Prov 4

₁Mamses, ch'ahuyaye ajchalis

lhämtes tä ne'tek lewoyaye.

Tetshan, häpkhilek lehanej m'ak tä is.

₂Ochufwen amejen m'ak tä is chik lewoyaye.

Tä mälhyejtso, yej leyej ochufwenyajayna.

₃Tsi häte olham ohäpehte

elh tä lajcha ihi,

wet oko wuj tä ihuminn'o.

₄Ojcha yokwe tä ichufwenn'o:

“Enpej atichunhayaja olhämtes.

Woye m'ak tä one'tek lewoye,

häpkhilek haw'atshancheyaj ihi.

₅Is chik lewatlä n'ohanyaj

wet lewatlä n'otäfwnhayaj.

Yej p'ethatlä olhämtes wet yej kachu.

₆Humin n'ohanyaj wet yej leyej,

tsi t'amajila amej.

₇Chunkat tä lewatlä n'ohanyaj

lhäy'e n'otäfwnhayaj.

₈Humin wet aineyhthiphäla.

Wujyen wet aiwujyenla.

₉Yenla awayhata n'olhetek t'ak

tä wuj tä isilataj,

wet yäythiyeja etek.”

₁₀Yäs, ch'ahuye olhämtes wet a'en lewuka,

wet wujla'pe nekchämis chik haw'atshancheyaj ihi.

₁₁Ohänla amche n'ohanyaj len'äyij.

Otch'otla ame yämthilek lenukwe

n'äyij tä is alhoho,

₁₂wet tek ihichela m'ak chik inu ahilä,

ihichet'ala m'ak chik letanhäphänej

chik lenu alhoho.

₁₃Akwey untej ochufwenyaj wet yej leyej.

Amajej, tsi häp tä haw'atshancheyaj.

₁₄Yej nukwe len'äyij

wichi tä kahap'altsentsesa,

wet yej ten lhamel tä ni'isa.

₁₅Yej nukwe len'äyij, atontehlä.

Mäch'oye lhamel wet tujlhache han'äyij.

₁₆Tsi chik niwoyaye m'ak chik ni'isa, imähihent'a,

wet chik niläna elh chik häpe, nahati ilänhit'a.

₁₇Lhamel tufw pan tä tälhe

m'ak tä ni'isa tä iwoye,

wet iyäyej hat'es tä t'etantes.

₁₈Mat häp wichi tä isen lhamel len'äyij

hätet iwoye ifwala tä nech'e inuphä,

lhäy'epej lhip, lhäy'epej lhip tä isi.

₁₉Mat häp wichi tä iwoye m'ak tä ni'isa,

len'äyij honatsi t'at,

wet hiw'enhit'a m'ak chik tanhäphänej.

₂₀Yäs, tetshan olhämtes

wet ch'ahuye m'ayhay tä oyäme.

₂₁Yej p'ethatlä wet amajeji ahusek,

₂₂tsi elh tä iwoye häpe t'at lew'atshancheyaj

wet kacha yämthilek t'isan isej.

₂₃Uye ahusek,

nuhatpe m'ak at chik häpek let'uye,

tsi häpe t'at tä haw'atshancheyaj tälho.

₂₄Tetshan m'ak chik let'uhläk lhäme,

häpkhilek ka'ena ämeta m'ak chik kamatache.

₂₅Tetshan m'ak chik is alhoho,

yej leyej tä leyahin

m'ak tä ihi tä letatache.

₂₆Chunkat tetshan m'ak tä let'uhläk lewoye,

häpkhilek ispej alhoho.

₂₇Yej tatsayej kanhi tä lewoye,

wet yej woye m'ak tä ni'isa.