Prov 5

₁Yäs, tetshan olham ohanyaj

wet ch'ahu n'oye tä oyäme m'ak tä ohanej,

₂häpkhilek is m'ak tä lewoye

wet m'ak chik lhäme häpe t'at m'ak tä matche.

₃Tsi atsinha tä lech'efwa ihi

akäj lhämtes tä iwoye,

hätet iwoye akäyek.

₄Mat tä lepese hätet iwoye m'ak tä tapay

wet äp y'uy, inu'pe n'ofwajnhat tä lhayhil nitäkw.

₅Ihänla ame n'op'itseyhay lew'et,

tsi len'äyij tä inukwe

tiyäje t'at n'ot'ilek.

₆Wet ihuminhit'a n'äyij tä tiyäje n'ow'atshancheyaj,

wet kalelhäjit'a m'ak tä iwoye.

₇Tä mälhyejtso, tä ahäpehen oles

ch'ahu n'oye athana wet woye

m'ak tä ofwel amhohen.

₈Yej aletott'ayne atsinha tä lech'efwa ihi

wet yej hoye lewukwe.

₉Tsi chik lewoye täjtso,

wichi iyhäj tä kahap'altsentsesa isila amej

wet ahäpkhila elh tä w'et m'ayek t'at.

₁₀Lhamel iwohla kotsayej akäywet

lhäy'e nilhokej m'ak chik tälho achumtes.

_11-13Chik mälhyejtso, chik nemla akhajyhayaj ihi

nech'ehilak letichunche täjtso wet lhohlak:

“¿Chipte tä n'am woyehte m'ak tä is alhoho,

wet tek owoye tä õ'näyej n'oho m'ak tä ni'isa,

wet n'am woye lhämet

n'ochufwenyajwos tä ichufwenn'o?

₁₄Tatäy lhimphaj wet matche tä

owit'äyhyaj in'oyej tä oiyej wichi.”

₁₅Chik lechim, yäyej inät tä ihi apek.

₁₆Yej w'et letsäylhi inät tä ihi aka ts'ifwik,

yej tsächehen hupuy kawayhil.

₁₇Ts'ilak am tä alewuk

ts'ifwik lhäy'e inät tä ihi,

lewukhit'a wichi iyhäj.

₁₈Is chik Lhawuk lakäpfwayaj tä is

ihi t'at aka ts'ifwik,

wet wo akäjyajayej häp atsinha

tä lhen unfwaya tä amamse,

₁₉häp lham tä laj lefwitseyaja.

Is chik nittäya lehumnhayaj

tä iti amej nilhokej ifwalas.

₂₀Yäs, yej läna amej atichunhayaj

chik leyahin atsinha tä lech'efwa ihi.

Yej tatsufweleja atsinha elh.

₂₁Lhawuk itetshan t'at m'ak tä hin'o iwoye,

niwohit m'ak chik niw'ena.

₂₂Hin'o tä ni'isa,

lakey tä iwoye yen lhäytseka.

Lech'isukyaj hätet iwoye niyhäy tä yäyitlhi.

₂₃M'ak tä lhaknitsokayejlhi tä iwoye

ihäne t'at t'ilek.

Lhektshanyaj tä wuj tä iwoye

tamenhiyejak tatäy.