Moisés yachaje Lhawuk lew'et tä wak'alh yämthilek yen t'amajcheta
1Häp ifwala tä wak'alh häp Dios lew'et tä Moisés ineyhatphä, wet yachaje Dios yämthilek yen t'amajcheta. Wet itsäype aceite, lhäy'e nilhokej m'ayhay tä ichufwi, lhäy'e altar, lhäy'e m'ayhay tä iyej. 2-3Wet häp wichi kaniyatey tä pajche iwo t'ufwahtesa wichi, lhamel ihäne Lhawuk seis kaletas tä õhp'okwe'pe, lhäy'e doce weyis lhayis. Täkwfwaspej niyatey lhamel hiw'enho kaletaj tefwajni tä yen t'awayhata, lhäy'e täkwfwas weyis lhayis, wet itihi tä Dios lew'et tatache. 4Wet Lhawuk tahuyej Moisés wet yok:
5–Chumahlä kaletas lhäy'e weyis lhayis, wet w'enhola wichi tä tälhe letes Leví, yämthilek lhamel ichumyenejwethä lechumtes tä tach'ote carpa tä owukwe, mälhyej m'ak tä elhpej lechumet tä is chik iwoye.
6Tä mälhyejtso, Moisés tachumlä kaletas lhäy'e weyis lhayis wet hiw'enho Leví lhayis. 7Hiw'enho Leví lhayis tä tälhe letes p'ante Gersón täkwfwas kaletas lhäy'e cuatro weyis lhayis, yämthilek ichumyenejlhi lechumtes tä iwoye. 8Wet hiw'enho iyhäj tä tälhe letes p'ante Merari cuatro kaletas lhäy'e ocho weyis lhayis, yämthilek lhamel ichumyenejlhi lechumtes tä iwoye. Wet Aarón lhäs Itamar häp tä itetshan lhamel. 9Mat häp Leví lhayis tä tälhe letes p'ante Coat, Moisés hiw'enhihot'a lhamel häp kaletas lhäy'e weyis lhayis. Tsi m'ak tä lhamel lechumet tä õhw'enhatej häpe t'at m'ayhay tä n'ot'amajchetes tä lhamel tilhäjpej.
10Wet õyachaje Lhawuk häp altar wet õ'tsäype aceite yämthilek yen t'amajchetayej. Wet hin'ol tä iyhäj kaniyatey ihäne m'ayhay tä yen t'awayhata Lhawuk, wet itihi tä altar tatache. 11Wet Lhawuk tahuyej Moisés wet yok:
–Is chik ifwalapej hin'o tä iyhäj kaniyat ihäne t'awayhat häp altar, wet äp ifwala elh elh niyat tä ihäne, yämthilek oyen ot'amajchetayej altar. Häp täjtso m'ak tä is chik lhamel iwoyepej.
12Wet ifwala tä ichun, elh tä ihän alhoho Lhawuk t'awayhat häpe Aminadab lhäs tä lhey Nahasón, tä tälhe wichi tä tälhe letes Judá. 13Wet m'ak tä yen t'awayhata häpe lehi tä plata tä hiw'en mil cuatrocientos treinta (1.430) gramos, lhäy'e lehi elh tä plata tä hiw'en setecientos setenta (770) gramos. Tä õ'wo kaw'awlhanhatayej, õ'chumyenlhi mälhyej tä sacerdotes ichumyenlhi. Wet õyäm tapokwe lhamel häp harina tä wuj tä is wet õ'kasoyej aceite yämthilek õhw'enho Lhawuk. 14Wet hip'ajtej n'okalnek tä oro tä hiw'en ciento diez (110) gramos, wet õyäm tapoyej incienso. 15Häte yen t'awayhata w'asetaj lhäs, lhäy'e tson'ataj ch'unak, lhäy'e tson'ataj lhäs tä hiw'en nekchäm weihalha, yämthilek õ'wunhomche tä õyen n'okhayajayej Lhawuk, 16lhäy'e kayla tä asnak tä õ'länpe n'och'isukyajay. 17Wet tä lepese täkwfwas weyis lhayis, lhäy'e cinco tson'atas ch'unak lhayis, lhäy'e cinco kayla lhayis tä asnakis, lhäy'e cinco tson'atas les tä hiw'en nekchäm weihalha. Häp nilhokej itshätäyna tä õ'länhen yämthilek wichi tä tälhe letes Judá lha'isyene Lhawuk. Häp tähestso m'ak tä Nahasón yen t'awayhata Lhawuk.
18Wet häp ifwala elh, hin'o tä ihän alhoho Lhawuk t'awayhat häpe Suar lhäs tä lhey Natanael, tä tälhe wichi tä tälhe letes Isacar. 19-23Wet m'ak tä yen t'awayhata hätet iwoye m'ak tä Nahasón yen t'awayhata.
24Wet ifwala tä tres, hin'o tä ihän alhoho Lhawuk t'awayhat häpe Helón lhäs tä lhey Eliab, tä tälhe wichi tä tälhe letes Zabulón. 25-29Wet m'ak tä yen t'awayhata hätet iwoye m'ak tä iyhäj yen t'awayhata.
30Wet ifwala tä cuatro, hin'o tä ihän alhoho Lhawuk t'awayhat häpe Sedeúr lhäs tä lhey Elisur, tä tälhe wichi tä tälhe letes Rubén. 31-35Wet m'ak tä yen t'awayhata hätet iwoye m'ak tä iyhäj yen t'awayhata.
36Wet ifwala tä cinco, hin'o tä ihän alhoho Lhawuk t'awayhat häpe Surisaday lhäs tä lhey Selumiel, tä tälhe wichi tä tälhe letes Simeón. 37-41Wet m'ak tä yen t'awayhata hätet iwoye m'ak tä iyhäj yen t'awayhata.
42Wet ifwala tä seis, hin'o tä ihän alhoho Lhawuk t'awayhat häpe Reuel lhäs tä lhey Eliasaf, tä tälhe wichi tä tälhe letes Gad. 43-47Wet m'ak tä yen t'awayhata hätet iwoye m'ak tä iyhäj yen t'awayhata.
48Wet ifwala tä siete, hin'o tä ihän alhoho Lhawuk t'awayhat häpe Amihud lhäs tä lhey Elisama, tä tälhe wichi tä tälhe letes Efraín. 49-53Wet m'ak tä yen t'awayhata hätet iwoye m'ak tä iyhäj yen t'awayhata.
54Wet ifwala tä ocho, hin'o tä ihän alhoho Lhawuk t'awayhat häpe Pedasur lhäs tä lhey Gamaliel, tä tälhe wichi tä tälhe letes Manasés. 55-59Wet m'ak tä yen t'awayhata hätet iwoye m'ak tä iyhäj yen t'awayhata.
60Wet ifwala tä nueve, hin'o tä ihän alhoho Lhawuk t'awayhat häpe Gedeoni lhäs tä lhey Abidán, tä tälhe wichi tä tälhe letes Benjamín. 61-65Wet m'ak tä yen t'awayhata hätet iwoye m'ak tä iyhäj yen t'awayhata.
66Wet ifwala tä diez, hin'o tä ihän alhoho Lhawuk t'awayhat häpe Amisaday lhäs tä lhey Ahiezer, tä tälhe wichi tä tälhe letes Dan. 67-71Wet m'ak tä yen t'awayhata hätet iwoye m'ak tä iyhäj yen t'awayhata.
72Wet ifwala tä once, hin'o tä ihän alhoho Lhawuk t'awayhat häpe Ocrán lhäs tä lhey Pagiel, tä tälhe wichi tä tälhe letes Aser. 73-77Wet m'ak tä yen t'awayhata hätet iwoye m'ak tä iyhäj yen t'awayhata.
78Wet ifwala tä doce, hin'o tä ihän alhoho Lhawuk t'awayhat häpe Enán lhäs tä lhey Ahira, tä tälhe wichi tä tälhe letes Neftalí. 79-83Wet m'ak tä yen t'awayhata hätet iwoye m'ak tä iyhäj yen t'awayhata.
84-86Tä mälhyej'attso, õyachaje Lhawuk häp altar wet õ'tsäype aceite yämthilek õyen t'amajcheta. Wet hin'ol tä iyhäj kaniyatey ihäne m'ayhay tä yen t'awayhata Lhawuk: häp doce lehis tä plata, lhäy'e doce lehis iyhäj tä plata tä wujit'a tä choyhat, lhäy'e doce n'okalnhey tä oro tä õyäm tapokwe incienso. Wet elhpej lehi tä plata hiw'en mil cuatrocientos treinta (1.430) gramos, wet elhpej lehi tä plata tä wujit'a tä choyhat hiw'en setecientos setenta (770) gramos. Tä nilhok, iche veintiséis mil cuatrocientos (26.400) gramos plata. Tä õ'wo kaw'awlhanhatayej, õ'chumyenlhi mälhyej tä sacerdotes ichumyenlhi. Wet elhpej n'okalnek tä oro hiw'en ciento diez (110) gramos, õ'chumyenlhi mälhyej tä sacerdotes ichumyenlhi. Tä nilhok, iche mil trescientos veinte (1.320) gramos oro.
87Wet häp itshätäy tä õ'wunho yämthilek õyen n'okhayajayej Lhawuk, tä nilhok iche doce w'asetas les, lhäy'e doce tson'atas ch'unak lhayis, lhäy'e doce tson'atas les tä hiw'en nekchäm weihalha, lhäy'e harina tä õhp'ajtej lhamel, lhäy'e doce kayla lhayis tä asnakis tä õ'länpe n'och'isukyajay.
88Wet häp itshätäy tä õ'länhen yämthilek wichi lha'isyene Lhawuk, tä nilhok iche veinticuatro w'asetas les, lhäy'e sesenta tson'atas ch'unak lhayis, lhäy'e sesenta kayla lhayis tä asnakis, lhäy'e sesenta tson'atas les tä hiw'en nekchäm weihalha.
Häp tähestso m'ayhay tä wichi yen t'awayhata Lhawuk, häp ifwala tä õyachaje altar wet õ'tsäype aceite yämthilek õyen t'amajcheta.
89Tä Moisés ihopejchufwi carpa tä Lhawuk lewukwe yämthilek tahuyej Lhawuk, ilätepej Lhawuk lepak tä tumpe Lep'altsenyajw'et tä i'pe Arca tä N'ot'amajchet tä Lhawuk lhämtes ihi. Matche, häp lhip tä m'ayhay tä lhafwis ihi i'pe, häp tä Lhawuk lepak tumpe tä tahuyejpej Moisés.
