1Tej chik op'elitsaj,
mat chik is alhoho m'ak tä owoye,
häp tä is.
Isit'ak ohäpe hin'o tä ch'isuk
wet oyen otkanyaja olhämtes.
2Häte isit'a chik owoye m'ak tä n'am hanej.
Wet elh tä nilhak'ale m'ak tä iwoye, isit'a alhoho.
3Hin'o tä laj lehuseka
wetayej m'ak tä fwetaj iwoye,
wet lewäk itiyej Lhawuk.
4Chik elh hiw'en m'ayek,
wujpey lakalay'is.
Mat häp elh tä niw'ena m'ayek,
lakalay'i ileyej.
5Elh tä kamatache tä fwetaj
hiw'en m'ak tä yäme, õ'tasnhila.
Wet elh tä w'et yämlhi,
lewit'äyhyaj ihiyeja wet tek tafwayhiyeja.
6Wujpe wichi t'alhe hin'o tä len'ohyaj ihi lech'otyaj.
Wet elh weihalhapej yen at lakalay'iya
elh tä hiw'enho m'ayek.
7Hin'o tä p'elitsaj lepuhfwas y'ulhan t'at,
wet iyhäj tä lakalay'is nem koyhyaj, ileyej t'at.
8Elh tä yen chumyaja m'ak tä lhaichufwenej,
t'amaj lhamej wet ikalhi m'ayek.
9Elh tä kamatache tä fwetaj
hiw'en m'ak tä yäme, õ'tasnhila,
wet elh tä w'et yämlhi y'inhila.
10Tek t'uhawetej hin'o tä ch'isuk
chik hiw'en m'ayhay tä isis.
Wet elh tä n'okawo t'uhawethiyejt'a
chik niyatej hin'ol tä len'ohyajay ihiche.
11Hin'o tä lehusek ihi
itäyhat t'at lewäk.
Wet tä nena letichunhayaja tä õ'lätyenlhi,
wichi ihumin t'at.
12Niyat lewäk hätet iwoye hay'äj tä y'ip.
Mat tä hip'altsen wichi,
hätet iwoye ayas tä nitsäype hal'ä tälhes.
13Mamse tä laj lehuseka,
lajcha wit'äyhyaj t'at.
Wet atsinha tä äkleyhtsaj,
hätet iwoye hup lhetekch'o
tä tatoy chik iwomchä.
14Hin'o lewukwe lhäy'e lakäywet tälhe lajchalis.
Mat häp lech'efwa tä lehusek ihi tälhe t'at Lhawuk.
15Hin'o tä n'etäjej lechumet,
wuj nahati tä ilän.
Wet hin'o chik nitäyijlhaya lhame,
nehläs ilänla.
16Elh chik t'amajej Lhawuk lhämet,
t'amaj at lhamej.
Mat elh tä yen w'et m'ayeka Lhawuk chufwenyaj, y'inhila.
17Chik elh icheyjäntej laka chinaj t'äj
häp elh tä p'elitsaj,
icheyjäntej t'at häp Lhawuk,
wet lhamlak iwo lahaya.
18Tasin äs tä kamaj nithaläkwa,
mat yej länej atasnhayaj.
19Elh tä wuj tä lewäk ihi
ikathiyeja laha tä t'uhawetej.
Wet chik õknitasina,
hich'athiyejak iwoye m'ak tä ni'isachehen.
20Ch'ahuye n'ochufwenyaj
wet chumlä n'ofwonyaj,
wet chik lepese ahäpkhila
hin'o tä ihan m'akej.
21Wujpe m'ayhay tä hin'o
yen tichunhayaja yämthilek iwoye,
mat Lhawuk lenech'ethayaj
häpkhilek lhayäm matche.
22Wichi iwujyen hin'ol tä afwtintses.
Wet is chik ohäpe t'at hin'o tä niw'ena m'ayek,
wet tek ohäpe hin'o tä ifwech'enwethä iyhäj.
23Chik hin'o ihumin Lhawuk wet iwoye lhämtes,
täjtso häp tä ihäne lew'atshancheyaj.
Matche tä letamsek ihi wet newache lewit'äyhyaj.
24Hin'o tä n'etäjlhi tachuma n'olhäk tä ihi plato,
mat tek ichuttej yämthilek itiye lak'aj.
25Chik õ'tasin hin'o tä aläkwyhantsaj,
wet hin'o tä laj lehuseka
nech'e lhaichufwenlak hiw'en.
Wet chik õ'tasin hin'o tä lehusek ihi,
lhäy'ehila lhip lehanyaj.
26Elh chik t'etane m'ak tä lewuk lajcha
wet äp ichen lako tä ihi lew'et,
lhain'äfwlhat wet wichi iläkwlhi.
27Yäs, chik leleyej tä letach'ahuye ofwonyaj,
nemla lewoye olhämtes tä isen tä one'tek lewoye.
28Elh tä kamatache tä fwetaj hiw'en m'ak tä yäme,
iläkwlhi n'okalelhthayaj.
Wet hin'ol tä kahap'altsentsesa
iwoye lhämtes tä ni'isachehen.
29Iche t'at n'otasnhayajay
tä õ'waklhatho aläkwyhantses
lhäy'e iyhäj tä laj lehuseya.
