1W'enha lhamej fwiy'et wet w'enha lhamej nahayofw,
häte isit'a chik iwomchä chik õ'lanhi yachuyaj.
Wet häp tä hätet iwoye täjtso,
isit'a chik õ'wujyen häp hin'o tä ch'isuk.
2Afwenche tä weta wok lhup newahi, wey'älhi t'at.
Wet n'olhämtes tä ni'isachehen mälhyet iwoye,
chik newache m'ak chik tamenej, m'ak iwohiyet'a.
3Yel'ataj lecha t'at n'otasnhat,
wet asno häp tä õ'wo lhokheka,
wet hin'o tä ch'isuk häp tä õ'päjejlhi hal'ä.
4Yej lhäjlhahlä letichunhayaj
häp hin'o tä m'ak nitälhaye,
häpkhilek akniteya iwoye lham tä ch'isuk.
5Mat amtej chulhej'atlä
ämtes tä m'ak nitälhaye,
häpkhilek näma lhame
tä inu atape tä ihan m'akej.
6Hin'o tä t'ekhaye elh tä ch'isuk
wet ichenchufwi lhämet,
hätet iwoyek yisthen lham takäläy,
wet hätet iwoyek iyäyej t'at lefwitajayaj.
7Hin'o tä ch'isuk, lhämet yikhit'a.
Hätet iwoye tsufwlaj takäläy,
yäpnhomche t'at.
8Elh tä iwujyen hin'o tä ch'isuk,
hätet iwoye hin'o chik yäytej tunte lefwonthi.
9Hin'o tä ch'isuk ihanhiyejt'a
n'olhämet tä n'ohanyaj.
Hätet iwoye hin'o tä w'oknaj
chik ch'uthan ihi takwey, iläthit'a.
10Hin'o tä yen lakawoya
hin'o tä ch'isuk wet itihi lew'et,
hätet iwoye hin'o tä tiyäjejen lotek
wichi tä ilunhen.
11Hin'o tä ch'isuk tä yachajopej
m'ak tä ni'isa tä iwoye,
hätet iwoye asinäj tä yachaj lhamho lech'uyhat.
12¿Hä lew'en hin'o tä nhana m'akej
tä fwetaj ihan m'akej?
Iwoye t'at m'ak tä lham letichunhayaj.
Mat häp hin'o tä ch'isuk,
chik nitäfwelej m'ak tä ni'isa tä iwoye,
elat ilehiyeja.
13Hin'o tä n'etäjlhi yok:
“¡Hay'äj tä ihi n'äyij!
¡Ow'enne tä nekche t'at hupuy kawayhi!”
14Hupep'ot yafwthi ilunkatlhi t'at.
Häp tä mälhyej'attso n'etäjayis
tä nich'olelhi'pe lemäwet.
15Hin'o tä n'etäjlhi tachuma n'olhäk tä ihi plato,
mat tek ichuttej yämthilek y'uyhte lak'aj.
16Hin'o tä n'etäjlhi yäm lhame
tä lham t'at tä ihan m'akej,
fwetaj inu'pe iyhäj tä is alhoho tä nichulho iyhäj.
17Chik olhay'uytho iyhäj
tä lhailätyenejwethä lhämtes,
hätet iwoyek otsok lech'otey
häp asinäj tä fwitsaj.
18-19Hin'o tä itiyej t'akanyaj häp elh,
chik tajyäme m'ak tä iwoyeje elh,
wet yok, “Okoyhyaj t'at”,
hätet iwoye hin'o tä cha länek
chik iwunhomche m'ayhay,
wet tiyäjejen wichi n'och'ähal tä n'ot'ilek.
20Chik newache elh tä sitäwo,
wichi tek tataywek.
Hätet iwoye itäj,
chik lehuk newache, y'om t'at.
21Chik ot'uhläk nitutseya itäj, otchuma fwiyhol,
wet chik ot'uhläk y'uho itäj, owo lehukwa.
Wet mälhyej'attso hin'o tä äkleyhtsaj,
häp tä iwo n'oka'tshayaja.
22Elh tä sitäwo,
lhämtes hätet iwoyek akäj,
wet tiyäjo hin'o chik häpe pajtha atojchä.
23Chik hin'o t'uhläk isilataj towej tä iyhät,
y'ilenejlhi pintura.
Häp tä mälhyej'attso n'olhämtes tä ni'äytesachehen
mat häpe t'at n'otkanyaj.
24Elh tä n'äyihomche iyhäj,
tä yämlhi is t'at,
mälhyej chik newache lefwitseyaj.
Mat t'akanyaj ihi t'at letichunhayaj.
25Tej chik yäm is lhämtes tä yämlhi amho,
yej matitche, tsi m'ak tä ni'isa tapoyej lehusek.
26Tej tä fwetaj iskat tä n'äyihomche iyhäj,
n'änhila'pe m'ak tä ni'isa tä iwoye,
wet nilhokhiyeja wichi chik hiw'enla.
27Elh chik yenlhi chowej,
lhamlak nichäte.
Wet elh chik ihuttshi tunte,
lhamlak tunte nichätpe.
28Hin'o tä w'et yämlhi, n'äyiho elh
wet ilänej lhämtes tä ni'isachehen.
Wet hin'o tä ikänitchehen lhämtes,
tamenej elh tä tach'ahuye.
