M'ak tä elh isej tä tälho lehanyaj
1Yäs, a'en lewuka olhämtes
wet en atichunhayaja.
2Ch'ahuye n'ohanyaj
wet tihi ahusek yämthilek lewoye.
3Mälhetwek ahusek tä let'alheje Dios
yämthilek ayen häpeya elh tä lehusek ihi.
4Amälhetwek tä let'ukwe tähestso,
hätet iwoyek let'ukwe chinaj t'äj
wok n'okäywet tä õ'iskat.
5Chik lewoye täjtso,
letäfwenhiyeja m'ak tä is chik lewoye
yämthilek lehumin Lhawuk wet lewoye lhämtes,
wet nech'e mathichelak letäfwelej Dios.
6Tsi Lhawuk lham t'at tä hiw'enhomche wichi lehanyaj.
M'ak tä häpe n'ohanyaj
lhäy'e n'otäfwnhayaj tälhche lak'aj.
7Lhawuk tach'ote wet t'uye lhamel
tä is alhoho m'ak tä iwoye wet newache letes.
8T'uyepej iyhäj tä inukwe len'äyij tä is alhoho,
wet t'amajej iyhäj tä t'ifwtiyej lham.
9Chik letach'ahuye olhämtes,
lehanhiyeja m'ak tä is alhoho wet äp is,
wet alewaklhat t'at yämthilek lewoye m'ak tä is.
10Tsi n'ohanyaj tiyäjla amho
wet ikäjyenhilhila ahusek.
11Chik lhen atichunhayaja wet ahanyaj ihi,
häpkhilek t'amaj amej wet tek attäy.
12Ifwayhthila amej n'äyij tä ni'isa,
lhäy'e hin'ol tä iwoye lhämtes tä t'akanyajay,
13häp lhamel tä ileche n'äyij tä is,
wet inukwe n'äyhäy tä honatsichehen,
14wet yen käjyaja tä iwit'äyen iyhäj,
wet ihumin m'ak tä ni'isa tä iwoye,
15wet nistakej n'äyij tä is alhoho,
wet inukwe n'äyhäy tä hits'ulhakchehen.
16Wet n'ohanyaj ifwayhthila amej
atsinha tä lech'efwa ihi
tä ikänitlhi amej lhämtes tä akäschehen,
17häp lham tä iwom t'unfwa tä ichun
wet hip'ethatlä lhämet tä iwoye
tä ihi tä Dios tatache.
18Chik lenukwe n'äyij tä tiyäje lew'et,
letataye t'at ilek, hap'itsekw'et t'at.
19Wet hin'ol tä tiyäjchufwi lewukwe,
tek lhamel inukwephä,
wet nemla yachajok inuhikwela n'äyij
tä tiyäje n'ow'atshancheyaj.
20Tä mälhyejtso, nukwe n'äyij tä is
wet woye m'ak tä wichi tä isen iwoye.
21Tsi lhamel tä is m'ak tä iwoye wet newache letes,
tatäyhit'a tä ihi t'at honhat tä lew'et.
22Mat häp lhamel tä iwoye m'ak tä ni'isa
wet ileche Dios len'äyij,
õ'tihiyeja kanhihlä honhat tä ihi.
