Lhawuk t'awayhtes tä õhw'enho ifwalapej
1Lhawuk tahuyej Moisés wet yok:
2–Fwenho Israel lhayis, olak, “Chik nichätepej lewhäy, is chik lew'enho Lhawuk n'olhäk lhäy'e t'awayhtes tä lewunhomche tä lenij ikänitlhi. 3Yej täyhat ifwala tefwajni tä lewunhomche täkwfwas tson'ataj les tä asnakis tä hiw'en nekchäm weihalha tä wuj tä is wet newache m'ak chik iyej. 4Wet is chik lelän elh tä nech'e fwala, wet elh is chik lelän tä honaj. 5Wet p'ajtej Lhawuk t'awayhat tä tälhe yachuyaj, is chik dos kilos harina tä wuj tä is tä lelheteji un litro aceite tä olivo lhits'i. 6Häp täjtso Lhawuk t'awayhat tä õyen n'okhayajayej tä ihihte chenaj Sinaí. Häpe t'awayhat tä õ'wunho tä lenij ikänitlhi ifwalapej ifwalapej. 7Wet hat'es tä lhen t'awayhata, is chik un litro tä lep'ajtej tson'ataj. Wet tsäychufwi Lhawuk lew'et yämthilek lewujyenej. 8Wet elh tson'ataj län tä honaj, wet p'ajtej harina tä wuj tä is lhäy'e aceite, lhäy'e hat'es. Tech'aynej t'at tä lewoye tä nech'e fwala. Häp täjtso Lhawuk t'awayhat tä õ'wunho yämthilek lenij ikänitlhi tä lhen han'okhayajayej.
Lhawuk t'awayhtes tä õhw'enho ifwala tä n'ot'elakw'et
9“Wet ifwala tä n'ot'elakw'et is chik amel lelänhen täkwfwas tson'ataj les tä asnakis tä hiw'en nekchäm weihalha tä wuj tä is wet newache m'ak chik iyej. Wet p'ajtej hat'es, lhäy'e cuatro kilos harina tä wuj tä is tä lelheteji aceite, tä häpe t'awayhat tä tälhe yachuyaj. 10Häp täjtso Lhawuk t'awayhat tä õ'wunho tä is chik lew'enho häp ifwala tä n'ot'elakw'et, lhäy'e hat'es. Wet is chik lep'ajtej t'awayhat tä lew'enho ifwalapej.
Lhawuk t'awayhtes tä õhw'enho iwel'apej
11“Wet iwel'apej, häp ifwala tä ichun, en Lhawuk t'awayhata täkwfwas w'asetas, lhäy'e tefwajni tson'ataj, lhäy'e siete iyhäj tson'ataj les. Wet nilhokej itshätäyna is chik asnakis lhamel wet isen t'at wet newache m'ak chik iyej. Wet is chik õ'wunhomche lhamel wet lhen han'okhayajayej Lhawuk. 12W'asetaj weihalhapej is chik lep'ajtej seis kilos harina tä wuj tä is tä lelheteji aceite. Wet tson'ataj ch'unak is chik lep'ajtej cuatro kilos harina tä wuj tä is tä lelheteji aceite. 13Wet weihalhapej tson'ataj lhäs is chik lep'ajtej dos kilos harina tä wuj tä is tä lelheteji aceite. Häp täjtso Lhawuk t'awayhat tä õ'wunho yämthilek lenij ikänitlhi tä lhen han'okhayajayej. 14Wet hat'es tä lep'ajtej w'asetaj weihalhapej is chik dos litros, wet tä lep'ajtej tson'ataj ch'unak is chik un litro y medio, wet tä lep'ajtej tson'ataj lhäs weihalhapej is chik un litro. Häp täjtso Lhawuk t'awayhat tä is chik lew'enho iwel'apej. 15Häte t'awayhat tä õ'wunho tä lew'enho ifwalapej, is chik lep'ajtej kayla tä lelänpe hach'isukyaj, lhäy'e hat'es tä lew'enho.
Lhawuk t'awayhtes tä õhw'enho tä Pascua
16“Häp nekchämpej, iwel'a tä ichun, wet ifwala catorce, is chik amel lhenlhi Pascua tä lewujyen Lhawuk. 17Wet ifwala tä quince is chik lewoyay akäjyaja, wet siete ifwalas tä is chik letufw pan tä levadura newayej. 18Wet häp siete ifwalastso, häp ifwala tä ichun is chik alehutwek wet len'okwiyej Lhawuk. Yej woyaye achumet chik häpe häp ifwalatso. 19Wet länhen täkwfwas w'asetas, lhäy'e ch'unak, lhäy'e siete tson'ataj les tä hiw'en nekchäm tefwajni. Wet nilhokej itshätäyna is chik asnakis lhamel wet isen t'at wet newache m'ak chik iyej. Wet is chik õ'wunhomche lhamel wet lhen han'okhayajayej Lhawuk. 20Wet p'ajtej harina tä wuj tä is tä lelheteji aceite. Seis kilos harina tä lep'ajtej elh weihalhapej w'asetaj, wet cuatro kilos tä lep'ajtej ch'unak, 21wet dos kilos tä lep'ajtej weihalhapej tson'ataj. 22Häte en Lhawuk t'awayhata kayla yämthilek laha hach'isukyaj wet Lhawuk itäyhat.
23“Woyaye nilhokej tähestso, häte t'awayhat tä õ'wunho tä lew'enhopej tä nech'e fwalapej. 24Häp täjtso m'ak tä is chik lewoyaye ifwalapej ifwalapej, pajtha nojphä siete ifwalas tä lhen akäjyaja. En Lhawuk t'awayhata tähestso tä õ'wunho tä lenij ikänitlhi tä lhen han'okhayajayej. Mat isit'ak tatäy t'awayhat tä õ'wunho tä pajchepej lew'enho ifwalapej. Is chik hap'akej t'at tähestso, lhäy'e hat'es tä lhen t'awayhata ifwalapej. 25Tälhe ifwala tä ichun tä lewoyaye akäjyajtso. Wet chik lechäte ifwala tä lepes, häp ifwala siete, achajo tä alehutwek wet len'okwiyej Lhawuk, hätet iwoye ifwala tä ichun. Yej woyaye achumet chik häpe häp ifwalatso.
Lhawuk t'awayhtes tä õhw'enho häp ifwala tä õ'lanhi yachuyaj lhay tä ichun
26“Häp nekchämpej is chik lewoyay akäjyajayej häp ifwalas tä lhen Lhawuk t'awayhata häp yachuyaj lhay tä ichun. Wet ifwala tä ichun häpe t'at n'ot'amajchet, wet is chik alehutwek wet len'okwiyej Lhawuk. Yej woyaye achumet chik häpe häp ifwalatso. 27Wet länhen täkwfwas w'asetas, lhäy'e ch'unak, lhäy'e siete tson'atas les tä hiw'en nekchäm tefwajni. Wet nilhokej itshätäyna is chik asnakis lhamel. Wet is chik õ'wunhomche lhamel wet lhen han'okhayajayej Lhawuk. 28Wet p'ajtej harina tä wuj tä is tä lelheteji aceite. Seis kilos harina tä lep'ajtej elh weihalhapej w'asetaj, wet cuatro kilos tä lep'ajtej ch'unak, 29wet dos kilos tä lep'ajtej weihalhapej tson'ataj. 30Häte en Lhawuk t'awayhata kayla yämthilek laha hach'isukyaj wet Lhawuk itäyhat. 31Enay han'okhayajayej Lhawuk itshätäytso tä lew'enho, lhäy'e harina tä wuj tä is tä lelheteji aceite, lhäy'e hat'es. Mat isit'ak tatäy t'awayhat tä õ'wunho tä pajchepej lew'enho ifwalapej. Is chik hap'akej t'at tähestso. Wet itshätäy tä lhenay Lhawuk t'awayhata, is chik isen t'at wet newache m'ak chik iyej.
