Mar 9

₁Häte äp yok:

–Matche tä ofwel amhohen, Häp iyhäj amel tä lheyay kana athana, y'inhihent'ala yäk hiw'enpe Dios Niyatyaj tä nämla, lhäy'e lakhajyhayaj tä wuj.

₂Tä tajyäme seis ifwalas, Jesús iho'pe chenaj tä atojphä, wet ts'ilak Pedro lhäy'e Santiago lhäy'e Juan tä ichäj lhamche. Wet nech'e lhaiwelanhat tä ihi tä lhamel tatache, ₃lew'uyis isiche wet wuj tä ipelaj, häpe t'at m'ak tä nehit katsik ihanej iwoyneje lhenek at che häpe yämlek lepelnhayaj häte iwoye. ₄Wet lhamel hiw'en häp Elías lhäy'e Moisés tä lhamel yämhoplhi Jesús. ₅Wet Pedro tahuyej Jesús wet yok:

–Maestro, wuj tä is tä olhamel oikana. Oyenhilhila tres hupuyhas, elh tä am haw'et, wet elh tä Moisés lew'et, wet elh tä Elías lew'et.

₆Iwoynejetso lhämet tsi ihanhiyejt'a m'ak tä yäme, häp tä lham lhäy'e iyhäj y'ilejen lenowayhyaj.

₇Wet nech'e näm häp pule wet hip'o'pe lhamel, wet iche n'opak tä tumho pulena tä yok:

–Häp täjtsi Olhäs tä Ohumnek. Ch'ahuyaye.

₈Wet lhamel iyahin lhipey, mat nemhit hiw'en elh che häpe che iyej lhamel, ts'ilak Jesús.

₉Tä inukwehchä tä tälhpe chenaj, Jesús ifwenho lhamel tä yok:

–Yej fwenhola elh at che häpe häp m'ak tä lew'enne, pajla'tha Hin'o Lhäs inuphä tä tälho n'op'itseyhay.

₁₀Tä mälhyejtso, lhamel t'amajej Jesús lhämettso wet iti lhamejen, tej tä tay'ätshanejpej lhamehen tä yok:

–¿Atsi m'ak tä yäme tä yok, “Hin'o Lhäs inuhiphäla tä tälho n'op'itseyhay”?

₁₁Wet lhamel tay'ätshane Jesús tä yok:

–¿Chipte tä hin'ol tä lhayen lewosayej Ley p'ante tälhe Moisés yäme tä Elías ichunla che näm?

₁₂Lham nichulho tä yok:

–Matche t'at tä Elías ichun alhoho yämlek yäm is alhoho nilhokej m'ayhay. ¿Mat chipte tä N'olesaynhay yäme tä Hin'o Lhäs iteläythiyeja wet wichi yenla w'et m'ayeka? ₁₃Mat olham ofwel amhohen tä pajche näm Elías, mat lhamel iwoyeje m'ak tä lhamel t'uhläk iwoyeje, mälhyej tä N'olesaynhay yäme m'ak tä lewit'äyhyajla.

₁₄Tä lhamel tapile lechufwenkay iyhäj, hiw'en tä elhpej hin'ol tä lhayen lewosayej Ley p'ante tälhe Moisés itayhtejlä lhämtes, wet häte wujpe wichi tä lhaihutej lhamel. ₁₅Tä wichi hiw'enlä Jesús, wet wuj tä leselthayaj ihi, wet nilhokej lhamel inukwe alhoho wet n'okwiyej. ₁₆Wet Jesús tay'ätshane wet yok:

–¿Atsi m'ak tä lenahutpe?

₁₇Wet elh lhamel yok:

–Maestro, ohän ame olhäs, ahät tä ihi, yen isuka. ₁₈Wet lhip chik häpe chik ihi, ahät ithat katsi, wet iwo lakhofwa wet yokwajwek letsotey wet ahät ikhajyenche. Wet ot'alhene achufwenkay chik inuhatphä, mat ikalhihit'a.

₁₉Tä Jesús iläte täja, wet yok:

–¡Wichi tä lechayaj newahi! ¿Chihätefwas ifwalas tä oihla amejen? ¿Chihätefwas ifwalas tä oteläythila amejen? ¡Lhek hänay alhoho mamse!

₂₀Wet lhamel ihäne. Tä ahät hiw'en Jesús, ithat katsi mamse wet nich'olelhi wet iwo lakhofwa. ₂₁Jesús tay'ätshane lajcha wet yok:

–¿Hä pajche tä ahät ihi?

Lajcha yok:

–Tälhe tä kamaj lhämsaj. ₂₂Iche tä ahät ithatho itäj wok inät, t'uhläk itäyhat. Mat chik lehanej at lewoyneje, p'altsen n'ohen wet ch'ot n'oyehen.

₂₃Jesús yok:

–¿Chipte tä lhok, “Chik lehanej at lewoyneje?” ¡Elh tä lechayaj ihi ikalhi t'at nilhokej m'ayhay!

₂₄Wet nech'e mamse lajcha t'än wet yok:

–¡Ochaye! ¡Mat ch'otej n'oye ochayaj tä niwuja häpkhilek lhäy'e lhip!

₂₅Tä Jesús hiw'en tä wujpe wichi lhaihute, nech'e yäm äytajche lhämet tä tahuye ahät wet yok:

–¡Ahät tä isuk wet äp nilätache honhat, nuphä tä lhehi mamsena wet yej lhachajolak letiyäjo!

₂₆Wet ahät ifwitsenej lechos wet yachajo tä ithat katsi mamse, wet nech'e inuphä wet yikch'oye, wet mamse mälhyej chik lep'itsek. Tä wichi hiw'en, wujpe lhamel tä yok:

–Y'il t'at.

₂₇Mat Jesús tachuma takwey wet ineyhatphä, wet mamse takasit.

₂₈Tä paj wet Jesús tiyäjchufwi häp hup, wet tä ts'ilak lechufwenkay, lhamel tay'ätshane tä yok:

–¿Chipte tä olhamel n'am kalhi tä onuhatphä ahättso?

₂₉Jesús nichulho lhamel wet yok:

–Häp ahät lhayis tä mälhyejentso, tajlhama che lewo alhyaja wet nech'e lekalhi tä lenuhatphä.

₃₀Lhamel yikch'oye lhiptso wet inukwe Galilea, mat Jesús tek t'uhläk ikatsik ihanej ₃₁tsi nahayej lechufwenkay tä ichufwenhen. Ifwenhomche tä yok:

–Häp Hin'o Lhäs õyachajiyela hin'ol takweyey, wet lhamel ilänla, mat che tres ifwalas inuhiphäla.

₃₂Mat lechufwenkay ihanhiyejt'a m'ak tä yäme, wet ifwawalhe che tay'ätshaneje.

₃₃Tä paj lhamel nichäte hupuy tä Capernaum. Tä ihi lew'et, Jesús tay'ätshane lhamel tä yok:

–¿Atsi m'ak tä lhämejwethä amhohen tä lenekche n'äyij?

₃₄Mat lhamel yok tam, tsi tä inukwe n'äyij wet elh yopej, “¿Atsi n'aelh tä inu'pe iyhäj?”

₃₅Wet nech'e Jesús tatayphä wet t'äne lhamel tä ihi doce wet yok:

–Elh chik häpe chik t'uhläk ichun, is chik lhaiti iyhäj pese wet lhayen iyhäj kawoya.

₃₆Wet tachuma han'äfwaj wet itihi lhamel lechowej wet tach'awej. Wet tahuyej lhamel tä yok:

₃₇–Elh chik häpe chik tachumlä häp han'äfwaj tä mälhyeja tä ihänlhin'o, olham t'at tä tachum n'ohlä. Wet elh chik tachum n'ohlä, ts'ilakhit'a olham tä tachum n'ohlä, mat häte häp Elh tä lechenekn'o.

₃₈Wet nech'e Juan ifwenho Jesús tä yok:

–Maestro, olhamel ow'en naji hin'o tä inuhtejchephä ey häp ahät lhayis. Mat tä kahäpeya elh n'amel, on'äyejo.

₃₉Mat Jesús yok:

–Yej n'äyejo, tsi ihichet'a elh chik iwo olheya tä yenlhi m'ak tä iselkatejen wichi, chik paj yäm n'oye tä n'am is. ₄₀Tsi elh tä nittayahlä n'amel, häpe n'amel n'aelh t'at. ₄₁Matche tä ofwel amhohen, Elh chik häpe chik hiw'en amhohen tej chik inät lhiphaj häp tä ahäpehen oka wichi, matche tä lakaha ihichela elhtso.

₄₂“Elh che häpe che iwetahatho lech'isukyaj häp elh tä w'et m'ayekfwaj t'at tä t'ekha n'oye, tä mälhyet han'äfwajna, is che õyäytej tunte tä choyhat häp lew'o wet õ'that lewomeke. ₄₃Che akwey tamen amej tä lechätho hach'isukyaj, iset. Tsi tej che akwey hätefwajni, mat lechätho n'ow'atshancheyaj tä t'un. Mat aisiyejt'a che nittäya elh akweyey wet lechätho n'oteläythayaj tä t'un lew'et tä itäj tek ihanej tä y'om. ₄₅Wet che apach'o tamen amej tä lechätho hach'isukyaj, iset. Tsi tej che apach'o hätefwajni, mat lechätho n'ow'atshancheyaj tä t'un. Mat aisiyejt'a che nittäya elh apach'ol wet õ'aithatho n'oteläythayaj tä t'un lew'et.4 ₄₇Wet che atelho tamen amej tä lechätho hach'isukyaj, lanhi. Tsi tej che atelho hätefwajni, mat lechätho Dios Niyatyaj. Mat aisiyejt'a che nittäya elh atelhoy wet õ'aithatho n'oteläythayaj tä t'un lew'et, ₄₈häp honhat tä iwos ihi tä n'ilahen tä tuj m'ak, lhäy'e tä itäj ihanhiyejt'a tä y'om.

₄₉“Tsi nilhokej wichi nosohiyejawethä itäj. ₅₀Nisoy is t'at, mat chik nem nosoy, lehanhiyejt'a lewoyneje yämthilek yachajo chik is. Anosoyenpejwethä, wet ti amejen atamsek.”