Mar 10

₁Jesús yikch'oye Capernaum wet ihoye Judea lhäy'e honhat tä ihi Jordán lhip elh. Wet wichi yachajo tä lhaihutej, wet mälhyej lakeypej ichufwenhen. ₂Wet iche Fariseo lhayis iyhäj tä ihoye tä t'uhläk ikanej, wet tay'ätshane tä yok:

–¿Hä õ'wahnej hin'o chik iwom lech'efwa?

₃Jesús yok:

–¿Atsi m'ak tä Moisés ne'tep'antek lewoyaye?

₄Lhamel nichulho tä yok:

–Moisés iwahnej chik hin'o yenlhi papel wet ilesayen lhämet tä yäme tä iwom lech'efwa.

₅Wet Jesús yok:

–Häp tä at'unhen, häp tä tamenej tä Moisés yenlhi p'ante lhämettso. ₆Mat täjp'ante nech'e iche m'ayhay, “Dios yenlhi hin'o wet yenlhi atsinha. ₇Wet häp tä tamenej tä hin'o yikch'oye lajcha lhäy'e lako wet lhahip'ajtej lech'efwa, ₈wet lhamel täkwfwasna hätet iwoyek hätefwajni.” Tä mälhyejtso, nemhit häpe chik täkwfwas mat nech'e hätefwajni, ₉wet häp tä isit'ak hin'ol isowek häp m'ak tä Dios hip'ajtitwek.

₁₀Tä paj tä lhamel ihi lew'et, lechufwenkay yachajo tä tay'ätshaneje täjtso. ₁₁Wet Jesús ifwenhomche tä yok:

–Häp hin'o chik häpe chik iwom lech'efwa wet iyej elh atsinha, iwo lakain'oyaja wet letes ihihlä lech'efwa tä ichun. ₁₂Wok atsinha chik iwom lech'efwa wet iyej elh hin'o, häte iwo lakain'oyaja.

₁₃Wet wichi ihäne nä'tshas häp Jesús yämthilek tachumche'pe, mat lechufwenkay ifwonlä wichitso. ₁₄Tä Jesús hiw'en, lewäk ihi wet yok:

–Ch'anlhaye nä'tshas, yej n'äyejo tä iho n'oye. Tsi wichi tä ihi Dios Niyatyaj häpe lhamel tä hätet iwoye nä'tshasna. ₁₅Matche tä ofwel amhohen tä elh tä lhaknitech'aynayej han'äfwaj yämthilek tachumlä Dios Niyatyaj, tek nichäthihola.

₁₆Wet nech'e tachuma nä'tshas wet hich'awejwethä, wet itiche'pe takweyey yämthilek takäpfwayehen.

₁₇Häpet tä yik Jesús, näm hin'o tä inu alhoho. Wet lakamchetey itihi honhat wet tay'ätshane tä yok:

–Maestro tä ais, ¿atsi m'ak che owoye häpkhilek onchäte ow'atshancheyaj tä t'un?

₁₈Jesús nichulho wet yok:

–¿Chipte tä lhenn'o isa? Tajlhama Dios tä is. ₁₉Pajche lehanej m'ak tä Dios ne'tep'antek õ'woye. Yok, “Yej lelän aelh, yej lewo akain'oyaja, yej let'etan, yej lesufwkane aelh, yej lekanej aelh, humin ajcha lhäy'e ako.”

₂₀Hin'o yok:

–Maestro, tälhe tä n'am thaläkw owoye t'at nilhokej lhämtestso.

₂₁Wet Jesús iyahin wet n'äl tä ihumin, wet tahuyej tä yok:

–Tatäy amej m'ak tefwajni. Mäh wom nilhokej m'ak tä i'amej, w'enhomche p'elitses, wet akäywet ihla puleye. Wet lhuu, nek n'okwe.

₂₂Mat tä hin'o iläte täja, lelhakli ihi tsi häpe elh tä wuj m'ak tä hiw'en. Wet yik, lefwitajayaj ihi.

₂₃Jesús iyahin wichi wet tahuyej lechufwenkay tä yok:

–¡Matche tä athaho lhamel tä hiw'en m'ayek yämthilek nichätho Dios Niyatyaj!

₂₄Wet lechufwenkay wuj tä t'iseltejen tä iläte lhämtestso. Mat Jesús äp yok:

–Yaiyhäj, ¡lhäy'e lhip tä atha che elh tiyäjo Dios Niyatyaj! ₂₅Lhek tichunache camello, ¡athahit'a che tiyäjche kanotte! ¡Mat häp hin'o tä hiw'en m'ayek häp tä athaho yämthilek nichätho Dios Niyatyaj!

₂₆Tä lechufwenkay iläte, nem koyhyaj leselthayaj wet tay'ätshan lhamehen tä yok:

–¿Atsihilak tafway che mälhyejtso?

₂₇Jesús iyahin lhamel wet yok:

–Häp hin'ol ikalhihit'a täjtso, mat Dios ikalhi, lham ihanej iwoyneje nilhokej m'ayhay.

₂₈Wet Pedro nech'e ifwenho tä yok:

–Häp olhamel owomte katsi nilhokej m'ak tä in'oyejen wet onekte amche.

_29-30Jesús nichulho wet yok:

–Matche, wet elh at che häpe tä nek n'okwe tä iwoye Dios Silätyaj tä Is, wet iwom katsi lewukwe, wok lepuhfwas, wok lako, wok lajcha, wok leles, wok laka honhates, ofwel amhohen tä kamaj ihonhatena nemla koyhyaj tä ihichela häp lewukwey, lhäy'e lepuhfwas, lhäy'e lakolis, lhäy'e leles, lhäy'e laka honhates, wet äp wichi itihiyeja laka'tshayaj. Wet häp lewhäy tä tay alhoho ikathiyeja lew'atshancheyaj tä t'un. ₃₁Mat oyok, wujla'pe lhamel tä ichun, imälhnhenla, wet wujla'pe lhamel tä imälhnhen, häpkhilek ichun.

₃₂Jesús lhäy'e lechufwenkay inukwe len'äyij tä tataye Jerusalén, wet Jesús ichunlä lhamel tä yikhen. Wet lhamel inuhat lhamhohen, wet iyhäj tä imälheche len'äyij lenowayhyaj ihi. Wet Jesús nech'e äp yachajo tä ihänej kanhi lechufwenkay tä ihi doce wet ifwenhomche lhamel häp m'ak wit'äyhyaj tä ihichela. ₃₃Wet yok:

–Lhek yahinya, y'ahoye Jerusalén, wet õyachajiyela Hin'o Lhäs häp sacerdotes tä len'ohyajay ihiche lhäy'e häp hin'ol tä lhayen lewosayej Ley p'ante tälhe Moisés. Lhamel ne'tehlak õ'län, wet yachajiyela häp Romano lhayis, ₃₄wet lhamelna itihiyeja leläkwyhanyaj, wet ifwats'unhilhila wet itasnhilhila, wet ilepese ilänla. Mat chik tajyäme tres ifwalas, inuhiphäla tä tälho n'op'itseyhay.

₃₅Häp Zebedeo leles, Santiago lhäy'e Juan, ihowhäye Jesús wet tahuyej tä yok:

–Maestro, olhamel ot'uhläk lewoye häp m'ak tä ot'alhej ame.

₃₆Jesús tay'ätshane lhamel wet yok:

–¿Atsi m'ak tä häpe?

₃₇Lhamel yok:

–Chik lhehi Aniyatyaj tä lewujyaj ihi, wahin n'oyejen chik elh olhamel ihi afwomkat wet elh ihi hats'amkat, häpkhilek on'ohyajay ihiche.

₃₈Mat Jesús yok:

–Lehanhiyejt'a m'ak tä let'alhe. ¿Hä lekalhayhi chik leyähiyeja häp n'olhät tä tapay chik olham oyähiyeja? ¿Hä lekalhayhi chik leteläythiyeja häp m'ak tä äytajche chik olham oteläythiyeja?

₃₉Lhamel nichulho wet yok:

–Okalhi.

Wet Jesús ifwenho lhamel tä yok:

–Matche t'at, amel ahätehlat owoye tä oyäyej n'olhät tä tapay wet oteläytej häp m'ak tä äytajche. ₄₀Mat elh chik ihi olhip tä ofwomkat wet elh chik ihi ots'amkat, olhamhit'ak otshupyene. Tajlhama Dios tä hiw'enhihola lew'etesna häp iyhäj tä lham pajche iwaklhatho.

₄₁Tä lechufwenkay iyhäj tä ihi diez iläte Santiago lhäy'e Juan, lhamel nichuwetehen. ₄₂Mat Jesús t'äne nilhokej lhamel wet tahuyej tä yok:

–Lehanayej tä wichi tä ihiche honhates, lhamel laka niyatey fwetaj niyatejen t'at wet lhaiwujyenejpe, wet häp n'owustas lhayen lewuhuya. ₄₃Mat amel isit'ak amälhyayej iwoye lhamel. Oyok, elh amel chik t'uhläk inu atapehen, is chik lhayen akawoya, ₄₄wet elh chik t'uhläk niyat amejen, is chik lhayen akweneka. ₄₅Tsi häte Hin'o Lhäs tä näm wet yenhit'a lakawosa wichi, mat lhayen wichi lakawoya, wet iwom lew'atshancheyaj tä lhayen lahayayej wujpe wichi.

₄₆Wet Jesús lhäy'e lechufwenkay nichätho hupuy tä Jericó. Wet lhamel ihi t'at, tä paj tä yikch'oye, lhäy'e wujpe wichi tä ihän, wet iche asnam tä lhey Bartimeo, häp Timeo lhäs, lham tatayphä tä ihi n'äyij lhip wet t'alheje t'awayhat elh chik häpe. ₄₇Wet tä ilätch'oye tä häpe Jesús tä Nazaret lhele tä nek, wet t'än tä yok:

–¡Jesús, David Lhäs, p'altsenn'o!

₄₈Wet wujpe wichi ifwone wet yok:

–¡Ch'eet!

Mat lham nem koyhyaj tä t'än tä yok:

–¡David Lhäs, p'altsenn'o!

₄₉Tä Jesús iläte, takasit wet yok:

–Äne.

Wet lhamel t'äne wet ifwenho tä yok:

–¡Akhajyen, nephä, Jesús t'än ame!

₅₀Wet asnam ithat katsi lew'uy wet tiyäjphä wet ihoye Jesús. ₅₁Wet Jesús tay'ätshane tä yok:

–¿Atsi m'ak tä let'uhläk owoyej ame?

Asnam nichulho wet yok:

–Maestro, ot'uhlak ow'enche honhat.

₅₂Wet Jesús yok:

–Is, mäh t'at, ekhahyaj tä aichesat.

Häpet tä mälhyejtso, asnam hiw'enche honhat wet yikche Jesús tä inukwe n'äyij.