nichulho tä yok:

–¿Hä leyahyenhit'a m'ak tä David iwoye p'ante? Tsi tä lewhäy p'ante Abiatar häpe Sacerdote tä Lhamya, iche ifwala tä David lhäy'e let'unfwas niw'ena m'ayek, wuj tä nichuyuhen lhamel. Wet tä lham tiyäjchufwi Dios Lew'et, tuj t'at pan tä õyen t'amajchetesayej Dios, wet äp tisiche let'unfwas, tej tä häpe t'at pan tä tajlhamat iyhäj tä sacerdotes tä õ'wahnej che tuj.

₂₇Wet Jesús äp yok:

–Häp wichi t'at tä tamenej tä Dios yenlhi ifwala tä n'ot'elakw'et yämlek isej. Häpkhit'a che Dios yenlhi wichi yämlek ifwala tä n'ot'elakw'et isej. ₂₈Tä mälhyejtso, häte ifwala tä n'ot'elakw'et ichufwi Hin'o Lhäs len'ohyaj.