N'okäjyaj tä õyafwutche n'ofwolis trompetas
1“Häp nekchämpej, iwel'a siete, häp ifwala tä ichun, is chik amel alehutwek wet len'okwiyej Lhawuk. Yej woyaye achumet chik häpe. Häp ifwalatso is chik lhafwutchehen afwolis trompetas, 2wet lelänhen w'asetaj, lhäy'e ch'unak, lhäy'e siete tson'ataj les. Wet nilhokej itshätäyna is chik asnakis lhamel wet wuj tä isen wet newache m'ak chik iyej. Wet is chik õ'wunhomche lhamel yämthilek lenij ikänitlhi Lhawuk tä lhen han'okhayajayej. 3Wet p'ajtej harina tä wuj tä is tä lelheteji aceite. Seis kilos harina tä lep'ajtej w'asetaj, wet cuatro kilos tä lep'ajtej ch'unak, 4wet dos kilos tä lep'ajtej weihalhapej tson'ataj. 5Häte en Lhawuk t'awayhata kayla yämthilek laha hach'isukyaj wet Lhawuk itäyhat. 6Enaypej han'okhayajayej Lhawuk tähestso. Mat isit'ak tatäy t'awayhat tä õ'wunho tä pajchepej lew'enho ifwalapej, iwel'apej. Is chik hap'akej t'at tähestso, lhäy'e häp harina tä lelheteji aceite, lhäy'e hat'es. Woyaye tähestso, mälhyej tä Lhawuk ifwel amho, häpkhilek lenij ikänitlhi.
Lhawuk t'awayhtes tä õhw'enho ifwala tä õ'wo lahaya wichi lech'isukyaj
7“Wet häp iwel'atso, iwel'a siete, häp ifwala diez, is chik amel alehutwek wet len'okwiyej Lhawuk. Nekchämpej is chik alechuyhathen wet yej woyaye achumet chik häpe häp ifwalatso. 8Wet län w'asetaj, lhäy'e ch'unak, lhäy'e siete tson'ataj les. Wet nilhokej itshätäyna is chik asnakis lhamel wet wuj tä isen wet newache m'ak chik iyej. Wet is chik õ'wunhomche lhamel yämthilek lenij ikänitlhi Lhawuk tä lhen han'okhayajayej. 9Wet p'ajtej harina tä wuj tä is tä lelheteji aceite. Seis kilos harina tä lep'ajtej w'asetaj, wet cuatro kilos tä lep'ajtej ch'unak, 10wet dos kilos tä lep'ajtej weihalhapej tson'ataj. 11Häte en Lhawuk t'awayhata kayla yämthilek laha hach'isukyaj wet Lhawuk itäyhat. Is chik hap'akej elh kayla tä sacerdote ilän häp ifwalatso tä õ'täyhtejen wichi lech'isukyajay. Wet isit'ak tatäy Lhawuk t'awayhat tä õ'wunho tä pajchepej lew'enho ifwalapej. Is chik hap'akej t'at tähestso, lhäy'e harina tä lelheteji aceite, lhäy'e hat'es.
Lhawuk t'awayhtes tä õhw'enho tä n'okäjyaj tä N'ohupelis
12“Häp nekchämpej, iwel'a siete, häp ifwala quince, is chik amel alehutwek wet len'okwiyej Lhawuk. Yej woyaye achumet chik häpe häp ifwalatso. Is chik lewo akäjyaja pajtha siete ifwalas tä lewunit Lhawuk. 13Häp ifwala tä ichun tä lewoyaye akäjyajtso, länhen trece w'asetas, lhäy'e täkwfwas ch'unak lhayis, lhäy'e catorce tson'ataj les tä hiw'en nekchäm weihalha. Wet nilhokej itshätäytso is chik asnakis lhamel wet wuj tä isen wet newache m'ak chik iyej. Wet is chik õ'wunhomche lhamel yämthilek lenij ikänitlhi Lhawuk tä lhen han'okhayajayej. 14Wet p'ajtej harina tä wuj tä is tä lelheteji aceite. Seis kilos harina tä lep'ajtej elh weihalhapej w'asetaj, wet cuatro kilos tä lep'ajtej weihalhapej ch'unak, 15wet dos kilos tä lep'ajtej weihalhapej tson'ataj. 16Häte en Lhawuk t'awayhata kayla yämthilek laha hach'isukyaj wet Lhawuk itäyhat. Mat isit'ak tatäy t'awayhat tä õ'wunho tä pajchepej lew'enho ifwalapej. Is chik hap'akej t'at tähestso, lhäy'e harina tä lelheteji aceite, lhäy'e hat'es.
17“Häp ifwala dos tä lewoyaye akäjyajtso, länhen doce w'asetas, lhäy'e täkwfwas ch'unak lhayis, lhäy'e catorce tson'ataj les tä hiw'en nekchäm weihalha. Wet nilhokej itshätäytso is chik asnakis lhamel wet wuj tä isen wet newache m'ak chik iyej. 18Wet p'ajtej harina lhäy'e hat'es tä lhenay Lhawuk t'awayhata, mälhyej tä ne'tek lewoyaye ifwala tä ichun. 19Häte en Lhawuk t'awayhata kayla yämthilek laha hach'isukyaj wet Lhawuk itäyhat. Mat isit'ak tatäy t'awayhat tä õ'wunho tä pajchepej lew'enho ifwalapej. Is chik hap'akej t'at tähestso, lhäy'e harina tä lelheteji aceite, lhäy'e hat'es.
20“Häp ifwala tres tä lewoyaye akäjyajtso, länhen once w'asetas, lhäy'e täkwfwas ch'unak lhayis, lhäy'e catorce tson'ataj les tä hiw'en nekchäm weihalha. Wet nilhokej itshätäytso is chik asnakis lhamel wet wuj tä isen wet newache m'ak chik iyej. 21Wet p'ajtej harina lhäy'e hat'es tä lhenay Lhawuk t'awayhata, mälhyej tä ne'tek lewoyaye ifwala tä ichun. 22Häte en Lhawuk t'awayhata kayla yämthilek laha hach'isukyaj wet Lhawuk itäyhat. Mat isit'ak tatäy t'awayhat tä õ'wunho tä pajchepej lew'enho ifwalapej. Is chik hap'akej t'at tähestso, lhäy'e harina tä lelheteji aceite, lhäy'e hat'es.
23“Häp ifwala cuatro tä lewoyaye akäjyajtso, länhen diez w'asetas, lhäy'e täkwfwas ch'unak lhayis, lhäy'e catorce tson'ataj les tä hiw'en nekchäm weihalha. Wet nilhokej itshätäytso is chik asnakis lhamel wet wuj tä isen wet newache m'ak chik iyej. 24Wet p'ajtej harina lhäy'e hat'es tä lhenay Lhawuk t'awayhata, mälhyej tä ne'tek lewoyaye ifwala tä ichun. 25Häte en Lhawuk t'awayhata kayla yämthilek laha hach'isukyaj wet Lhawuk itäyhat. Mat isit'ak tatäy t'awayhat tä õ'wunho tä pajchepej lew'enho ifwalapej. Is chik hap'akej t'at tähestso, lhäy'e harina tä lelheteji aceite, lhäy'e hat'es.
26“Häp ifwala cinco tä lewoyaye akäjyajtso, länhen nueve w'asetas, lhäy'e täkwfwas ch'unak lhayis, lhäy'e catorce tson'ataj les tä hiw'en nekchäm weihalha. Wet nilhokej itshätäytso is chik asnakis lhamel wet wuj tä isen wet newache m'ak chik iyej. 27Wet p'ajtej harina lhäy'e hat'es tä lhenay Lhawuk t'awayhata, mälhyej tä ne'tek lewoyaye ifwala tä ichun. 28Häte en Lhawuk t'awayhata kayla yämthilek laha hach'isukyaj wet Lhawuk itäyhat. Mat isit'ak tatäy t'awayhat tä õ'wunho tä pajchepej lew'enho ifwalapej. Is chik hap'akej t'at tähestso, lhäy'e harina tä lelheteji aceite, lhäy'e hat'es.
29“Häp ifwala seis tä lewoyaye akäjyajtso, länhen ocho w'asetas, lhäy'e täkwfwas ch'unak lhayis, lhäy'e catorce tson'ataj les tä hiw'en nekchäm weihalha. Wet nilhokej itshätäytso is chik asnakis lhamel wet wuj tä isen wet newache m'ak chik iyej. 30Wet p'ajtej harina lhäy'e hat'es tä lhenay Lhawuk t'awayhata, mälhyej tä ne'tek lewoyaye ifwala tä ichun. 31Häte en Lhawuk t'awayhata kayla yämthilek laha hach'isukyaj wet Lhawuk itäyhat. Mat isit'ak tatäy t'awayhat tä õ'wunho tä pajchepej lew'enho ifwalapej. Is chik hap'akej t'at tähestso, lhäy'e harina tä lelheteji aceite, lhäy'e hat'es.
32“Häp ifwala siete tä lewoyaye akäjyajtso, länhen siete w'asetas, lhäy'e täkwfwas ch'unak lhayis, lhäy'e catorce tson'ataj les tä hiw'en nekchäm weihalha. Wet nilhokej itshätäytso is chik asnakis lhamel wet wuj tä isen wet newache m'ak chik iyej. 33Wet p'ajtej harina lhäy'e hat'es tä lhenay Lhawuk t'awayhata, mälhyej tä ne'tek lewoyaye ifwala tä ichun. 34Häte en Lhawuk t'awayhata kayla yämthilek laha hach'isukyaj wet Lhawuk itäyhat. Mat isit'ak tatäy t'awayhat tä õ'wunho tä pajchepej lew'enho ifwalapej. Is chik hap'akej t'at tähestso, lhäy'e harina tä lelheteji aceite, lhäy'e hat'es.
35“Wet ifwala ocho is chik alehutaywek yämthilek len'okwiyej Lhawuk. Yej woyaye achumet chik häpe häp ifwalatso. 36Länhen w'asetaj, lhäy'e ch'unak, lhäy'e siete tson'ataj les tä hiw'en nekchäm weihalha. Nilhokej itshätäytso is chik asnakis lhamel wet wuj tä isen wet newache m'ak chik iyej. Wet is chik õ'wunhomche yämthilek lenij ikänitlhi Lhawuk tä lhen han'okhayajayej. 37Wet p'ajtej harina lhäy'e hat'es tä lhenay Lhawuk t'awayhata, mälhyej tä ne'tek lewoyaye ifwala tä ichun. 38Häte en Lhawuk t'awayhata kayla yämthilek laha hach'isukyaj wet Lhawuk itäyhat. Mat isit'ak tatäy t'awayhat tä õ'wunho tä pajchepej lew'enho ifwalapej. Is chik hap'akej t'at tähestso, lhäy'e harina tä lelheteji aceite, lhäy'e hat'es.
39“Häp täjtso m'ak tä is chik lewoyaye chik nichätepej ifwala tä lewhäy. Is chik lhen Lhawuk t'awayhtesa itshätäy tä õ'wunhomche, wok harina tä lelheteji aceite, wok hat'es, wok häp itshätäy tä lelänhen tä let'uhläk ale'isyene Lhawuk. Häte elh chik häpe imatitche lhämet tä iwoyeje Lhawuk wet iwo t'awayhata'pe täjtso, wok elh yen tichunhayaja tä is chik iwo t'awayhata.”
40Tä Lhawuk ileyej lhämtesna, Moisés ifwenho Israel lhayis nilhokej m'ak tä Lhawuk ne'tek iwoye.
