Prov 23

₁Chik letachufwiyej hin'o tä niyat,

yej p'ethatlä tä lhewej

häp hin'o tä len'ohyaj ihi.

₂Tej chik wuj tä lechuyu,

mat yej lhak'ale äk,

₃häp n'olhäk tä wuj tä isen lhäy'e tä akäj,

tsi elat niyattso t'uhläk ikan amej.

₄Yej alekhajyen yämthilek

ahäpe hin'o tä hiw'en m'ayek,

wet yej lhen atichunhayaja.

₅Chik letetshan, lew'enla tä

ihichet'a n'okäywet chik t'un.

Yofwajkwet tatäy,

tet iwoyek iwo lhafwisa wet yik,

mälhyej iwoye iyhäjkottaj.

₆Yej tachufwiyej hin'o tä tsofwnaj,

wet yej käne lhäk tä isen wet akäj.

₇Tsi letichunhayaj isit'a,

tej chik yok, “Tufw”,

wok yok, “Yäyej”,

mat mathichet'a.

₈Letach'uyhiyejlhila m'ak tä letufw,

wet lajit lahaya ämtes tä isen tä lewoyeje hin'otso.

₉Yej lätyeneje ämet häp hin'o tä ch'isuk,

tsi iläkwihila ämtes tä matchehen.

₁₀Yej lanche tuntey tä pajche õ'tihi

línea tä lepes n'oelh kahonhat,

wet yej soyej lhip honhat tä lewuk chipenhas.

₁₁Tsi Lhawuk häp tä tach'ote lhamel,

wuj tä takhajay wet tatayhla ahilä.

₁₂Ch'ahuye nilhokej m'ak tä õ'chufwen amej.

Ti amej yämthilek wuj tä aisej.

₁₃Yej leyej tä lefwonepej äs,

tsi y'inhit'ak letasin.

₁₄Chik lewoyeje täjtso,

lefwayhthiyeja t'ilek,

tsi nech'e isila m'ak tä iwoye.

₁₅Yäs, chik ahäpe hin'o tä lehusek ihi,

matche tä okäjyaj ihla n'oyej,

₁₆wet otamsek ihi chik olät ame

tä isen ämtes tä lhämlhi.

₁₇Yej tihi ahusek chik let'äytene

häp iyhäj tä lech'isukyajay ihi.

Mat wujyenpej häp Lhawuk,

₁₈häpkhilek ais alhoho

wet tek tatäy amej aniwhayaj.

₁₉Yäs, ch'ahuye wet achufwenej,

wet äm is m'ak tä lewoye.

₂₀Yej alet'aje iyhäj tä ikän hat'es,

wok häp iyhäj tä yäm wuj lhäk tä tufw.

₂₁Tsi w'oknhas wet yalhk'alis

pajla'tha nahati tä ilän,

wet tä lepese noj lakäywet

wet taw'uyhi lew'uy tä wasi.

₂₂Ch'ahuye ajcha tä häpe elh tä letälho,

wet yej lhen w'et m'ayeka ako

chik nichäte ifwala tä hich'ut.

₂₃Akhajyench'oye m'ak tä matche,

lhäy'e n'ohanyaj, lhäy'e n'ochufwenyaj,

lhäy'e tä ahusek ihi.

Wet chik lekatej,

yej wompe m'ak tä lewatlä.

₂₄Mamse tä wuj tä is m'ak tä iwoye,

lajcha matche tä akäjejlhi.

Wet elh tä lhäs lehusek ihi,

wuj tä lakäjyaj iyeji.

₂₅Tä mälhyejtso, is chik ahäpe

elh tä lajcha lhäy'e lako akäjejlhi

tä ahäpe lhamel lhäs.

₂₆Yäs, ch'ahu n'oye

wet tetshan m'ak tä owoye.

₂₇Tsi atsinha tä lakain'oyaj ihi

hätet iwoye chowej tä pitoj

chik hin'o nichäte.

Wet atsinha chik katäfwelayej

hätet iwoye chowej tä nitsajaho.

Chik lechäte, lesakanhiyejt'a chik lech'oleye.

₂₈Häp atsinha tä mälhyejtso

hätet iwoye etantsaj

chik ikanejlhi m'ak tä t'uhläk t'etane,

wet tamenej wujpe hin'ol

tä nemhit ihumnhen lech'efwas.

₂₉¿Atsi tä äytaj m'ak tä ilän wet t'änlhi?

¿Atsi tä õtäkleyejlhi,

wet atsi tä õ'wo lelätseka

tä niwoya m'ak chik tamenej?

¿Atsi tä tatey t'ukwahen?

₃₀Häpe t'at hin'o tä nileyayej hat'es,

häpe t'at elh tä t'ukwe hat'es tä nech'ayek.

₃₁¡Yej yahin hat'es tä ichät

tä ihi n'olhäthi tä akäj!

₃₂Tä lepese, hätet iwoye

amlhäj chik ayokwaj,

wuj tä äytaj.

₃₃Iwohla haw'enhaya,

wet lhämhiyela m'ak tä lajit lahaya.

₃₄Hätehlat iwoyek lhehi lewomekitaj chowej,

wok lhehi barco tä yafwthitaj tä äytaji ichäjlhi

tä inät wuj tä iwo lhetheya.

₃₅Wet lhohlak,

“Õ'hichäjn'o, mat tek oläte.

Õ'päjlhin'o, mat oläthiyet'a.

Chik ow'ok noj n'o'pe,

äp ot'uhikwelat lhip hat'es.”