Prov 20

₁Hat'es, chik hin'o iyäyej,

nech'e aläkwyhantsaj t'at wet ifwitseyen,

wet nehit katsik is m'ak tä iwoye chik w'oknaj.

₂Niyat tä fwitsaj

hätet iwoye hay'äj tä y'ip,

wet elh chik ifwitseyen

t'änej at lhame lewit'äyhyaj.

₃Wichi iwujyen hin'o

tä nittayahlä iyhäj.

Mat häp hin'o tä ch'isuk

ikelit tä tatayhlä elh.

₄Tä nichäte lewhäy tä wichi tutcheyhen,

n'etäjayis tutcheyhit'a.

Wet tä nichäte lewhäy tä õ'lanhi yachuyaj,

t'alhlhi t'at mat nehit katsik hiw'enho.

₅Hin'o lenech'ethayaj tä ihi lehusek

hätet iwoye inät tä atojchä,

mat elh tä lehusek ihi hin'älthila.

₆Ichehen hin'ol tä yäm lhamehen tä fwetaj isen,

mat ihichet'a hin'o chik wichi t'ekhaye.

₇Hin'o tä is iwoye t'at m'ak tä is alhoho,

wet lakäjyaj ihi leles tä nekche len'äyij.

₈Chik rey tatayhiphä n'okalelhthayaj lew'et,

itetshan t'at wichi tä ihi tä tatache,

wet ikalelhät m'ak tä ni'isa yämthilek noj.

₉Elh chik yok,

“Olej ohusek, noj och'isukyaj”,

mathichet'a lhämet.

₁₀N'okaw'awlhanthi tä akantsaj

lhäy'e metro tä akantsaj,

Lhawuk wuj tä y'ulhan.

₁₁M'ayhay tä han'äfwaj iwoye,

n'änhila chik is wok ni'isa.

₁₂Lhawuk lham t'at tä yenlhi och'ote

yämthilek olätche honhat,

wet yenlhi ottelho

yämthilek ow'enche honhat.

₁₃Yej humin tä lemä,

häpkhilek niwohit m'ak chik tatäy amej

wet lew'en äk tä naya.

₁₄Hin'o tä ichäj m'ayek yok,

“Matche tä ni'isa täja.”

Mat w'et iwoye t'attso,

akäjejlhi t'at tä ichäj.

₁₅Hin'o tä ihan m'akej,

lhämtes laha inu'pe oro

lhäy'e m'ayhay tä wuj laha tä ihonhatena.

₁₆Elh chik lhailhuhyenej

elh tä nitäfwelayej laka pi'ä,

soyej lew'uy yämthilek yen lhäyeka letape.

₁₇Hin'o ihumin tä tufw

m'ak tä ikalheji lefweynhayaj.

Mat tä lak'aj tapoyejej,

nech'e häpe t'at tunte les.

₁₈Chik iche m'ak tä let'uhläk lewoye,

chunkat alhe elh chik iwo achoweja.

Chik isen lhämtes, woye t'at.

Chik lewo aka'tshayaja, a'äm hin'olhi,

äm lehanej m'ak tä lewoye.

₁₉Elh tä sitäwo tek iskat m'ak chik häpe.

Tä mälhyejtso, yej alet'aje

elh tä lhämet nit'unahi.

₂₀Elh chik takäpfwayeje lewit'äyhyaj

lajcha wok lako,

y'inhila tä ihi honataj tä tanhowatnhan.

₂₁N'okäywet tä hin'o ikalhi

tä nitälhayejo lechumet,

chik lepese Dios lakäpfwayaj ihiyejt'ala.

₂₂Yej lhok, “Owo hayahlä

m'ak tä oelh iwoyej n'oye.”

Mat tiyej achayaj häp Lhawuk,

wet lhamlak tach'ot ame wet aifwayhtej.

₂₃Isit'a n'okaw'awlhanthi tä akantsaj.

Lhawuk wuj tä y'ulhan.

₂₄Lhawuk lhäm t'at tä tach'anlhaye

wok nitch'anlhayaye m'ak tä hin'o iwoye.

Tä mälhyejtso, nehit katsik ts'ilak lhamej

wet ihanhiyeja m'ak chik ihiyeja.

₂₅Elh chik näma ayej kalelhäj letichunhayaj

tä iwo t'awayhata Dios,

wet chik tajyäme tä iwoye täjtso

wet yok, “Okalhihit'a”,

lewit'äyhyaj t'at.

₂₆Niyat tä lehusek ihi

yokwes wichi tä kahap'altsentsesa,

wet y'äsayenpe kaletas.

₂₇Lhawuk lechäkw häpe t'at hin'o lehusek,

wet hiw'en m'ak tä ilech'oye hin'o.

₂₈Niyat tä hap'altsentsaj

wet nileyayej laka wichi,

nofwit'ala leniyatyaj.

₂₉Mamses len'ohyaj tälhe lakhajyhayaj,

wet hin'ol tä lew'oley ipelajiche,

wichi yenhit'a w'et m'ayeka.

₃₀N'otasnhayaj tä äytaj,

häp tä itäyhat m'ak tä ni'isa.

Wet chik õ'päjlhi hin'o,

häp tä nech'e is m'ak

tä yen tichunhayaja lhamej.