Prov 24

₁Yej t'äytene wichi tä ni'isa,

wet yej lhen atichunhayajak lhewej lhamel.

₂Tsi tajlhamat lefwitseyaj

tä yen letichunhayaja,

wet iwoyepej lhämtes tä ni'isachehen.

₃Hin'o tä lehusek ihi

ihanej iwoyneje m'ak tä iwoye

yämthilek lew'et lheley letamsekis ihi.

₄Wet nitäfwelej m'ayhay

tä laha ihi tä wuj tä isis,

wet häp tä itichufwi lewukwech'ol.

₅Hin'o tä ihan m'akej,

häp tä laha ihi,

inu'pe n'okhajyhayaj.

₆Tsi chik iche n'oka'tshayaj,

chunkat wichi iwo huseya'pe

m'ak tä is chik iwoye.

Wet chik iche wujpey hin'ol tä lehusey ihi,

iyhäj isej lhämtes tä isen

wet ikalhi laka'tshayaj.

₇Chik wichi lhaihutwek yämthilek

itetshan m'ayhay tä laha ihi,

hin'o tä ch'isuk ihanhiyejt'a

lhämet chik iwoye,

yok tam, tsi ihanhit'a m'akej.

₈Hin'o tä yenwethä m'ak tä ni'isa,

wichi yok, “Akantsaj.”

₉Wet m'ak tä t'uhläk iwoye

häp hin'o tä ch'isuk,

häpe t'at lech'isukyaj.

Wet wichi wuj tä y'ulhan

häp hin'o tä aläkwyhantsaj.

₁₀Chik iche lewhäy tä atha han'äyij

wet lhok, “Okalhihit'a”,

tälhe tä otle nit'una.

₁₁Yej wahnej iyhäj

tä ihäne t'ilek häp elh.

Fwayhthen iyhäj tä eyte õ'länhihen.

₁₂Tsi tejlak lhok,

“Olhamel ohanhiyejt'a”,

mat Hin'o tä itetshan wichi lehusey

hiw'en tä isichet'a ämet,

wet iwo lahayayej m'ak tä lewoye.

₁₃Yäs, tufw akäyek tsi wuj tä is.

Chik nichätho hak'aj,

wuj tä hak'onek.

₁₄Mälhhiyejattso ahanyaj

lhäy'e atäfwnhayaj

chik nichätho ahusek.

Chik lelhokhiyela, aisila alhoho

wet tek tatäyhla aniwhayaj.

₁₅Yej aletech'aynej hin'o tä kahap'altsentsaja

tä ikanejlhi hup tä lewuk hin'o tä is

yämthilek t'etane m'ak tä ichufwi.

₁₆Tsi tej chik hin'o tä is nichätpej katsi

pajla'tha siete veces, mat neyhiphäla.

Mat häp hin'ol tä kahap'altsentsesa,

lhamel nichäthihola lewit'äyhyaj.

₁₇Yej a'käjlhi chik nichätpej katsi atayhfwa.

₁₈Tsi chik Lhawuk hiw'en m'ak tä lewoyaye,

tek akäjiyejlhila,

wet itihiyeja kanhi lewäk tä itiyej atayhfwa.

₁₉Yej län amej atichunhayaj

chik lew'en wichi tä iwoye m'ak tä ni'isa,

wok let'äytene lhamel.

₂₀Tsi hin'o tä ni'isa

ifwitla lakapes wet noj,

tehlat iwoye n'ochäkw chik y'om.

₂₁Yäs, is chik lewujyen

häp Lhawuk lhäy'e niyat.

Yej amtej letatayhlä lhamel.

₂₂Tsi chik Lhawuk iwo lewäka, lhäy'e niyat,

wet letayhfwas yofwajkwet nichätho lewit'äyhyaj.

Isit'ak n'okalelhthayajwos iwo leyahneka.

₂₄Elh chik tahuyej hin'o tä ni'isa

wet yok, “Letes ihichet'a”,

elh tä iwoyetso wichi iwoyeje lhämtes tä ni'isa

wet yen w'et m'ayeka.

₂₅Mat häp n'okalelhthayajwos

tä itasin hin'o tä ni'isa,

wichi yok, “Häp tä is.”

₂₆Elh chik is alhoho lhämet

chik nichulho m'ak chik õty'ätshaneje,

matche tä iyhäj ihuminche lhämet.

₂₇Äm wak'alhen achumtes

wet enwethä achumtes tä ihi alafwek.

Chik wak'alhen, nech'e häpkhilek lhenlhi awukwe.

₂₈Yej kalelhät letes aelh

chik nikalelhäja m'ak chik ni'isa tä iwoye,

wet yej woyeje ämet tä kamatache.

₂₉Yej lhok,

“M'ak tä hin'otso iwoyej n'oye,

häte olham owoynhiyejelatso m'ak chik owoyeje.

Owohla lahaya m'ak tä iwoyej n'oye.”

₃₀Onukwe lhip lelafwek häp hin'o

tä n'etäjayis tä laj lehuseka.

₃₁Ow'en tä wuj hon'al tä yelaj

tä tälho, lhäy'e nawaj,

wet tuntey tä yen lelafweka wasi.

₃₂Tä ow'en, wuj tä oyen tichunhayaja.

Wet ohanej m'ak tä tamenej, wet oyok,

₃₃Tä lekän nahati wet letatsufwel amej

yämthilek akäj tä lemä,

₃₄hap'altseyaj ailänla

wet nehläs nichätla atape,

hätehlat iwoye etantsaj chik aipäjlhi.