Neh 1

₁Häp tähesna Nehemías, Hacalías lhäs, lhämtes.

Veinte nekchämis tälhe tä iwo tesa tä Artajerjes niyatej Persia, häp iwel'a tä lhey Kisleu, olham Nehemías oihi hupuy tä lhamya tä lhey Susa. ₂Wet näm och'inij Hanani, lhäy'e iyhäj tä nekche tä tälhe Judá. Wet oty'ätshane lhamel wet oyok:

–¿Chiwoye Jerusalén, lhäy'e Judío lhayis tä õknikatayejente lhamel yämthilek õ'häne honhatna tä kalew'eta?

₃Lhamel nichulh n'oho wet yok:

–Häp wichihte õknikatayejen yämthilek õyen kwenkaya wet imälhehi honhat tä lew'et, wuj tä atha len'äyij häp lhamel. Wichi hin'äfwlhatwethä, wet n'olafwek tä tuntey tä hupuy tä Jerusalén lep'ot wasi, wet õ'wunhomche lepe p'otes.

₄Tä oläte tä lhamel ifwel n'oho, ottayphä wet otafwlhi, wet ofwitajayaj in'oyej pajtha ifwalas iyhäj. Wet olhaichuyhat wet ot'alhe Dios tä ipuleye, ₅wet oyok:

–Iwuk Dios tä pule Lewuk, Dios tä N'owujtaj wet äp takhajay, lhäy'e tä ahumnhayaj ihi, tek letäyhat ämet tä pajche lewoyeje wichi tä aihumin wet iwoye ämtes. ₆Lhek yahinn'o tä akawon'o tä olhaip'altsen ame. Ch'ahuye ot'alhyaj tä owoye ifwalapej honatsipej tä oy'alhyen ame akawos Israel lhayis. Olhaifwel amho tä olhamel Israel lhayis owoye och'isukyajay wet ottay ahilä. Häte olham lhäy'e ochätilis olhamel owoye t'at och'isukyajay. ₇Matche tä ni'isa m'ak tä olhamel owoyej ame. Olhamel owohiyet'a ämtes lhäy'e achufwenyajay tä lew'enho p'ante akawo Moisés wet lham ichufwen n'oyejen. ₈Wet pajche p'ante lefwenho lham tä lhop'antekwe, “Chik amel lewohiyela hach'isukyaj, oaifwtsatkatla'pe honhatil wet lhehiyeja wichi tä w'enha lhamejen. ₉Mat chik amel lewo ahusey iyhäja wet lewoye olhämtes, tejlak lefwtsatpe honhat, mat oaihutlawek tä letälhomche honhatil tä wuj tä atosehen, wet ohänla amehen honhat tä ot'amajchet, häp honhat tä olham oyen ow'eta.”

₁₀“Iwuk, ohäpehen akawos wet ohäpehen aka wichi tä lefwayhtej akhajyhayaj tä wuj lhäy'e akwey tä takhajay. ₁₁Olhaip'altsen ame, ch'ahuye ot'alhyaj, lhäy'e akawos tä lhamel lhaip'altsen ame wet t'uhläk aiwujyen. Wet ot'alh ame, isyen alhoho m'ak tä owoye, w'enho lehusek tä is häp rey häpkhilek ihuminche olhämet wet akäjlhi n'oyej.”