Letayhfwas fwetaj itiyej t'akanyaj Nehemías yämthilek iwo m'akayej
1Sambalat lhäy'e Tobías, lhäy'e Árabe tä lhey Gesem, lhäy'e iyhäj tä tatayhlä olhamel, lhamel ihanch'oye tä wak'alh n'olafwek tä Jerusalén lep'ot, mat tajlhame lepe p'otes tä tatäy chik othathomche. 2Tä mälhyejtso, Sambalat lhäy'e Gesem lhamel ichen n'oye lhämet wet yok:
–Is chik y'alhaihutwek wet n'ehila wichi lew'et chik häpe tä ihi honhat tä w'awulhchä tä lhey Ono.
Mat kalelhäj tä lhamel t'uhläk iwo m'aka n'oyej. 3Wet häp tä ochene olhämet häp lhamel, wet oyok:
–Onahayej ochumet tä oyenlhi. Okalhihit'ak oho amehen. Tsi chik oyikch'oye ochumet wet oho amehen, wichi ilehiyeja tä yenlhi.
4Wet cuatro veces tä lhamel ichenpej n'oye lhämet, mat owohit'a elha olhämet tä onchulhopej lhamel. 5Tä lepese Sambalat ichenchufwi lakawo häp lhämet tä ichen n'oye, wet tek hip'oyejpe sello. 6Lhämet yok:
“Iche wichi tä yäme tä am lhäy'e Judío lhayis alewaklhat tä lewohla aka'tshayaja. Häte Gesem yäme, wet häp tä tamenej tä lhenlhi n'olafwek tä Jerusalén lep'ot. Wet äp wichi yäme tä amlak alhen häpeya rey, 7wet pajche lhen profetasa iyhäj yämthilek lhamel yämla ame tä ihi Jerusalén wet yohlak, ¡Iche Judá laka rey! Ofwel ame, wichi lhämtestso nichäthiyela rey Artajerjes. Häp tä tamenej tä ot'uhläk leho n'oye yämthilek y'atetshan m'ak tä is chik y'awoye.”
8Tä oleyej tä oyahyen lhämettso, wet ochene olhämet tä onchulho wet oyok:
–Mathichet'a tähestso. Am t'at tä atichunhayaj mälhyejtso.
9Lhamel iwoynejetso, t'uhläk olhamel onowaye, yenek olehiyej ochumet tä kamaj niwak'alha. Mat tek mälhyejtso, mat nem koyhyaj tä olhaikhajyenej ochumet.
10Wet tä ifwala elh ohoye Delaías lhäs tä lhey Semaías lew'et. Hin'otso lakachäti lhey Mehetabel. Wet lham Semaías iche m'ak tä tamenej wet häp tä iwohiyet'ak inuphä tä ichufwi lewukwe. Tä onchäte, wet tahuy n'oyej tä yok:
–N'ahoye Dios Lew'et wet n'ahola lech'oye häp lhip tä n'ot'amajchet. Wet n'ap'ohichela lepelis tsi wichi t'uhläk ailän. Honatsina nekhila ame.
11Mat onchulho wet oyok:
–Hin'ol tä mälhyej olhamna nowayhit'a, wet tek ilethanchufwi Dios Lew'et häpkhilek õkniläna. Häte olham tek olethanlachufwi.
12Owoyetso tsi ontäfwelej tä m'ak tä yäme häp hin'ona tälhiyet'a Dios. Mat tatay n'ohlä, tsi Sambalat lhäy'e Tobías lhamel iwo lakahaya yämthilek ifwel n'oho m'ak tä kamatache, 13t'uhläk onoway wet owoye och'isukyaj. T'uhläk mälhyejtso yämthilek wichi itoynej n'oye m'ak tä ni'isa wet yok:
–Isit'a.
14¡Ika Dios, tetshan m'ak tä Sambalat lhäy'e Tobías iwoye! ¡Häte tichunche m'ak tä profeta'tsinha Noadías iwoye, lhäy'e iyhäj profetas tä lhamel t'uhläk istunn'o!
Wak'alh n'olafwek tä Jerusalén lep'ot
15Häp n'olafwek tä olhamel oyenlhi wak'alh häp iwel'a tä Elul, ifwala tä veinticinco. Wet n'ochumetna ihi cincuenta y dos ifwalas wet wak'alh. 16Tä olhamel otayhfwas ihanch'oye, lhäy'e wichi tä tott'aho Judá, lhamel lenowayhyaj ihi. Ileyej tä lhaichäjwethä, tsi hiw'en tä oka Dios tach'ot n'oyehen wet häp tä wak'alh t'at.
17Mat ifwalastso häp hin'ol tä len'ohyajay ihiche tä ihi Judá, lhamel ichenepej laka cartas häp Tobías, wet lham ichenepej lhamel häp laka cartas. 18Tsi wujpe wichi tä ihi Judá lhamel pajche hit'untejche lhämet tä yok:
–Ahäpe oka niyat.
Tsi Tobías häpe t'at Ara lhäs tä lhey Secanías häp tä lewhayenek. Wet lham Tobías lhäs tä lhey Johanán iyej atsinha tä Berequías lhäs tä lhey Mesulam lhäse. 19Wet häp tä wichi ilätyenej n'oye nilhokej m'ak tä is tä Tobías iwoye, wet äp ifwenho olhämtes häp Tobías. Wet Tobías ichenpej n'oye laka carta tä fwetaj istunlhin'o.
