Mar 6

₁Jesús yikch'oye lhiptso wet ihoye honhat tä lew'et, lhäy'e lechufwenkay. ₂Tä nichäte ifwala tä n'ot'elakw'et, ihoye n'ohusew'et wet iwo lechufwenyaja. Wet wujpe wichi tä iläte lhämtes, lhamel wuj tä t'iseltejen wet yok:

–¿Chip'ante ihi tä lhaichufwenej nilhokej m'ayhay tä ihanej hin'otsi? ¿Chi tä itälhthi lehanyaj, lhäy'e m'ayhay tä yenlhi tä iselkatejen wichi? ₃¿Hä kahäpeya carpintero, María lhäs wet äp Santiago, José, Judas, lhäy'e Simón, lhamel lechila? Wet lech'inhälis lew'et t'at täja, in'amejen.

Wet Jesús len'ohyajtso iwäkwyhayen lhamel. ₄Mat lham yok:

–Ihichet'a profeta chik wichi yen w'et m'ayeka, tajlhame chik ihi honhat tä lew'et, häp tä lew'etfwas lhäy'e lepuhfwas yen w'et m'ayeka.

₅Wet häp tä lham ikalhihit'a m'ak chik iselkatejen wichi chik yenlhi tä ihi, tajlhame tä iti'pe takweyey häp elhpej t'inhayaj länhay wet ichesthen. ₆Wet wuj tä leselthayaj iyeji tä wichitso nichayaye häp lham.

Tä tajyäme täjtso, Jesús ilunche wichi lew'etesas tä ni'tosayehen tä iwo lechufwenyaja. ₇Wet t'äne lechufwenkay tä ihi doce wet ichenhen lhamel täkwfwaspej, wet hiw'enhomche lakhajyhayaj tä inu'pe ahät lhayis yämthilek inuhatchephä. ₈Wet yok:

–Tä lenukwe n'äyij, yej chäja m'ak at che häpe tä lhekhen, tajlhamat atsut che lechäj. Yej chäj akhäyhi, wok pan, wok chinaj t'äj. ₉Wo anisähisa mat yej chäj haw'uy elh. ₁₀Wet che lhämay kanhi, che lheyayej elh che häpe lewukwe tä lehoyaye, ewej t'at pajla'tha lhekch'oye honhat tä ihi. ₁₁Wet che iche lhip tä lechäte, wet wichi tä ihi nitchuma ahilähen wet nitch'ahuyaye m'ak tä lhen ämeta, mäch'oye lew'et wet sichätchä honhat tä ihiche apach'ol, häpkhilek lhamel hiw'en m'ak tä lewoye wet yen tichunhayaja tä letes ihi.

₁₂Tä mälhyejtso, lechufwenkay yikhen p'ante wet iwopej silätayej wichi tä yok:

–Woyay ahusey iyhäja.

₁₃Häte inuhatchephä wujpe ahät lhayis, wet y'ilenche'pe aceite wujpe t'inhayaj länhay wet ichesthen.

₁₄Häp niyat Herodes iläte tähestso tsi Jesús letoyaj y'ajpe nilhokej honhat. Iche wichi tä yok:

–Häpe Juan Bautista tä tälho n'op'itseyhay tä inuphä. Häp tä tamenej tä lakhajyhayaj iyej wet yenlhi m'ayhay tä iselkatejen wichi.

₁₅Iyhäj yok:

–Häpe profeta Elías.

Wet iyhäj yok:

–Profeta t'at, mälhyej iwoye profetas tä pajchehen.

₁₆Mat tä Herodes iläte m'ayhayna, wet yok:

–Häpe t'at Juannaj one'tek õyiset lhetek, mat athana inuphä tä tälho n'op'itseyhay.

₁₇Tsi ifwalas tä tajyämetso Herodes ne'tek õ'tsoklhi häp Juan wet õ'nayhitlhi wet õ'thatho n'op'onthi, häp lham Herodes letiche tä lhey Herodías tä tamenej. Atsinhatso häpe p'ante Herodes ch'inij Felipe tä lech'efwa, mat Herodes yen ch'efwaya. ₁₈Wet häp tä Juan n'äyejo tä yok:

–Isit'a tä lhen hach'efwaya hach'inij ch'efwa.

₁₉Wet Herodías tä ilätepej Juan lhämet, wuj tä lewäk ihi, mat ihanhiyejt'a iwoyneje tä t'uhläk ilän, ₂₀tsi Herodes nitäfwelej tä Juan häpe hin'o tä is lhäy'e tä is alhoho m'ak tä iwoye. Wet häp tä Herodes nowaye Juan wet t'uye t'at. Wet ilätepej lhämtes, wet tej tä nikalelhäja letichunhayaj, mat ihumin t'at tä iläte.

₂₁Mat tä paj p'ante wet näm lewhäy tä atsinha Herodías hiw'en tä len'äyij ihi m'ak tä t'uhläk iwoyeje Juan. Tsi nichäte ifwala tä Herodes hiw'en laka cumpleaños, iwo lakäjyaja wet t'änehen leniyatfwas, lhäy'e sip'äl kaniyatey, lhäy'e Galilea lheley tä kalelhäjiche. ₂₂Wet Herodías lhäse tiyäjo lhip tä n'okäjyaj ihi wet takatinlhi. Tä Herodes lhäy'e niwayhas hiw'en, wuj tä ihumin lakoyhyaj, wet Herodes tahuyej atsinha lhutsha wet yok:

–Alhej n'oye m'ak at chik häpe, wet ow'enla amho.

₂₃Wet hit'unhatche lhämet tä iwoye, wet äp yachajlhaho tä ifwenho tä yok:

–Ow'enla amho m'ak at chik häpe chik let'alhe, tej chik häpe oniyatyaj lechowej.

₂₄Tä atsinha lhutsha iläte lhämettso, wet ihoye lako wet tay'ätshane tä yok:

–¿Atsi m'ak chik ot'alhe?

Lako nichulho tä yok:

–Alhe Juan Bautista lhetek.

₂₅Wet lhutsha nakeltshi tä yäple niyat Herodes wet ifwenho tä yok:

–Owatläk lethatho plato Juan Bautista lhetek, wet w'en n'oho athana.

₂₆Tä Herodes iläte, wet wuj tä ifwitajejlhi. Mat tä pajche hit'unhatche lhämet tä ihi tä laka niwayhas tatache, ihanhiyejt'ak n'äyejo. ₂₇Wet ichen sip'ä, ne'tek yike Juan lhetek. Wet sip'ä yik tä ihoye n'op'onthi, wet yiset Juan lhetek ₂₈wet ithatho plato, wet ihäne lhutsha wet lham hiw'enho lako.

₂₉Tä Juan lechufwenkay ihanch'oye, lhamel yike lep'itsek wet yikchufwi yämthilek tajänch'oye.

₃₀Tä tajyäme täjtso, wet Jesús laka apóstoles tapile wet ifwenho nilhokej m'ak tä iwoye lhäy'e m'ak tä yen chufwenyaja. ₃₁Wet wuj wichi nämhenpej wet yikhenpej, wet Jesús lhäy'e apóstoles letamsek ihiyejit'a lhäk che tuj. Tä mälhyejtso, Jesús tahuyej lhamel wet yok:

–Lhuyay, n'ats'ilak tä n'ekhen, n'ahoye lhip tä lhatamsek ihi wet n'awo lhat'elakw'eta ayej.

₃₂Wet lhamel tiyäjo chalana wet yikhen tä ihoye honhat lhip elh. ₃₃Mat wujpe wichi hiw'enche wet nitäfwelej, wet inukwe alhoho tä tälho nilhokej hupuy wet ichunlä tä nichät lewomek lhip elhe. ₃₄Tä Jesús inuhchä tä tälho chalana, hiw'en lhamel tä wuj wet hip'altsenhen, tsi hätet iwoye tson'atas tä naj lewoya. Tä mälhyejtso, iwo tesa tä ichufwenejen wujpe m'ayhay.

₃₅Tä honaj lechufwenkay ihoye wet yok:

–Honaj athana wet niwohit m'ak che ihi lhip tä y'ehina. ₃₆Wo tsilhekayej wichi häpkhilek yikhen wet ihoye hupuy lhäy'e wichi lew'etes tä ni'tosayehen wet ichäj lhamhohen m'ak che tuj.

₃₇Mat Jesús nichulho wet yok:

–Amel tä is che lew'enho lhäk.

Lhamel yok:

–¿Atsi? ¿Hä let'uhläk oyikhen wet ot'ukwe pan tä w'awulhej nilhokej wichi tä wujna?

₃₈Mat Jesús tay'ätshane wet yok:

–¿Chihätefwas pan tä lew'enay? ¡Mäh lhek yahne!

Tä lhamel hiw'en, ifwenho tä yok:

–Ow'en cincofwas pan lhäy'e täkwfwas w'ahat.

₃₉Wet nech'e lham ne'tek nilhokej wichi lhaihutchewek tä tatachephä'pe häp hup tä w'atshan, ₄₀ihipej cien wet cincuenta tä tatachephä. ₄₁Wet Jesús tachuma pan tä ihi cinco lhäy'e w'ahat täkwfwas, wet iyahin puleye wet iwo graciasayej Dios. Tä ileyej, wet hich'esajen pan wet hiw'enhomche lechufwenkay, ne'tek lhamel hiw'enhomche wichi. Häte hiw'enhomche w'ahat täkwfwas yäk w'awulho nilhokej. ₄₂Wet t'ekhen yäk yipsejen. ₄₃Wet lechufwenkay tachuma pan lhipey lhäy'e w'ahat lhipey tä imälhehi, wet ihanche doce lehis tuskalis tä õyenlhi tä tapokwe. ₄₄Wet lhamel tä t'ekhen, tajlhama hin'ol tä kalelhäj tä ihi cinco mil.

₄₅Tä tajyäme täjtso, Jesús ne'tek lechufwenkay tiyäjo chalana wet ichunch'oye wet iho lhip elhe yäk nichäte Betsaida. Wet lham imälhehchä ayej yämlek iwo tsilhekayej wichi. ₄₆Tä ileyej, wet iho'pe chenaj yämlek iwo let'alhyaja. ₄₇Tä näm honatsi, wet chalana ihi lewomek chowej mat Jesús imälhe ufwe. ₄₈Wet hiw'ene t'at tä lhamel nikalhahi tä yikhen, tsi yafwthi tälhche tä tatache tä tamenej. Wet tä ifwala hits'ajlä, lhamel hiw'enlä Jesús tä t'äspe inät, mat hätet iwoyek nihoyaye lhamel. ₄₉Wet lhamel yenek n'olhahwo, wet t'änpe, ₅₀tsi nilhokej tä hiw'en wet wuj tä nowayhen. Mat Jesús tahuye lhamel wet yok:

–¡Akhajyenhen, olham t'at, yej nowayay!

₅₁Wet ihoye wet tiyäjo chalana, ihowhäye lhamel wet takasit yafwthitaj. Wet wuj leselthayaj lhamel ₅₂tsi lehusey t'unhen, häp tä lhamel nena tichunhayaja m'ak tä tamenej tä cinco pan w'awulhej wichi tä wujpe.

₅₃Tä lhamel tafwayej inät, wet nichäte honhat tä lhey Genesaret wet inayhit chalana. ₅₄Tä inukwehchä tä tälho, wet wichi nitäfwelej Jesús, ₅₅wet lhamel inukwet alhoho tä ilunpe honhat, t'ukwehen t'inhayaj länhay wet ihäne tä iche'pe lemäwetes häp lhip chik häpe tä Jesús toyehi. ₅₆Chik lham ihi hupuy tä wus wok niwusa, wok ihi wichi lew'etesas, lhamel tachumapej t'inhayaj länhay wet itihiche lakawayhil, wet lhahip'altsene Jesús chik iwahnej lhamel yämlek itsok tej chik lew'uy lhiphaj. Wet nilhokej lhamel tä itsok ichesen.