Prov 27

₁Yej alechäjejlhi tä lhok,

“Owohiyela täjtso chik fwala.”

Tsi lehanhiyejt'a m'ak chik ihichelak fwala.

₂Is chik wichi t'at chik yäm ame tä ais.

Isit'ak am t'at chik lhäm ame tä ais.

₃Choyhat tunte lhäy'e holo,

matkat hin'o tä ch'isuk

lewäk nem koyhyaj tä choyhat,

lechoyhthayaj inu'pe tähestso.

₄N'owäk häpe t'at m'ak tä ni'isa,

wet n'ofwitseyaj iwasthi m'ak at chik häpe.

Mat n'ot'ischenyaj inu'pe tähestso,

ihichet'a elh chik tumlä.

₅Is chik lefwone aelh.

Yej tech'aynej tä leskatho tä lehumin.

₆Ot'ekhaye t'at okalay'i,

tej chik iwo olätseka.

Mat ot'ekhahiyet'a elh tä yen tayhfwayan'o,

tej chik fwetaj ihuminn'o wet hits'u och'alo.

₇Elh chik yip'is, y'ulhan akäyek.

Mat häp elh tä nichuyu,

tej m'ak chik tapay,

mat yok, “Hak'onek.”

₈Elh tä yikch'oye honhat tä lew'et,

hätet iwoye afwenche tä yikch'oye lhup

wet lhaitonitche tä yik.

₉M'ak tä lenij akäjche ikänitlhin'o.

Wet okalay'i lhämtes tä isen,

häp tä ikhajyenn'o.

₁₀Yej leyej akalay'i,

wok häp elh tä ajcha kalay'i.

Häpkhilek tejlak alhakli ihi,

mat lehohiyet'a apuhfwa tä lew'et atofwe,

tsi iche elh tä ni'tofwayehlä haw'et.

₁₁Yäs, is chik ahäpe elh tä lehusek ihi,

häpkhilek okäjyaj in'oyej

wet ohanhiyeja owoyneje olhämet

chik onchulho elh chik fwetaj

ilätyenlhi n'oyej lhämet.

₁₂Elh tä hin'olhi ihanlä

lewit'äyhyaj wet lhaiskat.

Mat häp elh tä nihn'oyalhi

tujlhache t'at m'ak tä iwoye,

pajla'tha lewit'äyhyaj ihi.

₁₃Elh chik lhailhuhyenej

elh tä nitäfwelayej laka pi'ä,

soyej lew'uy yämthilek yen lhäyeka letape.

₁₄Elh tä ifwitsenej lhämet

tä n'okwiyej elh tä kamaj honatsi,

tet iwoyek iläkwlhi elh.

₁₅Atsinha tä äkleyhtsaj

hätet iwoye hup lhetekch'o

tä tatoy chik iwomchä.

₁₆Chik ofwetaj on'äyejo m'ak tä iwoye,

hätet iwoyek ofwetaj ofwonlä ihwok,

wok ot'uhläk otsok inät.

₁₇Chik ot'uhläk y'uy chinaj,

ofwutej at elh chinaj.

Häp tä mälhyej'attso,

hin'o t'at tä ikhajyen elh.

₁₈Hin'o tä t'uye lelafwek,

tufwila yachuyaj lhay.

Häp tä mälhyej'attso elh chik t'uye lewuk,

lewuk iwujyen t'at.

₁₉Chik oyahnhi inät, ow'en t'at opeyak.

Häp tä mälhyej'attso,

hin'o letichunhayaj hin'älit t'at

m'ak tä ihi lehusek.

₂₀N'ot'ilek lhäy'e n'op'itsekw'et,

tek lepes iche.

Häp tä mälhyej'attso,

hin'o tä ayhthatsaj lepes ihichet'a.

₂₁Oro lhäy'e plata, õ'thatho itäj

häpkhilek õhw'en chik kalelhäj tä is.

Wet häp tä mälhyej'attso hin'o.

Chik wichi iwujyen,

n'änhila m'ak tä häpe.

₂₂Tej chik õ'päjlhi hin'o tä m'ak nitälhaye,

wok õ'chofwaji,

ilehiyejt'a lakey tä nit'uyahläk

yenlhi m'ak chik häpe.

₂₃Is chik wuj tä letäfwelejwethä aläy tson'atas,

wet let'uyepej aläy kayla lhayis,

₂₄tsi n'okäywet lhäy'e n'oniyatyajay t'unhit'a.

₂₅Chik inuphä hup,

iwo tesa tä w'atshan honhat,

wet wichi ihutwek hup tä tälhe chenhas,

₂₆lew'enla lew'ole tson'atas

yämthilek lhen haw'uya.

Lewomla aläy kayla les

wet lew'enla chinaj t'äj

yämthilek lechäj honhates.

₂₇Lew'enla t'os tä naya

tä tälhe aläy kayla lhayis,

yämthilek iche lhäk häp haw'et lheley,

lhäy'e iyhäj tä achumyenhay.